ليه بنقول (خير اللهم أجعله خير ) فأى مناسبة فرح

ليه بنقول (خير اللهم أجعله خير ) فأى مناسبة فرح ؟!!!!!!!!!!!!! … هات كٌراسة نضيفة مخصوص .. و أربع أقلام ( أسود , أزرق , أحمر , أخضر ) .. و سمّيها : خريطة مشاعري . … التمرين التالي ده .. مخصوص للناس اللي زيي ( ال ADHD ) .. و لكنه ينفع برضو مع الناس العادية ال ( Neurotypical ) . .. لو إنت ( ADHD ) .. ماتبتديش سخن .. يعني مش من أول يوم تعمل التمرين بصورته الكاملة و النهائية .. لأنك ( و أكيد إنت عارف ده عن نفسك دلوقتي ) مش حتكمّل .. و بعد كام صفحة .. حتنسي الكراسة و الأقلام .. و حتنساني أنا شخصياً 🤣 .. … إبتدي التمرين كالتالي .. … علي مدار أول أسبوع تقريباً .. كل يوم بالليل .. بالقلم الأسود .. حتكتب في صفحة ( دي المشاعر اللي حسيت بيها النهاردة ) .. و في الصفحة المقابلة حتكتب ( دي المشاعر اللي عايز أحس بيها بكرة ) .. … يعني مثلاً : النهاردة الجمعة .. و حتي الآن من ساعة ما صحيت من النوم .. دي بعض المشاعر اللي أنا حسيت بيها : . -الساعة 12.30 : متضايق من نفسي : بنسبة 10 من 10 : لأني صحيت في نصف الخطبة و نزلت جري لحقت الصلاة قبل الإقامة مباشرة بفضل الله .

• الساعة 1.30 : متضايق من نفسي : بنسبة 6 من 10 : لأني قاعد بافتكر كم ضخم من المهام و التاسكات اللي المفروض إني أعملها .. بالرغم من إدراكي إن أغلبهم مش مهام إجبارية عليا ..
• الساعة 2.30 : حاسس بشوية حماس : بنسبة 6 من 10 : لأن في كذا فكرة جديدة دخلت دماغي خلال ال48 ساعة اللي فاتوا .. و حاسس بحماس ضخم إني أبتدي شغل و ريسيرش عليهم .
• الساعة 3.00 : حاسس بخمول شديد و ضباب : بنسبة 7 من 10 : لأني لسة مخلص أكل بيتزا .. و ده طبيعي .
• الساعة 4.00 : حاسس بشوية سعادة : بنسبة 6 من 10 : لأن الدنيا سقعة و بتشتي من إمبارح أخيراً 😆 . لو لاحظت .. حتلاقيني باكتب التوقيت .. و بعدين الإحساس .. و بعده النسبة الرقمية التقريبية .. و بعدها السبب . . و لكن .. لو حتبتدي إنت التمرين ده .. مش عايزك تبتدي بالصورة دي .. و لكن إبتدي بإنك بتكتب الأحاسيس فقط .. و إستمر علي ده لمدة أسبوع . . و بعد كده .. إكتب السبب .. و إستمر علي ( الإحساس + السبب ) لمدة أسبوع كمان . . و بعد كده في الأسبوع التالت .. إبتدي بالصورة الرباعية دي ( وقت + إحساس + نسبة شدة + سبب ) . … و بعد ما تخلص الصفحة دي .. في الصفحة اللي قٌدامها .. حتكتب : المشاعر اللي عايز أحس بيها بكرة . … لاحظ هنا إني مش باقول إكتب ( TO DO LIST ) .. لأ .. أنا باقول إكتب ( مشاعر ) .. لمدة أسبوعين . و بعدين في الأسبوع التالت .. إبدأ إكتب الأسباب ( التاسكات ) اللي جنب المشاعر دي .. . يعني مثلاً ( الصورة الرٌباعية : وقت + إحساس + نسبة + سبب ) : أنا بكرة الساعة 2.00 ظهراً عايز أحس إني نشيط .. بنسبة 8 من 10 .. عشان أشتغل علي مشروع محتاج مجهود كبير مني . .. لكن إنت إبتدي ب : أنا بكرة عايز أحس ب : نشاط . سعادة . هدوء نفسي . إطمئنان . … و هكذا. … في الأسبوع الرابع : الكراسة دي المفروض تبقي ملازماك طول الوقت .. و كل 30 دقيقة مثلاً .. حتسأل نفسك :
