أحد أشهر القصص القصيرة المٌزعجة جداً هي

أحد أشهر القصص القصيرة المٌزعجة جداً هي : قصة العاهرة اللي مش عاهرة أوي يعني .. بس هي عاهرة برضو 😅 .. . القصة بإختصار كالتالي : راجل بيشوف ست جامدة أوي في مكان عام ( كافيه مثلاً ) .. بيروح و يعرض عليها إنها تقضّي الليلة معاه و حيكرمش لها 50 جنيه في إيدها .. الست بتزعّق له و تشتمه و تهزّأه و لسّة كانت حتقلع البوت الطويل بلا داعي لأن الدنيا ماكنتش بتشتي اليوم ده .. اللي في رجلها و تضربه بيه .. ف هو بيتأسّف بسرعة و يقول بلهجة مهذبة جداً .. ” أنا آسف حضرتك , ماكنتش أقصد إهانتك إطلاقاً … لو بس سمعتيني بهدوء .. كنت باقول : تسمحي تيجي تقضّي معايا الليلة النهاردة في أوضة نومي و سريري .. مقابل 50 مليون جنيه ؟ ” . و بيطلّع موبايله و يوريها إنه جاهز يأكّد تحويل إنستاباي حالاً . . الست بتتردد شوية .. و تبص حواليها .. و تمسك موبايله تتأكّد إن رصيده فعلاً يسمح بالتحويل .. و بعد شوية تفكير ( في حالها و حال الدنيا و الحياة الواقعية و مسئوليات الحياة و تمن العربية و الشقة و الآيفون و الفرابتشينو إكسترا فوم اللي هي بتشربه ) .. و بعدين تقول له ” موافقة ” . . الراجل بسرعة بيسحب موبايله .. و يغير قيمة التحويل ل ( 100 جنيه ) و يقول لها .. طيب 100 جنيه تمام ؟! .. و حاجيب لك زباين كتير علي فكرة .. و حاعمل عنّك ريفيو رائع 🤣.. . الست بترجع تحاول تقلع البوت الطويل بدون داعي عشان تضربه بيه .. و تغضب تاني .. و تزعّق و تقول : إنت بتهزّر ؟! .. إنت فاكرني إيه ؟! . . الراجل بكل هدوء بيرد عليها : يا فندم إحنا إتفقنا علي المبدأ .. و هو إن حضرتك مستعدة تبيعي .. إحنا دلوقتي بس بنفاصل في السعر . … القصة دي قرأتها فأماكن كتير جداً علي مدار حياتي .. . و هي الحاجة الوحيدة اللي حسّيت إني ممكن أكتبها .. عن كمية البوستات اللي إتكتبت علي مدار ال24 ساعة اللي فاتوا عن فرح بلوجرز التيكتوك .. و الأشكال العجيبة ( الشبيهة بأشكال أخري ) اللي الناس قاعدين يشيروا بوستات عنهم و يتريقوا عليهم . . ليه ؟! . لأني مش قادر أشوف أى فرق بين الأشكال ال ( شبيهة ) دول .. و بين ال (أصل ) . … خليني أشرح : . إنت ك إنسان عادي ممتلئ بإحساسك بنفسك و قيمتك و أهميتك .. شايف إن ال ( أشكال ) دول .. لا يستحقوا إطلاقاً أى نوع من الأهمية و الإحتفاء .. و تبعات الأهمية و الإحتفاء دول من ( شهرة و فلوس و مكانة و .. ) . صح ؟! . لكن .. لو و إنت ماشي في الشارع .. قابلت ( نجم ) سينيمائي مشهور .. أو نجم غنائي مشهور .. أو نجم كروي مشهور .. أو نجم إعلامي مشهور .. أو أياً كان سبب ( شهرته ) دي .. مش حتجري عليه و تتصوّر معاه ؟! . طيب بلاش ده .. حافترض إنك حد برستيج و كاريزما و مش حتعمل كده و تطلع تجري تتنطط جنب حد ( مشهور ) عشان تتصور معاه .. . لكن .. في الخفاء ؟! .. و إنت لوحدك بالليل كده بعد ما رجعت من الشغل .. و تعبان و زهقان و مخنوق و عايز تقعد تفضّي دماغك فأى حاجة ساعتين قبل ما تنام .. ف مسكت الموبايل تسكرول بلا هدف . . إيه اللي شد إنتباهك و وقفت قٌدّامه ؟! حافترض والله إنك مٌتدين و فاهم خطورة الفٌرجة علي الرقّاصات بالليل علي موبايلك .. و فاهم إن دي أحد أسهل الوسائل إنك تكره كل شيء في حياتك عموماً طول الوقت .. فإنت مش حتتفرج علي رقّاصات .. . طيب .. بتتفرج علي مين ؟! بوستات لعيبة الكورة ؟! , بوستات الممثل القدير غول التمثيل أسطورة الشاشة ؟ بوستات المونولوجيست الكوميدي الظريف اللطيف اللي بيضحّك ؟! . من الآخر .. بتدفع كام من إنتباهك … ل مين ؟! … لاحظ هنا إني مش باتكلّم مع المجتمع ك كل .. و لا باقول كلام إنشا لا يودّي ولا يجيب من نوعية ( لابد أن نشجب و ندين و نحث علي … ) .. و في الآخر برضو مافيش حاجة بتتغير .. . أنا فعلاً باتكلّم مع أى حد وصل و قرأ لحد السطر ده .. . إنتباهك .. بتبيع منه كمية قد إيه … ل مين ؟! . . لأن .. لو هو أساساً معروض للبيع ( و دي حقيقة 99.9% من البشر علي مدار التاريخ بالمناسبة .. مش دلوقتي بس ) .. ف بالتالي .. مش من حقك إطلاقاً إنك تضّايق لما الطرف اللي قٌدّامك .. يفاصل معاك .. . لأن الحقيقة هي إن الطرف اللي قٌدّامك .. طول الوقت .. حيحاول بكل الأشكال و الطرق إنه يقدّم لك أرخص سعر .. علي الإطلاااااااااااااااااق . … من يومين كنت فمكالمة و عملت شير للشاشة عندي لأكاونت اليوتيوب الأساسي الخاص بيا .. اللي هو لما باقوم أعمل قهوة مثلاً .. باشغّله سريعاً علي ” أى حاجة ” أسمعها أثناء ما باعمل القهوة . . و الطرف الآخر في المكالمة كان مستغرب إني قاعد باسكرول في اليوتيوب .. و مافيش أى حاجة ظاهرة هو متوقعها أو معتاد عليها . و لكن كلها عبارة عن فيديوهات ( تقنية , إقتصاد , بيزنس , شطرنج , فيديو جيمز , … ) . . و شرحت إن : السوشيال ميديا بالنسبة ليا .. أحد أكبر المصادر اللي باتعلّم منها بشكل يومي .. . و أحد أكبر الأمثلة المشهورة هو ( التيكتوك ) .. أنا عملت ده في لايفات كتير قبل كده .. و لو البوست ده إنتشر بأى شكل و أصبح في عدد عايز إني أعيد عمل الموضوع ده لايف .. حاعمله برضو إن شاء الله .. و هو إني بافتح لايف للتيكتوك عندي .. و أقعد أسكرول لمدة ربع ساعة تقريباً .. و نشوف إيه اللي حيظهر ليا . . و برضو أؤكد إن اللي حيظهر كالتالي ( فيديوهات باشمهندس أمجد سمير , فيديوهات باشمهندس أيمن عبد الرحيم .. فيديوهات سياسة دولية .. فيديوهات تاريخ .. فيديوهات فيزياء و هندسة .. فيديوهات بيزنس .. ) و علي إستحياء كده .. شوية فيديوهات لناس بتعزف كمانجا 🤣 . . و للتوضيح .. ده هو اللي باستمتع بيه .. ده هو ( ترفيهي ) .. ده هو اللي بيساعدني ( أسترخي , أفضّي دماغي , أريّح , … ) .. . لأن .. ده هو اللي ( بفضل الله ) درّبت دماغي عليه . … كل لحظة في حياة الإنسان .. هي لحظة تجارة .. تختار تتاجر مع مين ؟! . طرف غني مستغني .. و يهمه مصلحتك .. و حيضاعف لك في أياً كان اللي حتدفعه أو تبيعه له.. و حتشوف ربح في كل جوانب حياتك و آخرتك إن شاء الله . . و طرف آخر .. فقير ضعيف .. متوعد لك طول الوقت .. بل و واعدك بالفقر بكل وضوح . و أياً كان اللي حيعرضه عليك .. حيفضل يقلل فيه تدريجياً .. لحد ما تشوف الذل بعينيك . . و اللحظة اللي بتقرر فيها تتاجر مع الطرف الفقير الضعيف ده .. و تبيع له أغلي ما عندك .. حياخدك في سكة تنتهي .. بأرخص ما عنده . … و الله أعلم .