" دور البرد محتاج راحة يا إسلام "

” دور البرد محتاج راحة يا إسلام ” . ” ريّح في السرير يا إسلام عشان تتعافي بسرعة يا إسلام ” . ” التنطيط و الفرك و الحركة دول حيخلوك تتعب أكتر يا إسلام ” . 🙂🙂 … الجٌمل السابقة دي .. و جمل كتير شبهها .. هي اللي كانت دايماً بتتعاد علي مسامعي طول عمري من أهلي ( الدكاترة الصيادلة 😅 ) .. لما كنت بابقي في حالة مشابهة للي أنا فيها حالياً .. اللي هي مش بس دور برد من العاديين اللٌطاف الظٌراف اللي تاخد لهم حباية بانادول و شكراً .. . لا .. في أدوار كده .. بتبقي حاجة عمولة .. شغل يعيش يعني مش تٌجاري 🤣 .. اللي هو إنت مش بس مناخيرك بتبوظ .. و عينيك بتحرقك .. و زورك بيقرر يعيش دور جورج وسوف .. لا لا .. ضيف عليهم بقي .. إن كل شعر جسمك .. بٌصيلة بٌصيلة .. بيوجعك .. لمجرد إنه موجود والله .. و كل ما تحاول تقف علي رجليك .. تلاقي الجاذبية فجأة بتعلي جداً .. و تحس إنك لسة طالع من تمرينة رجلين و سكوات في الجيم .. و كنت بتتمرن بحديد الجيم كله . و باقي أجهزة و أعضاء جسمك عموماً .. بيقرروا إن السرير .. هو أهم شيء في الحياة حالياً .. . إلا عقلك 😆 .. ده لو إنت ( adhd ) زيي يعني .. مش إنسان نيوروتيبيكال عادي .. . كل ما تعمل اللي حاسس إن جسمك محتاجه فعلاً .. و تدخل السرير .. تكتشف إنك خلاص بدأت تكتشف حلول المسائل الألفية الرياضية السبعة .. فجأة .. مع بعض .. و تكتشف إنك قادر تتخيل خطة البيزنس العظيمة اللي تقدر تحول أى كشك بسكوت علي أول الشارع .. ل براند و فرانشايز ملياريين .. و لازم تقوم تكتب خطة البيزنس دي حالاً . و تكتشف إن عقلك بيحتوي علي أعظم فكرة ل قصة حتغير مجري التاريخ و الجغرافيا .. و إحتمال كمان الألعاب و الرسم و الموسيقي 🤣 .. و لازم تقوم تكتبها حالاً .. … ف تقوم من السرير .. و تتحامل علي نفسك و إنت بتترنّح زي أفضل ممثل مصري بيمثّل إنه سكران في فيلم أبيض و أسود .. و تروح عند المكتب .. و تفتح جهازك و تسمّي الله .. و … . و … و … ؟!!!! هما فين ؟!! فين الأفكار العظيمة الرائعة الجبارة الخزعبلية اللي كانوا بيتنططوا قٌدّام عينيا دلوقتي ؟! . . فجأة كله إتبخّر !! .. و كل اللي إنت قادر تفكّر فيه هو : أنا عايز أرجع السرير أنام تاني !!! . طب ما أنا كنت هنااااااك !! .. يا عم عقلي الله يبارك لك .. أنا والله كنت في السرير .. قومتني ليه ؟! . . المهم .. تترنّح مرة تانية في الطريق للسرير .. و تنط و تدخل تحت الغٌطيان .. و … ؟!!!! أم دي شغلانة .. مش حنخلص بقي .. تكتشف إن كل الأفكار الجبارة الخزعبلية المهمة فحت .. رجعت تاني .. و كل ما تحاول تغمّض عينيك .. تكتشف إن كل حواسك شغالة بكفاءة 150% .. و إنك قادر تسمع بربشة رموش عمو اللي قاعد في الكشك علي أول الشارع اللي إنت عندك خطة تحوله لبراند ينافس أبل .. . و هكذا .. و هكذا .. و هكذا .. … اللي شرحته حتي الآن ده كله .. أقدر ألخصّه لك في جملة صغننة جداً .. هي : الراحة عند الناس العاديين … مش هي الراحة عندينا إحنا ( adhd يعني ) خااااااااالص .. .. و ما لم تفهم ده … حتفضل طول الوقت بتعاني متسوح زي ما كنت باعاني أنا زمان 🤣 . … بتلخيص شديد جداً .. و بدون الدخول في مصطلحات طبية كتير .. الراحة عند الناس العاديين .. بتبقي راحة عقلية و جسمانية مع بعض .. و