و إنت راجع بالليل بعد ماتش مصر و السنغال الأربع

و إنت راجع بالليل بعد ماتش مصر و السنغال الأربع الجاي إن شاء الله .. طلع عليك 4 سرسجية يثبتّوك .. 3 وقفوا قٌدّامك .. و واحد وقف علي جنب و بدأ يسرد .. يحكي .. يرغي .. يكتب بوستات طويلة زيي يعني 🤣 و قال لك : إحنا حنسيبك تعدّي لكن بشرط .. التلاتة اللي واقفين قٌدّامك دول ..

• واحد منهم إبن ناس عمره ما بيكدب أبداً .. مهما حصل ..
• واحد منهم الكدب بيجري في عروقه بدل الدم .. و أى سؤال حتسأله مهما كان هو إيه .. حيكدب ..
• و واحد منهم ضرب مٌخدرات لحد ما أتعمي 🤣 و مش عارف هو فين أساساً دلوقتي .. و أى سؤال تسأله .. حيجاوبك عشوائي تماماً . . و التلاتة دول أساساً مش من هنا .. و بيتكلموا لغة إنت ماتعرفهاش .. و بيقولوا بدل ( صح , غلط ) مثلاً (كاني , ماني ) … فبالتالي إنت ماتعرفش أنهي في الكلمتين دول معناها ( صح ) .. و أنهي ( غلط ) . و ليك يا برنس 3 أسئلة بس تسألهم .. و ماتجودش من عندك و إلا حيغزّوك .. الأسئلة شرطها إنها تكون يتجاوب عليها ب ( صح أو غلط ) بس .. يعني ماتسألش مثلاً ( بتحب ماما ولّا بابا أكتر ) … فاهم ؟! الأسئلة لازم يكون ينفع إجابتها فقط ب ( صح ) أو ( غلط ) . . و بعد ال3 أسئلة دول .. تشاور لي علي مين فيهم يبقي مين .. مين إبن الناس اللي عمره ما بيكدب ؟! .. مين الكدّاب الحقير الواطي ؟! .. مين اللي ضارب مٌخدّرات و معمي و شكله شوية و حيغزّنا إحنا أساساً ؟! .. … الفزّورة دي مشهوووووووورة جداً جداً .. و إسمها : ( أصعب لغز منطقي علي الإطلاق = the hardest logic puzzle ever ) .. و برضو مش حاحرق حلها في البوست .. حاستني شوية قبل ما أكتبه في التعليقات إن شاء الله .. و عشان تعرف ليه المهندسين زي حالاتي بيعنصروا علي باقي خلق الله 🤣 … فإحنا بندرس الفزّورة دي تقريباً في أولي كلية .. ضمن مادة ال ( منطق - Logic ) .. اللي هي أول حاجة بتبدأ تدرسها لو حتدرس برمجة علي نضيف 🤣 . … أول مرة عرفت عن الفزّورة دي .. كان بعد كام مٌحاضرة في المادة … بعد ما حسّيت إني ( غبي جداً , بطيء جداً , جاهل جداً جداً جداً ) .. و إن عندي كم كبير جداً من الأسئلة مش قادر أسأله في مٌدرّج فيه 500 طالب و طالبة تقريباً .. ف كنت بارجع من الكلية أعيش في السايبر ( سنة 2007 الكلام ده 😅 ) .. أدور علي كتب فيها إجابات عن أسألتي . و كان أحد أكبر الأسئلة دي هو : هو أنا ذكي ؟! … كلية هندسة بالذات .. عندها قدرة غير طبيعية إنها تبرجلك .. تحطّم أى ( إيجو = غرور ) وهمي إتربّي عندك قبل ما تدخلها .. حرفياً بتمسكك من كمر البنطلون و تشدّك تنفضك و تقول لك بصوت ( يزن البريء من مسلسل ميدتيرم ) : أظبط نفسك ياض 🤣🤣🤣 . … و ده .. لأنك في الأغلب بتطلع من ثانوي عام .. فاكر نفسك أجمد تنين في الدرس .. في المدرسة .. في المنطقة .. في الشلّة .. في إصحابك .. . لكن لما بتدخل الكلية .. بتكتشف إن كل اللي قاعدين حواليك تنانين .. كلهم بينفخوا نار من بٌقّهم عادي و عندهم جناحات .. و قاعدين بيهووا بالجناحات دي علي نفسهم عشان الدنيا حر من كمية النار اللي قاعدة بتتنفخ 🤣 . . و عند المرحلة دي .. بتبدأ تكتشف إنك عادي جداً .. و فأحيان كتير كمان أقل من العادي بمراحل .. و بتتساءل نفس سؤالي ده : هو يعني إيه ذكاء أساساً ؟! . … و بعد سنين كتيييييييير بعد كده .. و حياتي مع كم كبير جداً من الكتب اللي بتتكلم عن الذكاء , علم النفس , علم الأعصاب , العلوم عموماً , و كل ما له علاقة بال (IQ , EQ, MBTI , و كل الحروف الكتير اللي لها إختبارات بكل شكل و لون دي ) .. . أقدر ألخص لك المفهوم اللي عندي عن ذكاء ( الحلول ) حالياً كالتالي :
• ذكاء تنفيذي .
