تقريباً في كلمة سر .. هي اللي فجأة حوّلتني من

تقريباً في كلمة سر .. هي اللي فجأة حوّلتني من كائن تخطّي الثلاثين من عمره مرعوب من السواقة .. ل شخص خاض غمار السواقة جوة مصر و برّة مصر بنوعيها ( المانيوال و الأوتوماتيك ) .. و فوق الدائري .. و تحت الدائري .. و كمان مرة تحت الدائري و ما أدراك تحت الدائري و عشوائياته .. و فأعماق المنشية و السبع بنات .. و مصطفي كامل و البحر ساعة الذروة .. و الشيخ زايد .. و داون تاون دبي ( أول يوم نزلت فيه دبي فحياتي والله 🤣.. كنت أجّرت عربية و خدتها سواقة بالرخصة الدولية .. و ندممممممممممت .. و لكن لهذا قصة أخري ) .. … في حين إني قبل كده .. كنت باترعب أحرّك عربية والدي مترين مثلاً والله العظيم .. .. و كلمة السر هي : فكك من ضهرك و ركّز علي ضهر اللي قدّامك !!!!! 😳 … خليني أشرح : .. زمااااااااااااان .. قبل ما أعرف أغلب اللي أعرفه دلوقتي عن يعني إيه (adhd ) .. و الحاجات اللي مختلفة فنافوخي عن نافوخ الأغلبية .. كنت مفكّر إن كل اللي بيسوقوا دول .. ذو قدرات خارقة .. و بيروحوا معابد سرية ل كهنة متخصصين يعرفوا سر السواقة .. و يرجعوا فجأة سوّاقين محترفين 🤣 . . أصل .. إزاي هما بيقدروا يمشوا في الشارع .. و يتفادوا كل العربيات اللي ماشية في كل إتجاه فجأة دول ؟!! يعني .. إزاي بيعرف إن اللي جنبه مش حيخبطه فجأة !! .. و إن اللي وراه مش حيدوس بنزين و يخبطه من وراه فجأة برضو .. و اللي جنبه من الناحية التانية حيشوف اللي بيحصل ده كله .. و يقول إشمعني أنا 😅 .. و يخبطه هو كمان من الناحية التانية . .. ده كان هو تفكيري .. كنت متخيل إن اللي سايق .. مش بس بيحاول يتحكّم في عربيته .. و لكن طول الوقت بيعمل حسابات مٌعقدة جداً جداً جداً .. عشان يتوقع حركة كل شيء متحرّك حواليه .. حتي يعمل حساب ل عمو اللي واقف في البلكونة لو قرر ينط فجأة مثلاً قٌدّام العربية . … و عشان تفهم ليه أنا كنت مفكّر السواقة كده .. ف ده .. لأنّي علي مدار حياتي كنت مفكّر كل إنسان تاني زيي أساساً .. مش في السواقة بس .. . يعني .. أنا كنت مفكّر إن كل البشر بتنزل من بيتها الصبح .. و بتفكّر في كل السيناريوهات و الإحتمالات المتوقعة و الغير متوقعة لكل حاجة و أى حاجة حواليها .. و يا تري يا هل تري لو الكهربا فجأة قطعت عن محل العصير اللي فطريقي للمدرسة مثلاً .. ف صاحب محل العصير طلع يجري برة يشوف الشارع منور ولا لا .. تقوم عربية لادا شغّالة تاكسي تخبطه .. يقوم الشارع واقف .. ف أضطر أنا أقرر من دلوقتي إني أعدّي الشارع الناحية التانية ترقبّاً عشان مستعجل عشان ألحق الطابور اللي المفروض أنا اللي ماسك فقرة ( هل تعلم في الإذاعة فيه ) .. و لو إتأخّرت حابقي مٌحرج جداً من الأستاذ اللي ماسك مشرف الإذاعة اللي أكيد أهم شيء في حياته هو فقرة هل تعلم و المعلومات القيمة اللي أنا باقدّمها و … و دايماً بيبقي في أغنية أو موسيقي شغّالة في الخلفية 🤣 . . ده عقلي .. و دي حياتي .. من أول لحظة ل وعيي في طفولتي .. مش أنا لوحدي بالمناسبة .. أنا و كل اللي زيي .. و بنبقي طول حياتنا مستغربين .. إيه ده ؟! .. هو باقي البشر مش كده ؟! هو باقي البشر عقلهم مش شغّال 24 ساعة بأقصي طاقته بدون توقّف في كل الحاجات دي ؟! … و بما إن أبويا ربنا يحفظه و يحميه عصبي جداً جداً .. و السواقة بالنسبة له دايماً كانت شيء بيخليه شايط و متنرفز و بنبقي مرعوبين نتنفس غلط جنبه و هو سايق .. ف أنا كنت متأكد من وجهة نظري .. بابا أكيد كان بيبقي قاعد يحسب كل اللي فوق ده طول الوقت .. و ده مرهق جداً جداً .. ف أنا فاهم هو متنرفز ليه . … و عشت طول عمري باتنطط بمزاجي في المواصلات .. لوحدي .. بكل أريحية . لكن .. لما تزوجت .. أصبح ماينفعش أعرّض زوجتي لمعاناة المواصلات .. و أصبحت خطوة العربية لابد منها .. . طيب .. هيا بنا إذن نتعلم إزاي نعمل الحسابات و العمليات المٌعقدة دي كلها .. و