في أسطورة بتقول
يعني إيه ؟!
في أسطورة بتقول :
( عايز تنام مستريح .. و نوم عميق .. سيب الموبايل برّة الأوضة . )
.
ده بالظبط كإني باقول لك مثلاً :
عايز تبقي قوي و تكسب بطل العالم في الملاكمة .. روح الجيم شيل حديد . 🤣🤣🤣 ..
.
اللي هو أنا ماكدبتش .. لكن في طريق طويييييييييييييييييييييييييييل بين البداية دي و النهاية دي .. و خطوات كتيييييييييييييير جداً .. و لو ماتعلمتش الطريق و الخطوات .. و روحت الجيم شيلت شوية حديد .. و بعدين طلعت علي ماتش بطولة العالم مباشرة .. حتت$@^@ .
.
يعني إيه ؟!
.
بالنسبة لل عقل ال ( ADHD ) خصوصاً .. ( التوتر - Anxiety ) هو أكبر عدو للنوم .
و أحد أشهر تعريفات التوتر هو : الخوف من الغير معروف .
اللي هو تلاقي واحد قاعد بيهز رجله طول الوقت .. و بيقرقض ضوافره .. و شكله متوتر ..
تسأله ( مالك ؟! ) .. يقول لك ( ماعرفش ) ..
.
و ده حقيقي فعلاً .. هو بيكون ( خايف ) .. و لكنه مش عارف هو خايف من إيه .. أو بمعني أدق :
هو بيكون مش محدد حاجة واحدة خايف منها ..
لأن ( زي ما شرحت في بوستات كتيييييييير جداً قبل كده ) .. أكبر مشاكل ال ( adhd ) هي الذاكرة قصيرة المدي ..
فبالتالي ..
في كم ضخم من الحاجات اللي هو حاسس إنه المفروض يكون فاكرها ..
أو بيحاول يفتكرها و مش عارف ..
أو بيحاول يركز في حاجة واحدة منها و مش عارف ..
و بعد سنين طويلة من الحياة دي .. بيتربّي جواه رد فعل مباشر دايماً بالخوف .. إنه يكون ناسي حاجة مهمة مثلاً .
.
و كل ده بيؤدي ل ( Anxiety Disorder = إضطراب توتر ) .. أحد أشهر الإضطرابات اللي بيؤدي لها ال ADHD .
.
فبالتالي ..
لما تيجي لحد ( adhd ) .. و يشتكي لك من مشاكل في نومه .. و تقول له :
سيب موبايلك برّة الأوضة ..
.
ده معناه إنك بتقول له :
خلّي عقلك طول الوقت بيتسائل زيادة : يا تري يا هل تري ؟!!!
يا تري في رسائل جات ؟!
يا تري في نوتيفيكشنز و إشعارات ؟!
يا تري حد بيتصل و أنا مش سامع ؟!
يا تري في أخبار حصلت ؟! .. زلازل ؟! براكين ؟! .. في إعصار في البلكونة ؟!
.
ف تلاقيه أصبح بيتوتر زيادة ..
بيتوتر لدرجة الإنهاك ..
ف عقلك بيختار أى حاجة من آلاف الحاجات اللي فعقلك ..
و يركز عليها عشان يلاقي تفسير للتوتر ده .. و يحوله ل خوف ..
و يركز علي الخوف ده أوي … جداً .. .
اللي هو فعلاً ممكن يبدأ ينهج و يعرق و يتعصّب ( الأدرينالين بيتفرز ) ..
ال ( أدرينالين ) ده إسمه ( Fight or flight hormone ) .. يعني الهورمون المسئول إنك يا تطلع تجري من الخطر .. يا تتعارك معاه 😅 .
.
ف بيشد عضلاتك .. و يحفزّك جداً .. و يخليك فايق أوي .. و كل حواسك بتبقي يقظة جداً جداً ( اللي هو إنت حتحارب دلوقتي ) .
.
كل ده … أثناء ما إنت المفروض تنام 🤣🤣🤣
…
طيب .. ده معناه إيه ؟! ..
معناه إن إحنا ك (ADHD ) مكتوب علينا نعيش مٌلاصقين للموبايلات يعني ؟!
..
إطلاقاً .. و لكن .. عشان نوصل لمرحلة إننا فعلاً نقدر نسيب الموبايل برّة الأوضة .. و ننام بأريحية ..
لازم يكون عن طريق خطوات .. و رحلة كاملة .. بتبتدي ب : الفهم .
.
إنك تفهم إزاي توصّل عقلك لمرحلة الأمان ( و إنه يبطّل أسئلة ) اللي يقدر فيها ينام ..
.
بالظبط زي الطفل الصغير اللي طول الوقت بيعيط و مش عارف ينام لأنه خايف من الوحوش اللي جوّة الدولاب أو تحت السرير ..
.
بتعمل معاه إيه ؟!
بتفتح الدولاب ؟! .. بتنزّله تحت السرير ؟! .. بتزعّق له إنه يتخمد ؟! 🤣
…
الإجابة هي :
بتدّي لعقله حاجة يركز عليها غير : خوفه ..
حاجة رتيبة .. مملة .. متكررة ..
إيه بقي هي الحاجة دي ؟! .. و إيه اللي أنا شخصياً باستخدمه بقالي سنين ؟!
.
حاشرح ده في البوست القادم عن الموضوع ده إن شاء الله ..
و اللي حاشرح فيه عن تاني أشهر أساطير النوم بالنسبة لنا :
و هي :
قصص قبل النوم بتنوّم 🙂🙃 …
.
و الحقيقة إن إطلاااااااااااااااااقاً ده مش حقيقي ..
أسوأ حاجة تحاول تنيّم بيها حد (ADHD) .. هو إنك تحكي له قصة ..
.
بس كفاية كدة دلوقتي .. و تصبح علي خير 😅 .. و الله أعلم …
.
*** سبب إني بدأت أكتب فجأة دلوقتي عن الموضوع ده ..
هو إن فمكالمات الأسبوع ده في ( ASP ) إتكرر كذا مرة موضوع ( مشاكل النوم و الصحيان ) .. و شرحت حاجات كتير من اللي إتعلمتها عن الموضوع ده علي مدار السنين .. ححاول أكتب بعضها سريعاً هنا .. بحيث إني لما أحتاج أعيد الكلام في الموضوع ده بعد كده فمكالمات أخري مثلاً .. أشيّر البوستات دي مباشرة .