• هو أنا دلوقتي حاسس بإيه ؟! .. و ليه ؟! . و تكتب الإحساس ده . … ملحوظة مهمة جداً : التمرين ده .. مهم جداً جداً جداً تعمله بالورقة و القلم .. ماتعملش فيها توني ستارك و تقول أنا حاعمله علي الموبايل .. أو بإستخدام أي أبليكيشن أو حتي سمارت ووتش أو الهري ده كله .. ليه ؟! . لأن الكتابة بإيدك نشاط بطيء .. بيجبر عقلك إنه يخرّج الأفكار بشكل متسلسل متتالي مش متوازي .. يعني إيه ؟! . يعني ( و الأرقام فقط للمثال و ليست حقيقية ) .. الإنسان الطبيعي ( ال Neurotypical ) بيفكر مثلاً في 10 أفكار في الثانية الواحدة .. أما الإنسان ال (Neurodivergent ) زيي .. بيفكر في 100 فكرة في الثانية الواحدة .. . فبالتالي .. أى وسيلة تكنولوجية تسرّع إنك تخرّج الأفكار ( المشاعر ) دي من نافوخك .. بتؤدي إنك ( توصفها غلط ) .. . لكن لما بتكتب بإيدك .. بتضطر تقف لمدة لحظات أطول قٌدّام كل ( فكرة - شعور ) في عقلك .. و تحاول توصفه بشكل أدق . . و ده مهم جداً جداً جداً . … يعني إيه ال( توصيف ) ده ؟! . يعني .. نفس الفرق بين علبة الألوان ال 6 ألوان ( أحمر , أخضر , أزرق , أصفر , أسود , بني ) .. و بين علبة الألوان ال 24 لون مثلاً ( بنفسجي , بمبي , فوشيا , رصاصي , برتقاني , … ) و بين علبة الألوان ال 56 لون بقي 🤣 ( فحلقي , زمردي , بتنجاني , أسود مصفرّ .. أو أصفر مسودّ 🤣 ) .. … شعور زي مثلاً : أنا متضايق . . ده كإنك قلت ( لون أزرق ) مثلاً .. لكن لو إكتفيت ب الكلمة دي بس ( لون أزرق ) .. حتكتشف إنك بتعمي نفسك عن عالم ضخم من درجات الأزرق .. اللي كل واحد منهم بيسمح لك ترسم صورة أدق بكتير جداً .. و تشوف تفاصيل كتيييييييير .. كنت حتبقي أعمي عنها .. لو ماكنتش فرّقت بين الدرجات دي . . اللي ال( بحر ) و ال(سما ) بالنسبة له نفس اللون .. مش حيشوف لا بحر ولا سما .. غير لما يفهم يفرّق في وصف اللون . . نفس الشيء .. لو إنت ( متضايق ) بسبب ماتش أهلي و زمالك مثلاً .. و نفس الشعور ( بنفس وصفه ) بينطبق علي مشكلة في بيتك مع أهلك .. حتبقي أعمي .. و مش حتشوف تفاصيل كتير مهمة جداً جداً جداً .. . لازم تتعلّم توصف التفاصيل دي صح .. عشان لما تحب بعد كده تتحكم في مشاعرك .. تعرف توصل لها صح . … بعد 50 يوم من تكرار التمرين ده .. حتشوف ( pattern - صورة متكررة ) .. مثلاً : حتشوف تسلسل من المشاعر دايماً بيحصل ورا بعضه .. و مرتبط ب وقت معين خلال اليوم مثلاً .. أو مرتبط بحدث متكرر .. . تسلسل مشهور متكرر عند ناس كتير زي مثلاً : ( سعادة , نشاط , حزن , توتر , خوف , خمول , هدوء ) . . التسلسل ده متكرر عند ناس كتير جداً .. بسبب إنه أغلب الناس حالياً لو ماتعلمتش تتحكم في مشاعرها بنفسها .. ده هو التسلسل الكيميائي المٌعتاد للعقل البشري ك رد فعل علي الحياة . . لأى سبب لما بتحس ب ( سعادة ) خلال اليوم .. ده بيؤدي في عقلك ل نشاط مفاجيء .. تحس معاه إنك عايز تفرتك الفراتيك 🤣 و تهد الجبال .. بيعقب النشاط ده مباشرة إصطدام بالواقع .. بيؤدي ل حزن .. . عقلك لما بينزل من مستوي الدوبامين و الأوكسيتوسين العالي ( بتاع السعادة ) .. لمستوي طبيعي .. بيتترجم في عقلك مباشرة بشكل خاطئ إن ده ( حزن ) .. ( زي لما تدوق جوافة بعد تشيز كيك لوتس كراميل 🤣 .. حتحس إن الجوافة عادبة ) .. . الحزن ده لازم يعقبه ( توتر - Anxiety ) .. لأنك بتبقي متضايق إنك فجأة حزنت ..و مش عارف من إيه .. الحزن أو الخوف اللي مالهومش أسباب في عقل الإنسان .. بيؤدوا ل ( توتر ) . ف عقلك بيدور علي أي سبب يبرر ال( توتر ) ده .. لحد ما تلاقي .. فيتحول في عقلك ل ( خوف ) . . و بعد صراع ( غالباً فاشل ) مع الخوف ده .. بتتخدّر ( بعد ما جسمك يفرز كورتيزول و أدرينالين ) .. و تحس ب ( تبلّد و خمول ) . . و بعد شوية من التبلد و الخمول دول .. بتوصل تاني لمرحلة التعادل بتاعت ال ( هدوء ) . … التسلسل المشهور اللي فات ده .. هو أحد أشهر أسباب الجملة المصرية الأصيلة جداً ( خير اللهم أجعله خير ) اللي بتتقال في أى مناسبة فرح 😅 . … البوست طوّل جداً .. نكمل في بوست لاحق إن شاء الله . . و الله أعلم .