** ملاحظة سريعة في الاول مالهاش علاقة بمحتوي البوست

** ملاحظة سريعة في الاول مالهاش علاقة بمحتوي البوست : ( أنا باقرأ كل الرسايل اللي بتجيلي علي صراحة , و لو في أى شيء أنا شفت إني ممكن أساعد فيه حاجاوب بما أظن إني أعلم . و لو تظن إني ” genuine 😅 ” أو عندي أى شيء ممكن أفيد بيه , رجاء تواصل معايا بشكل مباشر ) . … …

في قناة يوتيوب ممتعة للغاية إسمها ( magnates media ) , أنصح جداً بمتابعتها و مشاهدة كام فيديو من اللي عاملينهم . بقالي فترة باتفرج علي فيديوهاتهم أثناء آدائي للمهام المنزلية اليومية المحببة بالنسبة ليا ( غسيل مواعين , تطبيق هدوم , تنظيف و ترتيب , … ) الحاجات الصغننة اللي بتديني إحساس سريع بالإنجاز و بتسخن عقلي شوية عشان أدخل فمهام شغل أخري معقدة نسبياً . … و للزملاء اللي بيعانوا من ( ADHD ) بأى درجة من درجاته .. أو بيواجهوا مشكلة ال ( Multiple Option Paralysis = شلل الإختيارات الكتير ) اللي هي إنت مش عارف تعمل إيه فألف حاجة فدماغك فنفس الوقت فبتحس بالشلل , و ممكن يستمر الشلل ده معاك يومين تلاتة و يزيد لو المهام قاعدة بتتكربس فوق نافوخك . نصيحتي فعلاً هي المهام اليدوية سريعة العائد دي .. يعني حتي لو شقتك متنضفة و مترتبة و مافيش حاجة تعملها بإيديك , خد بعضك و دور علي جامع تكنسه , علي شقة صاحبك توضبها له , علي أي حاجة ممكن تعملها بإيديك بسرعة و تديك إحساس سريع بالإنجاز . ده بيضخ شوية هرمونات سريعاً فعقلك يساعدوا إنك ت ( jump start = تكارك ) الجزء اللي في العقل اللي المفروض يكون شغال أوتوماتيك و يساعدك تنظم دنيتك . … المهم : القناة اللي باتكلم عليها في الأول دي , فيها شوية فيديوهات ممتازين عن الأغنياء الأوائل في القرن اللي فات ده . الناس اللي عملت أمريكا الحالية , و العالم عموماً , و كونوا ثرواتهم إزاي و عملوا بيها إيه . أسامي زي : j p morgan, vanderbelt , carnegi , … الناس اللي كانت متحكمة في صناعات ( الصلب , النقل , التمويل , … ) . و في شوية فيديوهات عن الشركات الضخمة في عصرنا الحالي كمان .. زي ( سنابشات , إنستاجرام , واتساب , .. ) و الصفقات المليارية اللي تمت فيها . … … فاكر كويس أول مرة طلبوا مننا نجيب كراسة رسم بياني .. كنت في خامسة إبتدائي … سنة 1998 - 1999 و فاكر كويس جداً إزاي إتعلمنا نرسم خط بين محورين السين و الصاد بناءاً علي المعطيات اللي الميس كانت بتديها لنا .. و فاكر إننا كنا دايماً بعد ما بنرسم الخط البياني .. نحاول نعرف منه القيمة بتاعت السين مثلاً لما الصاد تبقي بقيمة أعلي .. و هكذا . … … لو بعدت شوية بعينيك و إتفرجت علي العالم حالياً .. و شفت الشركات الضخمة اللي بدأها أشخاص من سنة 1800 مثلاً .. و بعدين التغيرات اللي حصلت تدريجياً علي شكل العالم سنة 1900 ل 1950 .. و بعدين الشركات الضخمة اللي طلعت في الفترة من 1950 ل 1990 .. و بعدين الشركات الضخمة اللي طلعت من 1990 ل 2010 .. و بعدين الشركات الضخمة اللي طلعت من 2010 ل 2016 .. و بعدين من 2016 لحد 2023 .. … ملاحظ التغير في المدة الزمنية ؟ طيب لو كتبت تفاصيل الشركات دي , و مجالات شغلهم .. حتلاحظ حاجة ؟ … … طيب .. لو رسمت منحني تاني يوضح شكل التعليم في العالم خلال الفترات دي .. 1800 ل 1900 1900 ل 1950 1950 ل 1990 1990 ل 2010 2010 ل 2016 2016 ل 2023 حتشوف الفروقات في المناهج ؟ , و التمويل و المنح بيتم توجيهها ناحية أنهي مجالات ؟ ( التعليم و الأكاديميا بشكل عام كان و ما زال جزء ضخم منه بيوجهه الفلوس و المنح و التمويل اللي بيُعطي للجامعات عموماً ) . ده بدأ يتغير بشدة علي مدار ال10 سنين اللي فاتوا , و بقي جزء ضخم من التعليم مجاناً … و ده إختلف عن زمان … زمان كنت بتدفع عشان تتعلم .. و عند مرحلة معينة بيندفع ليك فلوس و مرتب عشان تكمل تعليم . دلوقتي لا .. دلوقتي تقدر تتعلم من غير ما تدفع ولا مليم .. و فنفس الوقت ماحدش حيدفع ليك عشان تكمل تعليم .. إنت محتاج تعرف تجيب فلوس تكفي معيشتك بنفسك .. و تتعلم بنفسك . … … تقدر تمد المنحني علي إستمراريته مع الزمن … و تحاول تتخيل شكل ال3 سنين اللي جايين ؟ … … … جزء كبير جداً من ( عقيدة و أخلاق التعلم = learning codes and ethics and doctrine ) نفسه أتغيرت . يعني زمان .. كان في تقدير ضخم لحاجات معينة و كنت بتتحاسب عليها زي :

