أول فلوس أقبضها بالدولار في حياتي كانوا 400 دولار سنة

أول فلوس أقبضها بالدولار في حياتي كانوا 400 دولار سنة 2015 .. مقابل شغلانة ترجمة مع الأمم المتحدة .. كان أيام ما كنت لسة بابني شركتي لأول مرة و لسة مافيش عائد يُذكر منها .. و مخلص جيش من كام شهر .. و دماغي كانت مغسولة بالكامل من كل المعلومات اللي درستها قبل الجيش .. و مش فاضل فيها غير شوية الروايات الإنجليزي اللي كنت باقراها في الجيش . فعملت شوية سيرش علي شغل الترجمة الحر علي الإنترنت .. و ظهر ليا موقع ( proz.com ) و بعد شوية سيرش لمدة كام ساعة .. ربنا رزقني بشغلانة ترجمة فيديو مدته ساعة لمقابلة مع عائلة من سوريا طالبة لجوء في دولة أوروبية .. و كان مطلوب إني أترجم كلامهم و أحطه علي فيديو المقابلة ك (subtitles ) .. ماكنتش أعرف أى شيء عن إزاي أساساً أعمل (subtitles ) لفيديو .. ولا أسعر خدمتي دي مقابل كام .. ولا أى شيء .. كل اللي كنت أعرفه في الوقت ده هو ( إني باعرف أتكلم إنجليزي زي العربي ) .. خلال كام ساعة إتعلمت إزاي أعمل (subtitles ) .. و إتعلمت أقدم عرض سعر مناسب إزاي .. و قدمت عرض علي الشغلانة .. و بفضل الله إتقبلت . عملت الشغلانة في اليوم اللي بعدها بالكامل .. قدمت الشغل .. إتقبل .. و طلبوا مني (invoice ) فيه تفاصيل الطريقة اللي أحب أتحاسب بيها .. ماكنتش أعرف يعني إيه (invoice ) !! .. عملت سيرش .. عرفت و فهمت إنه زي إيصال باقدمه لهم عشان يحاسبوني .. صممته بسرعة علي ال( وورد ) .. بس ماكنش عندي حساب بنك وقتها ( لا مصري , ولا دولاري , ولا حتي صومالي ) .. بعت لهم إيميل ( ينفع تبعتوا ليا شيك في البريد ؟! ) .. ردوا إنه تمام ينفع طالما ده اللي أنا عايزه .. .. الشيك وصلني بعدها بعشر أيام تقريباً .. إتضح إنه علي بنك كل فروعه في إسكندرية قفلت … ما عدا فرع واحد في الأزاريطة .. رحت أحاول أصرفه من هناك .. قال لي إنه ماينفعش يصرفه كاش .. ولازم يكون عندي حساب بنك .. كلمت صديق ليا كان بيشتغل في بنك (cib ) في الوقت ده .. إستلم هو الشيك علي حسابه عن طريق لفة أخدت وقت 4 أسابيع .. و بعد 6 أسابيع من إتمام الشغلانة .. إستلمت ال400 دولار .. مصري 😅 … … أول كام شغلانة عملتهم علي ( upwork) سنة 2016 .. ماقبضتش فلوسهم غير بعد لفة طويلة عن طريق كرت ( easypay ) بتاع البريد .. الكلام ده قبل ما أعمل حساب بنكي برضو .. .. أول مرة رحت أعمل حساب بنكي بعد ما بقي معايا فلوس كفاية إني أعمل حساب بنكي .. إترفضت 5 أو 6 مرات تقريباً .. لأن ماكنش في أى ورقة تثبت مصدر الفلوس بتاعتي .. و مهما حاولت إني أوري البنك إيميلات من عملاء إشتغلت معاهم .. أو إثباتات من (upwork ) .. ماقتنعوش .. .. و ماقتنعوش غير لما جبت لهم ما يثبت إن ليا مصدر دخل مصري .. مختوم بختم مصري 🙂 . … أول مرة عملت تحويلات من (paypal ) لحسابي في البنك .. قضيت شهر مشاوير شبه يومية تقريباً عشان أشرح للبنك هو إيه (paypal ) و علاقتي بيهم إيه 🙂 . … … أنا ممكن أكتب أمثلة أكتر و أكتر عن حاجات زي كده .. و لكن خلاصة اللي عايز أقوله هو : 1- إني علي مدار سنين شغلي .. ماشفتش حد له فلوس في مكان ما .. و ماعرفش يوصل لهم .. 2- إني علي مدار سنين شغلي .. ماشفتش حد عايز يشتغل شغلانة فعلاً .. و ماعرفش يقبض تمنها .. .. لكن شفت كتير جداً بيخاف و يهرب .. لمجرد إنه سمع إشاعات أو كلام .. ممكن جداً يكون ماينطبقش عليه هو شخصياً .. و لكن الدوشة خوفته . … … مش معني كلامي إن مافيش مشاكل . .أو إن المشاكل دي كلها مجرد إشاعات .. إطلااااااقاً .. .. و لكن كلامي هو .. عايز تشتغل .. إشتغل .. و لما يبقي لك فلوس مش عارف تقبضها .. قول .. حتلاقي ألف حد يساعدك .. .. عايز تدفع و تشتري حاجات أونلاين ؟ .. في عشرات الطرق و الوسائل .. أنا ماعرفهمش كلهم أكيد .. و لكن الفيس ما شاء الله خلال الساعات اللي فاتت بقي مليان بوستات تشرح طرق و وسائل تمشي بيها شغلك .. .. لكن رجاء … رجااااااااااااااء … بلاش تزيط من غير ما يكون عندك مشكلة حقيقية .. و بلاش تسمع لزياط فتخاف و تبطل شغل .. أو تخاف إنك تدور علي شغل أساساً .. … الزياط مش بيفيد أى حد .. إطلاقاً .. … … أنا بقالي فترة طويلة مش باكتب فأى شيء له علاقة بالشغل و البيزنس و الفلوس و الهري ده .. لأني لو كتبت أى شيء حالياً حابقي باضيع وقت اللي بيقرا قبل وقتي شخصياً .. أنا بقالي فترة طويلة مش شغال حر .. فبالتالي مش متابع أى تفاصيل عن العالم ده .. أنا أسست شركتي في الإمارات من سنتين تقريباً .. و مع ذلك ماقدرش أنصح أى حد ياخد خطوة زي دي .. إلا بعد دراسة كاملة و وافية لكل تفاصيل شغله و ميزانياته .. .. عند وضع معين .. بيبقي ( زياط ) إني أكتب بوستات عامة ماتنطبقش علي الكل .. و الزياط ده بيسبب دوشة و لغوشة .. مش حتإذي اللي بيكتبها .. و لكن حتإذي ناس كتير و تشتتهم .. … … الخلاصة : إشتغل .. و لما تعطل .. قول عطلت .. لكن ماتزيطش في الزيطة لمجرد الزياط و خلاص .. .. و الله أعلم .