أكيد عندك صاحب أو قريب أو حد تعرفه من النوعية

أكيد عندك صاحب أو قريب أو حد تعرفه من النوعية دي 🥹 .. اللي هو تحس إنك قاعد مع الممثلة القديرة أمينة رزق الله يرحمها و هي بتقوم ب دور أم مكلومة مات لها أربع عيال في حادثة تصادم بنانا مع جيت سكي .. بعد عاشت طول عمرها عانس بدون زواج عشان عندها مشكلة و مابتخلفش .. و لابسة أسود حزناً علي شريك حياتها لمدة 60 سنة اللي كان بيقوم ب دوره مثلاً ( رضا كله رايح من مسلسل الوصية ) بعد ما قلبه وقف فجأة من الخضة لما عربية كلكست له بصوت عالي عشان كان رافع حصان عالموتوسيكل عالدائري عكس .. … طول الوقت حزن و شكوي و غضب من كل شيء و أى حد .. اللي هو تخاف تفرح جنبه أو يجيلك خبر حلو و إنت قاعد معاه مثلاً .. لأنك بشكل تلقائي بتلاقيه بص لك بنظرة خاوية .. و بعدين هو مش بيبص في عينيك .. لا .. هو دايماً بتلاقيه بيبص فوق كتفك الشمال !!! اللي هو ياسطي أنا عينيا فوق مناخيري والله العظيم .. لكن لا .. هو لو بص في عينيك مش حيستحمل ضغط المشاعر و حيعيط .. و هو مش عايز يضايق حد 🥹 .. ف هو بيسهّم بعينيه بعيد كده فوق كتفك الشمال .. و يتنهد تنهيدة حارة … و يقول لك بصوت مخنوق بالدموع .. ” ألف مبروك يا صاحبي .. فرحت لك .. يا رب تدوم لك و مايحصلكش زي ما حصل معايا ” . و عند اللحظة دي إنت لازم تجري .. تهربببببب … و إلا كل الطرق حتؤدي إنه يسألك : ” هو إنت ماتعرفش إيه اللي حصل معايا لما جالي نفس الخبر الجميل اللي جالك دلوقتي ده ؟! ” و بعدين يبدأ في سرد قصة حزايني نهايتها المنطقية الوحيدة هي إنكوا تطلبوا من القهوجي طقم إمواس حلاقة مٌستخدم من مصحّة أمراض مٌستعصية عشان تقطّعوا شرايينكوا سمبوكسات . … لو تظن إني ببالغ .. لو تظن إني ” مأفور ” في الكوميديا .. فأحب أقول لك إن الحقيقة أبشع و أقسي .. بكتير جداً .. عارف ليه ؟! لأن الشخصية دي .. مش صاحبك .. مش قريبك .. مش حد تعرف تهرب منه .. و لكن صوت مستمر 24 ساعة جوّة عقلك .. خصووووووووصاً .. لو إنت ( ADHD ) .. … أحد أكبر أوصاف الشخصيات اللي زي دي في الحياة حوالينا .. هو إنهم مابيعرفوش يعيشوا اللحظة إطلاقاً .. مابيعرفوش يركزوا علي أياً كان ال ( ممتع , مثير , مريح , … ) اللي ممكن يكون حواليهم .. و لكن .. عقلهم طول الوقت إنتباهه مٌشتت .. و بعدين التشتت ده .. دائماً و أبداً تدريجياً .. بينجذب في إتجاه واحد فقط .. هو : الإتجاه السلبي . .. إتخيّل مثلاً سيراميك أرضية حمام عاملها صنايعي بيفهم .. مهما إتغرقت مياه كتير جداً .. سيبها لوحدها شوية .. حتلاقيها كلها بتتحرك في إتجاه البلاعة . … فعقلنا بقي .. البلاعة دي إسمها ( Default Emotional and mental state ) أو بالعربي ( الحالة المٌعتادة للعواطف و الأفكار ) . … و بالنسبة للشخص ال ( ADHD ) بالذات .. الموضوع مش مٌجرد بلاعة .. لا .. ده إتخيل بقي الشفّاط اللي في شباك الحمام بعد ما خدت دٌش سخن و الحمام مليان بٌخار 🤣 . مجرد ما بتشغّل الشفاط .. فجأة بتشوف كل البخار ده بيتحرك بقوة و يتشفط .. . طيب ليه ؟! لأن الإنسان ال(ADHD) ماعندوش ذاكرة قصيرة المدي تساعده ينسي .. إيه الجملة العجيبة دي ؟! .. إزاي الذاكرة بتساعدني إني أنسي ؟! . … الذاكرة قصيرة المدي عند الإنسان العادي .. بتتملي بذكريات الحياة العادية اليومية .. بيبقي فيها تفاصيل الشغل اللي عليك الأسبوع ده , المشاوير اللي إنت محتاج تخلصها , الحاجات اللي لازم تعملها في البيت , الأفلام و المسلسلات و المباريات اللي عايز تتفرج عليها , … و حاجات تانية كتيييييييييييييييير جداً .. بتقدر إنك تركز عليها … ف تنسي .. . تنسي اللي حصل من سنتين .. تنسي اللي حصل من 5 سنين .. تنسي اللي حصل من 20 سنة .. تنسي ذكريات حياة كاملة فيها الحلو و الوحش .. و بتبقي مش عايش طول الوقت قاعد