من عشرين سنة تقريباً .. سنة 2007 .. دخل دكتور

من عشرين سنة تقريباً .. سنة 2007 .. دخل دكتور البرمجة المحاضرة الأولي في مادة ال ( C++) في أولي كهربا ( بعد إعدادي هندسة ) .. و دي كانت أول محاضرة برمجة في حياتي .. كانت أول مرة عموماً أتعرّف علي عالم البرمجة عن قرب .. و وقف علي ال( stage )قدام السبورة .. ثم تنهد و قال 😅 : لو عايز تبقي مبرمج أقل من المتوسط .. يادوب تقدر تنجح في المادة دي و تكون فاهم أساسيات البرمجة .. يبقي إنت محتاج تقعد 8 ساعات يومياً تبرمج و تكتب كود . 🙂🙂 . . و بعدين كمّل .. و لو عايز بقي تبقي مبرمج متوسط .. يعني تجيب جيد و جيد جداً .. يبقي إنت محتاج تقعد 16 ساعة يومياً تبرمج و تكتب كود . 🙂🙂🙂🙂🙂 . . و بعدين كمّل .. و لو عايز بقي تبقي مبرمج محترف .. يعني الشركات تتخانق عليك .. و تقبض بالدولار .. و تتصور بموبايلك النوكيا 6630 الغالي أوي ( كان لسة نازل أيامها ) مع بيل جيتس ( كان برضو لسة ماتفضحش أيامها 🤣 ) . يبقي إنت محتاج تقعد 24 ساعة يومياً تبرمج و تكتب كود . 🤣🤣 … عمري ما نسيت الكلام ده .. و علي مدار حياتي .. علاقتي بالبرمجة .. كانت زي علاقتي بالشطرنج علي مستوي المحترفين كده .. علاقة حب يائس من طرف واحد .. اللي هو أنا أسهر الليالي و أحلم و أكتب شعر و أرسم و أعوي في الأودية المقفرة ليلاً بإسمها .. لكن هي تبص ليا من فوق لتحت .. و هي عارفة إن إمكانياتي يادوب تكفي إني بس أشتغل سايس أنظم العربيات في الباركنج يوم زفافها علي اللي من مستواها 🤣🤣 . … فعلاً .. إمكانياتي العقلية .. كانت دايماً عائق جبّار في علاقتي بالبرمجة .. و لك أن تتخيل إني فضلت أحاول سنين قبل ما أعرف يعني إيه ( ADHD ) .. و إني عضوياً و كيميائياً مانفعش في عوالم كتابة الكود دي .. كإني كنت باحاول أحفر في فولاذ صلب صلد .. و كل اللي معايا أحفر بيه .. هو عمود جيلي كولا طري مبلول صغير 🤣 . … خليني أشرح ليه : أنا ( و اللي زيي ) مابنعرفش نعد فلوس .. مابنعرفش نعد أى حاجة عموماً أكتر من 3 أو 4 حاجات .. و بعد كده بنتوه و ننسي و ننسي إحنا كنا فين و وقفنا فين و عند رقم كام . . أنا و اللي زيي .. بننسي أفكارنا أثناء ما إحنا بنفكّر فيها .. و عشان كده لما بنتكلم علي طبيعتنا .. بنتكلم في 32 موضوع مختلفين فنفس الوقت .. و كلهم مابيكملوش .. و بنقاطع نفسنا و نقاطع اللي قدامنا و نقاطع أى حد بيتكلم .. و نزعّق و نقول اللي فدماغنا بسرعة .. لأننا عارفين كويس جداً إننا لو ماقلناش ده حالاً .. حننساه بالكامل .. و حننسي إننا نسيناه . . أنا و اللي زيي .. بنتلخبط بأسهل ما يكون فوسط أى حاجات كتير مالهاش علاقة ببعض .. . أنا واللي زيي .. بنزهق بسرعة جداً جداً جداً جداً .. و بنٌحبط بسرعة جداً جداً جداً جداً جداً .. و نفسنا بيتكتم و نتخنق و نكره الحاجة اللي بنحاول نعملها بسرعة جداً و بسهولة جداً لو حسينا إنها عصلجت مرة أو إتنين و بعدين كلكعت .. … فبالتالي .. فكرة إني أحاول أكتب ( كود ) .. و بعدين أضغط ( RUN ) .. و يطلع ( إيرور ) . ده بالنسبة لنا كابووووووووووووووووووس .. و إني أقعد أقرا كود بسيط جداً من 20 سطر مثلاً .. عشان أكتشف إن كان في مشكلة في قوس ماتقفلش .. أو نقطة ماتكتبتش .. أو حرف أو رقم مكتوبين غلط .. ده كافي بالنسبة لنا إننا نغير مجال شغلنا و نفتح حلّاق صحة بيطري تخصص خرفان عندها صلع وراثي .. و لكن مانقعدش ندور في كود . … لكن … لكن .. الحب و سنينه بقي .. يعني إيه ؟! يعني إحنا بطبيعتنا عندنا آفة الإبداع .. بنحب نفكر و نخترع و نتخيل كل حاجة و أى حاجة .. و أحد أكتر المجالات اللي بتدّي لك حرية الإبداع و فرصة إن إبداعك يتحقق ..