تعمل إيه في كمية البوستات اللي إنت عامل لها (

تعمل إيه في كمية البوستات اللي إنت عامل لها ( save ) و كل شوية تأجل إنك تفتحهم أو تقراهم أو … ؟!

الإجابة بتلخيص شديد جداً : ( إتعلم تسامح نفسك , و بعدين إتعلم تعاقب نفسك صح ) . … شرح الإجابة دي بقي .. كالتالي : … زمااااااااااااااااان .. أيام ما إنت كنت طفل صغنون جميل .. و قبل ما باباك و مامتك يعلموك القراية و الكتابة .. أو قبل ما تبدأ تتعلم الكلام ده في الحضانة أو المدرسة .. ماكنش عندك الإحساس الضخم بالذنب اللي عندك دلوقتي ده .. كنت وعايش برنس فنفسك .. و سعيد إنك عايش عادي كده .. … و بعدين دخلت المكنة اللي بتبدأ تشكل عقلك و تفكيرك عشان تطلع زي باقي الناس .. و علي مدار أهم 10 سنين فحياتك .. من سن 7 سنين .. لسن 17 سنة .. تم تشكيل عقلك و نفسيتك إنك موظف صغير .. فشركة كبيرة .. موظف عليه تقارير .. عليه مديرين .. عليه تارجت لازم يحققه آخر الشهر ( درجات ) .. ليه زمايل لازم ينافسهم ( مع إنك مش مضطر ) .. ليه سناير ( جمع سينيور ) .. يحسسوه إنه لسة صغير ( مع إن ده مش حقيقي ) .. و ليه جناير ( جمع جونيور) .. يحسسوه إنه كبير ( مع إن ده برضه مش حقيقي ) .. .. تم تشكيل عقلك و نفسيتك إنك ليك ( منهج ) .. حاطه ( آلهة - أستغفر الله العلي العظيم ) .. لا يُسئلون عما يفعلون .. و لكنهم بيسألوك إنت ( مرة كمان أستغفر الله العلي العظيم ) . … تم تشكيل عقلك و نفسيتك إنك ( لا تسل و تجادل يا أخ علي ) .. و إنك تبذل مجهودك بس ضمن ال ( منهج اللي متحدد من سنين فاتت ) .. و إنك كل خلية فيك منتظرة ال ( إمتحان ) . … تم تشكيل عقلك و نفسيتك عشان تعيش و تموت بجملة قمة في التخلف و الغباء .. و للأسف كتير مننا عاش و مات بيها .. ألا و هي : ( يوم الإمتحان .. يكرم المرء أو يهان ) .. أنا باكره الجملة دي كراهية منقطعة النظير .. … … خلال ال10 سنين دول .. سياسة العقاب اللي إنت عشت فيها دي .. خلاتك دايماً حاسس بالذنب .. أصل ببساطة .. مش الفصل كله كان بيطلع الأول و يقفل الإمتحان و يجيب ال100% … لو الفصل 50 طالب .. 2 مثلاً بس علي أفضل تقدير اللي كانوا بيجيبوا ال100% .. في حين ان ال48 التانيين ( اللي أنا و إنت منهم ) .. كنا دايماً بنخسر درجات .. … … و نبدأ فعملية العقاب .. اللي كان بيشترك فيها الأهل و المجتمع لأن ده ( ما وجدوا عليه آباءهم و أجدادهم ) . أصل طالما إنت فنفس الفصل .. بتاخد نفس المنهج .. و عندك إيدين و رجلين .. ليه تقل عن ال100% .. طالما في ناس قدرت توصل لها ؟! … … علي مدار 10 سنين .. و إنت بشكل واعي أو غير واعي بتجلد نفسك إنك ( أقل ) .. إنك ( مقصر ) .. إنك ( مش مذاكر كفاية ) .. إنك ( مضيع وقت ) .. إنك ( مش فاهم كويس ) .. ( مش حافظ كويس ) .. إنك ( مش بتبذل مجهود كفاية ) .. إنك ( مش مركز ) إنك ( أقل ) .. … … نتيجة لكدة إيه اللي بيحصل ؟ عقلك البشري .. و فطرتك البشرية اللي ربنا خلقها جواك .. غريزة البقاء .. بتاخد وضع دفاعي بشكل طبيعي .. بالظبط كأنك طلع عليك أسد .. غصب عنك حتخاف و تجري .. ( fight or flight ) . ربنا خلق جوانا الغريزة دي لأسباب كتير أوي .. و لكننا كتير بيعيش حياته و يموت برضه بدون ما يدرسها أو يفهم قوتها و ضعفها ( بس ده كلام لبوست تاني إن شاء الله ) .. … … عقلك لما بيبدأ ياخد الوضع الدفاعي ده .. بيبدأ بإنه يتصرف بالظبط بنفس الطريقة اللي إنت بتتصرف بيها بشكل غير واعي مع أصناف الأكل اللي مابتحبوش .. و بيبدأ يتكون جواك رد فعل عنيف .. ضد أى حاجة تفكرك بالعذاب اللي إنت عيشت فيه علي مدار ال10 سنين دول . … قبل حتي ما تبدأ تفتح كتاب .. أو تشوف فيديو يوتيوب .. أو تقرا بوست طويل فيه معلومات .. عقلك الغير واعي .. بيبدأ يفتكر كل مرة إنت عيشت إحساس المذاكرة خلال ال10 سنين الأساسيين فتركيبك . و يبدأ يخاف من ( الإهانة , و إحساس الدونية , و الذل , و الخوف , و الترقب , و اليأس , و … ) كل الحاجات اللي إنت كنت بتحس بيها أو أهلك و المجتمع بيحسسوك بيها لما بتقل في الدرجات . … … و بعدين غصب عنك .. تلاقي نفسك أجلت .. و عملت ( save ) للبوست .. و إنت بتوهم نفسك إنك حترجع له بعدين لما يبقي في وقت .. و بعدين ؟ .. و بعدين تلاقي بوست تاني .. أو فيديو تاني .. أو حاجة تانية نفسك إنك تذاكرها أو تقراها .. و لكن عقلك الواعي .. بيبدأ يفتكر البوست الأولاني اللي إنت أجلته .. و عقلك الغير واعي .. بيبدأ يفتكر كل القرف اللي ذكرته من شوية ده .. .. فتلاقي نفسك برضه بتعمل (save) للبوست .. علي أمل إنك تلاقي ال ( حافز , الرغبة , الوقت , ال … ) كل الحاجات اللي إنت فاكر إنها اللي حتكسر الجدار الضخم جواك ده .. … … الجدار ده مابيتكسرش بال ( حافز أو الرغبة أو … ) أو أى حاجة من الكلام اللي إنت مش قادر تحس بيه ده . الجدار ده بيتكسر بحاجة واحدة بس .. … إنك تعرف إنك ضحية .. و إنك ماتعلمتش من الأول إزاي تكوّن منهجك بنفسك .. ماتعلمتش إنك مش حصان فسباق … و فضلت طول عمرك تتعاقب .. و حاسس إنك أقل .. علي حاجة وهمية .. حاجة إخترعها البشر عشان يريحوا نفسهم .. و يسكنوا ضميرهم .. ألا و هي ( الدرجات و النظام التعليمي الحالي ) .. … … فبالتالي .. لازم تبدأ تسامح نفسك .. علي كل ما حصل زمان خلال ال(10 سنين دول ) .. و علي كل ( بوست إنت عامل له save ) و بيأنب ضميرك .. … سامح نفسك .. و إبدأ إعرف إنك مش ( أقل ) .. و إنك مش ( فسباق ) .. و إنك مش الطفل عديم الحيلة اللي تم زرع الدونية فعقله و نفسيته علي مدار ( 10 سنين ) .. … … سامح نفسك .. و إبدأ إكتشف لأول مرة .. إزاي تتحكم فنفسك دي .. إزاي تحدد ليها منهج بنفسك .. تبحث .. و تفكر .. و تحدد منهجك بناءاً علي قدراتك اللي بتكتشفها بنفسك كل يوم .. مش تمشي علي منهج شركة أو منظمة تعليمية ماتعرفش عنك غير رقم جلوسك .. حرفياً انا حاسس بالمهانة و أنا بافتكر إن المنظمة التعليمية بتهتم فقط برقم التختة .. رقم الديسك .. هههههههههههههههههههههه .. الرقم اللي ملاصق ل .. .إحم إحم .. إنت متخيل ؟! … متخيل إنك رضيت إنك يتم تجاهل ( قدراتك الفردية المميزة اللي ربنا خلقها فيك ) يتم تجاهل ( إختلافك ) .. يتم تجاهل ( نقاط ضعفك و نقاط قوتك ) .. … و علي مدار عمرك .. بيتم زرع ال ( دونية ) جواك … لدرجة إنك تبقي عامل زي قطط الشوارع اللي من كتر ما شافت ظلم و ألم .. بتخاف و تطلع تجري .. حتي لو قدمت لها أكل أو حبيت تساعدها أو تلاعبها ؟ .. … … سامح نفسك .. … و إبدأ إتعلم إزاي تكون إنت مدير نفسك .. و لكن البوست طول زيادة عن اللزوم .. حابقي أشرح إزاي تكون (مدير نفسك ) ده فبوست تاني غالباً إن شاء الله . … … و الله أعلم .