تفكّر فيها و مركّز عليها . … لكن .. الإنسان ال( ADHD) .. عقله مافيهوش ذاكرة قصيرة المدي تقريباً .. و من لحظة ولادته .. و هو شغّال بالذاكرة طويلة المدي فقط .. بيعبّي فيها .. و بيسترجع منها .. و عايش جواها طول الوقت .. . و النتيجة ؟! هي إن تفاصيل الشغل المهم النهاردة بتبقي محشورة جنب تفاصيل ذكريات حاجات حصلت من 15 سنة مثلاً !! .. و إن الحاجات اللي إنت محتاج تفتكر تروح تشتريها من البقالة .. بتبقي مستخبية تحت ذكريات طفولتك !! .. . يعني حتي لما بتيجي تحاسب سواق الميكروباص .. بتلاقي نفسك متوتر و متلخبط و مش عارف تجمع و تطرح .. و بتلاقي نفسك بتفتكر مشاعر حصلت من 25 سنة لما كنت بتتلخبط في جدول ضرب الواحد !!! . … و عقل الإنسان بيسجّل الذكريات بألوان المشاعر .. إقرأ الجملة دي تاني … لأنها مهمة .. عقل الإنسان … بيسجّل الذكريات … بألوان المشاعر .. . يعني إيه ؟! . يعني إتخيل المشاعر كأن لها ألوان .. الإطمئنان و الهدوء مثلاً أخضر .. الخوف أزرق .. السعادة برتقاني .. الحزن بنّي .. الغضب أسود .. و السعادة أصفر .. .. عقلك بقي .. مش بيسجّل كل لحظة بتعدي عليك في الحياة بنفس الوضوح ( إلا كان عندك حاجة إسمها Eidetic memory لا قدّر الله ) . . و لكنه كإنه بيستخدم قلم رصاص باهت أغلب الوقت .. و بعدين لما بتستخدم مشاعرك .. و علي حسب حدة المشاعر دي .. بتتلون الذكريات .. . و كل ما ترجع تفتكر الذكريات دي بنفس المشاعر .. بتلونها زيادة .. و زيادة .. و زيادة .. .. و مهما .. مهما إختلفت أفكارك بعد كده عن الذكريات دي .. بتكتشف إنك صعب جداً تغير لونها فجأة .. … يعني إيه مثلاً ؟! . يعني .. إتخيل مثلاً إن طول عمرك كنت بتكره شخص معين .. لأنك فاكر له موقف .. الموقف ده حصل زمااااااااااان .. و كل ما ترجع تفتكر الموقف .. بتفتكر كرهك للشخص ده .. ف كإنك كل شوية بترجع لنفس الرسمة .. و تعيد عليها بنفس الألوان .. لحد ما بتبقي واضحة جداً .. و زاهية جداً في عقلك . . لكن .. بعد سنين طويلة .. بتكتشف إنك كنت فاهم غلط .. أو ماكنتش عارف إن الشخص اللي عمل حاجة ضايقتك .. كان في الأساس بيساعدك مثلاً .. مهما حاولت .. مهما عقلك إقتنع .. بتلاقي إن لسة جوّاك مش قادر تنسي مشاعرك برضو !!! . . و بتحتاج وقت .. طويل .. لحد ما مشاعرك دي بتتغير .. … و بالنسبة بقي للإنسان ال (adhd ) .. و لأنه طول الوقت عايش في ذاكرته طويلة المدي .. ف هو طول الوقت عايش بين عدد ضخم من الذكريات الزاهية جداً جداً جداً في ألوانها .. ذكريات حصل من عشرات السنين يمكن .. لكن .. لأنك قاعد عايش فوسطها طول الوقت .. ف هي بالنسبة لك قوية جداً .. واضحة جداً .. . و بدون أى وعي منك .. طول الوقت الذكريات دي .. بتحرّك مشاعرك .. و توجّه أفكارك ناحيتها .. . و تبقي إنت عايش في الحياة طول الوقت لابس نضّارة ملونة .. و متخيل إن الألوان اللي إنت شايفها دي حقيقية .. بتحاول تعيش طبيعي بين الناس .. و مستغرب الناس متضايقين ليه من وجودك .. فنضارتك تتلون ألوان غلط .. زيادة … و هكذا .. وهكذا .. وهكذا . … ده هو سبب إن الصندوق الخامس في نظام ال 6 صناديق إسمه : ( Reflection and analysis = أو بالعربي الحلمنتيشي .. صندوق أمينة رزق 😅) و وظيفته الأولي هي إنك تكون مدرك و واعي إنك طول الوقت عايش بنضارة ملونة غلط .. و بعدين بتبدأ جواه تتعلم إزاي تقلع النضارة الغلط دي .. و تلبس نضارة مختلفة .. تصحح النظر .. تصحح الألوان .. … و إزاي بقي بتشتغل جوة الصندوق ده .. ف ده له تدريبات كتير كنت شرحت واحد منهم من فترة .. حاسيب رابط البوست الخاص بيه في التعليق الأول إن شاء الله . … و حاكمّل في البوستات القادمة تفاصيل الصندوق السادس .. و بعدين شرح كامل لكيفية إستخدام ال6 صناديق بأمثلة محلولة إن شاء الله 😅 . … و الله أعلم .