هو البرمجة . . فبالتالي .. إحنا طول الوقت بنتخيل برامج و فرص و إمكانيات و مشاريع و حلول .. و كمان بنقدر نتخيل هي ممكن تبقي سهلة إزاي عشان تتبرمج و تتكتب ك كود . و ده سبب إني إشتغلت سنين في ال (algorithm design and analysis ) .. يعني أعمل كل حاجة .. إلا إني أكتب كود .. . لكن .. بمجرد ما نبدأ نحاول .. و يظهر قدامنا أول ( إيرور ) و إحنا بنحاول نسطّب حتي بيئة البرمجة .. كنا بنكتئب .. و نقعد نتخيل المشهد الحزايني و إحنا بنلمع عربيات المعازيم فحفل زفاف ( البرمجة ) علي عريسها ( أبو ذاكرة قوية و إنتباه و تركيز حلوين ) 🤣 … علي مدار ال20 سنة اللي فاتوا .. كمية المشاريع أسيرة الأدراج في مكاتبي .. تخطّت 60 مشروع ( حرفياً مش مجازياً ) .. في كل المجالات .. مشاريع كتير جداً .. كلها منتظرة و متوقفة علي ( لما أبقي ثري ثراء فاحش أوي .. لدرجة إني أعيّن فريق من المبرمجين المخضرمين .. و أقفل عليهم .. و أخليهم يبرمجوا كل المشاريع دي 🤣 ) . . علي مدار السنين برضو .. صديقي الديفيلوبر العبقري ساعدني كتير .. و فعلاً إستحمل دماغي و تقلباتها و ساعدني إن أكتر من مشروع من أفكاري يشوف النور .. . لكن .. الراجل عنده شغله و حياته .. و أنا الصراحة باغتت عليه بقالي 30 سنة تقريباً ( إحنا أصدقاء من و أنا عندي 8 سنين 🤣 ) .. و كنت باروح أبرشط عليه طول عمري ب ( هارد 80 جيجا فاضي ) .. أسرق من عنده جيمز و أنيمي و أفلام و مسلسلات 🤣 . … لكن ما علينا من ذكرياتي دي .. المهم .. المهم هو اللي حصل من 5 أيام . … زي ما شرحت في بوست سابق … أنا متابع تطورات الذكاء الإصطناعي عن قرب من قبل ما يكون ( Mainstream - منتشر بشكل عام جداً كده يعني ) .. و إن مشروع تخرجي نفسه سنة 2012 كان جزء كبير منه مبني علي محاكاة الشبكات العصبية ( neural networks simulators ) اللي بنينا بيها موديل ذكاء إصطناعي .. يحاول يحلل رسم قلب المريض و يكتشف الأمراض اللي عنده أسرع من طبيب القلب . ( خدنا إمتيازات في المشروع و كل حاجة .. لكن كله كان كلام نظري بس 🤣) . … ف من سنة بالظبط .. في رمضان اللي فات .. خدت غطس عميق في أعماق عوالم ال (vibe coding ) .. أشوف آخر قدرات الذكاء الإصطناعي حينها في إنه يستحمل دماغي .. و بعد شهر كامل .. و بتاع 300 دولار صرفتهم تقريباً في أدوات مختلفة .. ماقدرتش حتي إني أنشر مشروع واحد عالأقل .. جرّبت كذا فكرة .. و كل فكرة منهم كانت بتوصل لمرحلة تعقيد معين .. و بعدين المكنة تجيب جاز .. و الأدوات اللي كنت باستخدمها حرفياً كانت بتكراش .. لدرجة إني تواصلت مع المصممين ( اللي واخدين ملايين كإستثمارات ) و فضلت في تسلسل إيميلات معاهم أحاول أحل مشاكلهم أيامها .. مجاناً 🤣 . … المهم .. خدت أجازة سنة .. و من 5 أيام .. رجعت أشوف بقي آخر الكلام علي إيه .. .. التطور مايتوصفش .. أنا حرفياً عايش حلم باحلم بيه من 20 سنة .. بقيت باضغط حتي علي الأدوات عشان أجيب آخرها ( أعقدها ) و أشوف حتقدر تفهم اللي ناقص ولا لا ؟! حتقدر تطلع من الألغاز اللي باحطها في طريقها ولا لا ؟! حتفتكر شغل إتعمل من 120 نسخة فاتوا .. و كلام إتكلمنا فيه من آلاف السطور فاتت ولا لا .. و مش بس بيقدر يتابع و يفهم كل ده .. لا .. ده بيحسّن عليه .. و يكمّل كلامي قبل ما أقوله . … لأول مرة في حياتي .. أحس إني دخلت قاعة الزفاف اللي كنت شغّال سايس برّاها 🤣 .. و قعدت عالكوشة جنب الحلم اللي كنت باحلم بيه بقالي 20 سنة .. و مش قلقان !! مش خايف إن حد ييجي يطلعني برة عشان ذاكرتي و إنتباهي .. … فعلاً فخور باللي إتبني خلال ال6 أيام اللي فاتوا بفضل الله .. و خصوصاً فكرة ( ميزان ) جوة السلسلة . … ميزان : لعبة بسيطة جداً جداً بيظهر قدامك أخبار و مقالات اللي بيحصل في العالم حالياً فكل المجالات .. و إنت تختار ( حقيقي ) ولا ( مٌزيف ) .. و تشوف ال ( سكور ) بتاعك .. و تسابق زمايلك و كل الحاجات الحلوة بتاعت الألعاب دي .. .. فكرة ( ميزان ) لوحدها كانت عندي من فترة برضو .. لكن إنها تتبني جوة ( سلسلة ) .. دي مفرحاني جداً .. لأنها بتعيش فنفس عالم الثقة .. الشبكة الإجتماعية المبنية علي الثقة .. السوق المبني علي الثقة .. و ده .. منطقي جداً جداً جداً .. … عايز أشرح أكتر .. أتكلم أكتر .. أبني أكتر .. و لكن فاضل دقايق عالفطار ..🤣 ف إلي وقت لاحق إذن إن شاء الله .. … و الله أعلم … ** الصورة بتفكرني لما أصدقائي كانوا بيواسوني و يقولوا ليا ( البرمجة مش ليك يا إسلام ) 🤣🤣🤣🤣