نروح نتعلم من الكهنة اللي عندهم أسرار كهنوت السواقة . … أول يوم ركبت مع ( إيهاب - إسم الشخص اللي علمني السواقة .. و توصّلت له من إعلان علي الفيسبوك ) .. صارحته بكل اللي فدماغي ده .. رد عليا بكل هدوء .. و بدون ما يندهش إطلاقاً .. و هو بيدوّر عربيته الفيرنا الأوتوماتيك … و قال : أى حاجة بتحصل وراك .. مش مسئوليتك .. إحذفها من حساباتك .. أى حاجة بتحصل جنبك اللمين أو الشمال .. طالما مش حتحود بنفسك .. ف هي مش مسئوليتك برضو .. إحذفها من حساباتك .. إنت بتسوق العربية للأمام فقط .. و مسئوليتك بس هي المسافة الآمنة اللي حتسيبها بينك و بين اللي قٌدّامك .. أى حاجة تانية غير المسافة الآمنة دي … لو حصل فيها أى شيء ( و أى شيء بأمر الله ) .. إنت مش غلطان . إنطلق . 😮😮😮 . … بعد أسبوع واحد بالظبط مع ( إيهاب ) علي عربيته الفيرنا .. كنت إقتنيت عربيتي لأول مرة في حياتي .. و بعد أسبوع واحد من يوم شراءها .. كنت باسوق علي الدائري .. و أخويا أحمد ( اللي ما زال مرعوب من السواقة بالمناسبة 🤣 ) كان قاعد جنبي بيقرأ كل الأذكار اللي حافظها من أيام حضانة 🤣🤣 . … اللي عمله معايا إيهاب ده .. كان فعلاً سبب لتحول 180 درجة فجأة في تفكيري . أنا عمر ما كان مشكلتي هي ( تشغيل ) العربية .. و لا حساسية الضغط علي بنزين أو فرامل مثلاً .. كل دي مهارات عضلية مٌكتسبة تقدر تتمرّن عليها بسهولة جداً .. و بعد فترة بسيطة بالمناسبة بتتحول لذاكرة عضلية .. يعني بتعملها بدون تفكير إطلاقاً تقريباً . . لكن .. الموضوع ده أنا ماطبّقتوش بس علي السواقة .. و لكن إكتشفت إني كنت ماشي فجوانب كتيييييييييير جداً في حياتي .. بنفس دماغي الطفولية اللي كانت بتتصرّف ب رد فعل طبيعي علي الإنتباه المتشتت في كل إتجاه . و إتعلمت أغيره . … يعني إيه ؟! … يعني .. من طفولتي ( أنا و أغلب أمثالي ) .. تركيزنا و إنتباهنا بيكون مشتت فكل شيء حوالينا .. و حوالين اللي حوالينا .. و في الشارع .. و في الحياة .. و فكل شيء . و بنظن .. إن بما إننا شفنا الحاجة دي أو ركّزنا فيها مرة .. إنها مسئوليتنا .. و لو حصل أى شيء فيها … إحنا اللي غلطانين .. . إحنا دايماً بنلاحظ الطبق اللي محطوط علي طرف الترابيزة .. دايماً بنقدر نتوقع إن طرف السجّادة المتني حيكعبل حد .. السلك المدلدل هناك ده .. الستارة المفتوحة هناك دي و الجار اللي ممكن يشوف من وراها .. و السلك اللي مفتوح و ممكن يدخّل حشرات .. و العربية اللي مركونة مجنحّة شوية في الشارع و ممكن تسبب حادثة .. و التغيرات النفسية و العاطفية الطفيييييييييفة جداً .. اللي ماحدش تاني بيلاحظها أو يلقي لها إنتباه .. إحنا بنلاحظها جداً جداً جداً .. و تغيرات نبرة الصوت .. و النظرات .. . و لو كمان ( audhd زيي أوي يعني ) .. ف بتلاحظ حاجات بشكل زيادة عن حاجات تانية .. و بشكل لا إرادي تركيزك بيهرب من الحاجات المتغيرة بشكل غير متوقع زيادة عن اللزوم ( زي الإنفعالات البشرية و تغيرات الوجه و النظرات ) .. و تلاقي نفسك مطنّش الحاجات رغماً عنّك .. و مركّز مع سرعة دوران مروحة السقف 😅 . خصوصاً فلحظات الإنفعال . … و ما لم حد ينبّهك … و يشرح لك .. إن كل ما يحدث حواليك ده .. مش مسئوليتك .. و الطبق اللي إتكسر و السلك اللي كعبل و الخناقة اللي حصلت و الحشرات اللي دخلت و كل الهري ده .. مش مسئوليتك .. و إن مسئوليتك .. هي المسافة الآمنة اللي قٌدّامك ( و دي فيما ليس له علاقة بالسواقة .. شرحها يطوووووووووول في بوست آخر .. و لكن بدايته هي : النية ) .. .. ما لم حد ينبهّك ب كل ده .. . حتفضل طول عمرك بتعاني .. و مستغرب .. هو اللي حواليك بيسوقوا بكل بساطة إزاي ؟! … طبعاً كان في تفاصيل تانية ممكن أكتب عنها في بوستات لاحقة .. و لكن كفاية كده دلوقتي عشان الساعة 2 و تلت بالليل .. و كنت وعدت إني حاكتب عن الموضوع ده إمبارح أو النهاردة .. و حبّيت أوفي بوعدي قبل ما أنام 😅 … و الله أعلم .