• الخط الجميل … ده إندثر بلا رجعة خلاص .
• حفظك لجداول حسابات و جداول الضرب … إندثر جزء كبير منه .
• قدرتك علي تنظيم المعلومات بشكل يدوي ( سكيتشات و كراسات المذاكرة و الواجب ) و الملازم و ما شابه … إندثر جزء كبير منه .. و حينتهي بالكامل .
• قدرتك علي إسترجاع و البحث عن المعلومات بشكل يدوي … إندثر بالكامل .. و بالتالي .. الهالة الضخمة اللي كانت بتحيط بالناس القائمين علي الأخلاقيات و العقائد دي ( الخاصة بالتعلم ) .. إندثرت هي كمان .. … … علي مدار ال150 سنة اللي فاتوا .. تم ربط الإستقرار الحياتي ( السعادة و الهناء ) بالإستقرار الوظيفي .. القائم علي إستقرار كيانات ضخمة .. كانت عشان تتغير معالمها بتحتاج وقت كتير جداً ( 50 سنة علي الأقل ) . .. يعني كنت تلاقي أبوك أو جدك بيشتغل في وظيفة في شركة و يتدرج فيها طول حياته .. بدون ما يفكر فأى شيء ممكن يتغير .

دلوقتي .. صعب جداً تلاقي ال ” إستقرار ” ده في عقول الطاقة العاملة اللي سنها تحت 35 سنة . لأنه بدأ غصب عنه يشوف التغيرات اللي بتحصل بشكل مضطرد و سريع جداً . … … … في بداية البشرية علي الأرض .. كان الإنسان عايش في حالة من 3 حالات لا غير :

• hunter gatherer = يعني بيصطاد و يجمع ثمار من الغابات عشان ياكل . و دي كانت جماعات عددها قليل , و بتتنقل كتير , و بسرعة .

• farmer = يعني فلاح مستقر في قرية مع فلاحين , و دي كانت مجتمعات عددها كبير نسبياً , .. و بتقعد في مكان واحد و تبني سدود علي الأنهار و مدن و حياة كاملة .

• wanderer and sea men = يعني بحارة و هائمين علي وجوههم , و دول كانوا مجموعات صغننة في العدد برضو .. بس عايشين في البحور و علي السواحل .. و مركزين أكتر علي صيد البحر و النقل البحري عموماً . … … تجمعات البشر .. و تكوين قري ثم بلدان ثم إمبراطوريات .. نشأ مش بسبب البحث عن الموارد أو الفلوس .. الإنسان بطبعه مزود بكل الأدوات اللي تساعده يعيش في الأرض و ياكل و يشرب عادي .. تكوين جماعات و قري ثم بلدان ثم إمبراطوريات نشأ بسبب رغبة الإنسان في الشعور بالأمان و الإستقرار ..

مع المجموعة إنت آمن أكتر و مستقر أكتر .. من لو كنت لوحدك . مع عدد من المجموعات بيكونوا قرية .. إنت آمن و مستقر أكتر . مع عدد من القري بيكونوا بلد .. و بعدين مع عدد من البلدان بيكونوا إمبراطورية .. إنت مستقر و آمن أكتر . … … في عالم الإنترنت اللي دابت فيه حدود سياسية كتير .. اللي مش موجود فيه حدود جغرافية إطلاقاً .. اللي بقي ليه لغات خاصة بتبعد كل يوم أكتر عن لغات ال50 سنة اللي فاتوا . اللي أصبح فيه حرية مادية تساعد الإنسان علي البقاء و الأكل و الشرب بشكل منفرد . اللي بيواجه فيه الفرد داخل مجتمعه المادي الواقعي خطر كبير و عدم إستقرار و أمان .. لكن أصبح واعي بنوع الدعم اللي ممكن ياخده من أشخاص علي الإنترنت يبعدوا عنه آلاف الأميال . .. في عالم الإنترنت ده .. نوع الكيانات اللي حتنشأ خلال ال3 ل 10 سنين القادمين .. نوع جديد .. نوع بيخليني لسة شايف حاجة جديدة و مثيرة للإهتمام في العالم . … …

و الله أعلم .