• ذكاء إبداعي . . و قبل ما أشرح كل نوع منهم .. خليني أنبهك إني باتكلم عن ( ذكاء الحلول ) فقط .. يعني مش حاتكلم عن أنواع تانية كتيييييييييير من الذكاء كلها بنفس الأهمية .. زي ( ذكاء عاطفي , ذكاء إجتماعي , ذكاء جسدي , ذكاء نفسي , … ) و غيرهم .. و باقي الأنواع دي غالباً حاشرحها في البوست القادم إن شاء الله . … لكن بالنسبة لذكاء ( الحلول ) .. ف زي ما شرحت .. النوعين الأساسيين له هما :
• ذكاء تنفيذي . و النوعية دي من الناس .. بتبقي عندها ذاكرة عملية جبّارة … يقدر يفتكر كم ضخم من المعلومات المٌجردة في عقله لمدة طويلة من الزمن .. حتي لو المعلومات دي مافيش بينها علاقات إطلاقاً .. . النوعية دي من البشر .. رااااااااااااااااااااااااااائعين في الشطرنج مثلاً .. . الشطرنج ( في المستويات الإحترافية ) .. مش لعبة إبداع إطلاقاً .. و لكن لعبة ذاكرة بالنسبة الأكبر جداً .. . و أغلب لعيبة الشطرنج المشهورين و ال 10 الأوائل علي مستوي العالم .. بطّيخ في مجالات تانية كتيييييييير كلها بتتطلب أنواع ذكاء غير مٌعتمدة علي الذاكرة . . و الطريقة اللي الناس اللي من النوع ده بتمارس ذكاءها التنفيذي بيها .. بيكون : إنه بيستخدم ذاكرته في الإحتفاظ بأكبر قدر من السيناريوهات المٌحتملة بشكل مباشر لأى مسئلة معروضة عليه .. و بعدين بيحاول يحلها كلها في عقله بسرعة ضخمة .. لحد ما يوصل للحل السليم . . و ده أقرب بكتير لذكاء الكمبيوتر العادي . . و الناس دي في أغلب مجالات الحياة العملية علي مدار التاريخ .. بتبقي نجوم و جامدين أوي و بيتم الإحتفاء بيهم بشكل ضخم .. . لأن أغلب مجالات الحياة العملية علي مدار التاريخ .. مش محتاجة غير حلول مباشرة جداً .. و لكن بتبقي المشكلة دايماً في ( أنهي حل ينفع .. و ليه ) . … في بقي الناس التانيين .. أصحاب الذكاء ال ( إبداعي ) .. و دول ناس الذاكرة العملية ( Working memory ) بتاعتهم .. ضعييييفة جداً في إستقبال أى شيء مٌجرّد أو مباشر .. و لكن .. إيه سبب ضعفها ؟! . في الأغلب بيكون إنها ( مليانة زيادة عن اللزوم بحاجات كتيييييييييييييير عجيبة ) . . مش لأنها مش قادرة تحتفظ ب معلومات … لا … و لكن لأنها أغلب الوقت مشغولة . . ب إيه بقي ؟! . ب كل حاجة و أى حاجة .. ( ملمس و ريحة بلاستيكات قديمة مثلاً كان بيلعب بيها و هو طفل , معلومة عجيبة عن عادات الإرتباط الرومانسية في أحد قبائل أواسط أفريقيا , تخيلات دائمة عن ماذا لو كان العالم مش ثلاثي الأبعاد هندسياً .. و لكن ثنائي .. أو رباعي 🤣 , موسيقي , موسيقي رياضية , رياضة موسيقية , …) و كل حاجة ممكن يتخيلها .. بيتخيلها . . كإن جهازك متوصل ب إنترنت سرييييييييع جداً .. و بيعمل داونلود طول الوقت بسرعة تحميل ( 100 جيجا ) في الثانية مثلاً .. و لكن ذاكرته محدودة ( نفترض واحد تيرا ) .. و الداونلود شغّال بلا توقف .. لأى حاجة و كل حاجة .. و عشان كده أغلب النوعية دي من البشر بيكون عندهم ( adhd ) .. 🙂 . . الناس دول مش رائعين إطلاقاً في الشطرنج علي المستوي الإحترافي .. الناس دول مش رائعين إطلاقاً في أغلب مجالات الحياة علي المستوي الإحترافي .. الناس دول مش رائعين إطلاقاً في أى شيء يتطلب عمليات تكرارية ( iteration ) بتحتاج ذاكرة و إنتباه موجهين بشكل ثابت . . الناس دول أغلب الوقت متهمين إنهم ( كٌسالي , مهملين , فوضويين , … ). . و لكن .. لأن الناس دول طول الوقت شايفين عالم تاني بالكامل غير اللي حواليهم عايش فيه .. فأحياناً حاجة من اللي هما شايفينها دي .. بتبقي كنز مفهوم بالنسبة للي حواليهم .. و بيتم الإحتفاء بيهم ك ( مٌخترعين مبدعين و نجوم و … ) .. . و لكن .. في أغلب الأحيان التانية .. ده مابيحصلش 🥲 … الفزّورة اللي فأول البوست دي بقي .. مش بتاعت الناس اللي ( ذكاءهم تنفيذي ) .. يعني مش زي فزورة ال 12 كورة .. ( دي فزورة تنفيذية جداً ) .. و لكنها زي فزورة ال ( 100 سجين و الطواقي البيضا و السودا ) .. يعني بتحتاج حد .. قادر يتخيل عالم مختلف .. عالم .. مافيش فيه معني للصح و للغلط .. عالم .. مافيش فيه وسيلة مباشرة تعرف مين بيكدب و مين بيقول الحق .. و مين ضارب مخدرات لحد ما هو معني .. .. أو … ثانية واحدة !! .. ده مش عالم مختلف عن عالمنا إطلاقاً .. 🤣 صح ؟! . … و الله أعلم .