اللي بيريح جسمهم .. بيريح عقلهم كمان .. و لما بيتعرضوا ل دور برد زي اللي أنا باعاني منه حالياً ده … البقاء في السرير فعلاً بالنسبة لهم .. بيكون ممتع .. مريح .. و يساعدهم علي التعافي بإذن الله فعلاً بسرعة . . لكن .. الإنسان اللي زيي ( adhd ) .. الراحة ل عقله في المعتاد .. في الأغلب بتكون مرتبطة بحالة نشاط جسماني !! .. . يعني لازم عشان عقله يكون مستريح .. تلاقيه قاعد بيفرك .. بيتنطط .. بيهز رجليه و إيديه مع بعض .. طول الوقت .. . الوقفة بالنسبة له .. أريح بكتييييييييير جداً جداً من القعدة عموماً .. . ليه ؟! لأن النشاط الجسماني ده .. بيساعد علي إفراز شوية الهورمونات اللي إحنا ك (adhd ) أساساً عندنا خلل فيهم .. .. ف لما بيحصل شيء … و المكنة تعطل ( دور برد مثلاً يعني ) .. بيبدأ الجسم يحارب أى وسيلة لبذل النشاط عموماً .. و يحاول يوفّر كل الطاقة دي ل جهاز المناعة .. عشان يحارب الفيروس أو المرض .. . فبالتالي … الوسيلة السهلة و المعتادة لعقلك للحصول علي الهورمونات اللي هو محتاجها عشان ( يتزّن ) .. بتبقي غير متاحة .. . ف بيبدأ عقلك يدخل في حالة (Over drive = نشاط زيادة ) .. أسئلة .. أفكار لمشاريع و خطط .. أحلام .. و كل الحاجات اللي بتؤدي إنك تبقي عايز تاخد أكشن عليها دي .. .. اللي هو بيحاول بكل الطرق إنه يجبر جسمك علي حالة نشاط مٌعتادة .. في حين إن جسمك فعلاً بيكون فاقد القدرة دي بالكامل . … و قبل ما تقول : ثانية واحدة !! .. طب ليه ده مش بيحصل بعد الجري أو التمرين مثلاً ؟!! و بعد جري مدة طويلة .. أو تمرين .. بابقي قادر إني أقعد بالساعة و الساعتين مأنتخ و مستمتع باللا شيء إطلاقاً بدون حركة . .. و ده لأن ( إرهاق ما بعد التمرين ) .. مختلف كيميائياً بالكامل عن ( إرهاق التعب أو دور البرد ) .. … إرهاق ما بعد التمرين .. بيكون عبارة عن كوكتيل كيميائي بيؤدي لحالة نشوة و إنتشاء مشهورة بإسم (Runners high ) .. و اللي كنت كتبت عنها كتير زمان .. و إني زي ناس كتير أدمنوها .. لحد ما بتؤثر بشكل سلبي علي العضم و العضلات بسبب الإصابات .. . الكوكتيل ده بيخليك ماتحسش بألم .. بخوف .. بتوتر .. بالظبط كإنك ضربت أجدع كوكتيل مخدرات مثلاً .. حالة إنتشاء كاملة .. . و الهورمونات اللي موجودة في الكوكتيل ده .. هي اللي عقلك ( ك adhd ) طول الوقت بيدور عليها و بيحاول يلاقيها .. ف بمجرد ما يلاقيها .. خلاص .. هو مش محتاج يدور أو يتسائل أو يفكر فأى شيء .. … لكن .. إرهاق التعب أو دور البرد .. بيكون مافيهوش أى حاجة من كوكتيل ال (runners high ) ده .. ف بالتالي .. جسمك بيكون فعلاً عايز يستريح ( في حالة ثبات ) .. لكن عقلك بيكون طالبة معاه ينزل ماتش كورة حالاً 🤣🤣 . … … و بكل تأكيد في أمثلة لحاجات كتير جداً تقدر تعملها و إنت نايم بجسمك بس صاحي ب عقلك .. من ضمنهم مثلاً إنك تقرا بوست طويل زي ده 🤣 .. . لكن .. و ده مهم جداً جداً جداً.. في الحالات المشابهة دي .. ماتاخدش قرارات مصيرية .. . لأن .. عقلك بيكون معايير تحليل المخاطر بتاعته ( Risk analysis ) مختلفة تماااااااماً … عن الحالة العادية المعتادة .. . و غالباً ممكن أكتب عن ده بوست منفصل لاحقاً .. و لكن .. إلا الآن … شعر صوابع إيديا وجعني بما فيه الكفاية من الكتابة 🤣.. … و الله أعلم .