هل نادر حيحضن بقي دلوقتي ؟!

هل نادر حيحضن بقي دلوقتي ؟! … مسرحية مدرسة المٌشاغبين .. اللي بمقاييس نجاح عصرنا الحالي ( الفلوس , الإنتشار , … ) مش بس ناجحة .. لا .. دي أسطورة في النجاح . و يمكن أحد أشهر مقاييس النجاح المعروفة في المسلسلات و الأفلام حالياً هي : ( فيها إيفيهات سمّعت مع الناس و إتعملت ميمز قد إيه ) . و علي المقياس الأخير ده بالذات .. مدرسة المٌشاغبين .. هي نجم يٌهتدي به و قدوة و عمل فنّي خالد في التاريخ … صح ؟! … فأحد اللقاءات الشهيرة مع ( سٌهير البابلي ) اللي قامت بدور ( أبلة عفّت ) في المسرحية .. كان واضح جداً إستياءها من ( تأثير و نتيجة ) المسرحية دي . و كانت بتقارنها ” علي حد قولها ” بأعمال ” عظيمة جداً , و فيها قيمة فنية و أدبية عالية جداً ” .. و تتساءل : هو الجمهور كان فين من الأعمال دي ؟! … و ده بالظبط بيفكرني ب التساؤل المشهور للآباء و الأٌمهات اللي إنحرف أطفالهم نتيجة تربيتهم الخاطئة … لما يتساءلوا ( إنت طلعت بايظ لمين يابني ؟! .. ده إحنا صرفنا دم قلبنا عليك عشان تطلع كويس !! ) . في حين إن الأب و الأم .. في الأغلب .. بيكونوا عملوا كل حاجة غلط ممكن تتعمل في التربية .. إلا إنهم يخونوا واحد صاحبهم ( عشان إتعلموها من فيلم تيتو 🤣 ) … بعد إنتهاء مسلسل ( لا تٌرد و لا تٌستبدل ) .. تعالي نفترض دلوقتي بقي إن الشخصيات الحقيقية اللي موجودة في المجتمع فعلاً .. حتتفرّج عليه ( و هٌما مش عارفين إن القصة عنهم أو عن شخصيات زيهم يعني ) . … نادر .. مهندس آي تي .. حيطلع من مكتبه … حيشوف مراته مسحولة و بتعيط و تنهنه و تشنهف و هي قاعدة قٌدّام التيليفيزيون .. حيسألها بإستغراب و هو رايح يعمل قهوة عشان يركز في الشغل : خير يا بنتي ؟! .. مالك ؟! . حتقول له : بعوضة مات 🥹 . نادر حيسيب مكنة القهوة الجديدة المٌعقدة اللي هو بس اللي بيعرف يشغلها .. و يروح يقف علي باب أوضة الليفينج .. و يقول بكل حرص : إيه ؟! . و كل اللي حيكون عقله بيفكّر فيه وقتها .. إن مراته كانت مربيّة ناموسة دكر .. و مسمياه ( بعوضة ) .. و مات . . و طبعاً ما مراته تبدأ في الشرح .. و إن الموضوع عبارة عن مسلسل هي بتتفرج عليه .. حيكون هو دماغه فصلت أول ما سمع كلمة مسلسل أساساً .. و حيفضل يضحك بهيستيريا علي خفّة دم أهله .. و إن مراته الهبلة ممكن تربّي ( ناموسة ) 🤣🤣 .. … طه .. غالباً حيكون شاف المسلسل و هو سهران في وردية أمن مثلاً علي تيليفزيون مكسور مش بيجيب غير قناة واحدة بالليل .. و من بين زغللة دٌخّان سيجارته الكيلوباطرا الفرط .. اللي تخليه مش مركّز مع بهتان ألوان شاشة التيليفزيون العقيمة أساساً .. حيشوف شاب زيّه .. إبن بلد .. جدع .. كل الظروف حواليه ظلمته .. عمره ما خد حاجة مش بتاعته .. و حيشوف بنوتة ضعيفة .. منكسرة .. مظلومة في جواز بارد مع شخص أبرد .. دمه الحر المخلوط بالزيت الحار حيغلي … و حيفتكر واحدة بعينها .. لازم حيلاقي نفسه حيفتكر واحدة بالذات في حياته هو .. بينطبق عليها نفس أوصاف الأوستاذة .. و حيعمل عليها إسقاط ( Projection ) كامل .. و يفتكر لما ضحكت له مرة .. ضحكت له مرة مثلاً علي نكتة أو إفيه هو قاله .. و زي ما الأوستاذ عمرو دياب قال : ضحكت يعني حاسّة هواك .. و موافقة تعيش العمر معاك . و حيبدأ يشوف مٌعاناة الأوستاذة مع زوجها البارد التلاّجة .. و يحس إنه يبقي مٌقصّر .. غلطان .. ناقص .. لما يسيبها و هي محتاجة لحد يقف جنبها و يساعدها .. زي ما المسلسل بيقول .. و هو إطلااااااااااقاً مش حيعمل حاجة وحشة لا سمح الله … أبداً .. هو إبن بلد و يفهم في الأصووووووول .. لكنه بس حيطمّن عليها .. عشان هو جدع و إبن بلد . … ريم .. حتلاقي نادر واقف قٌدّامها و مش متأثر إطلااااقاً بعياطها و شحتفتها و شنفهتها .. و كمان ماسك فنجان قهوة من مكنة مٌعقدة هو بس اللي بيعرف يشغلها .. و واضح جداً إنه مستهزأ بمشاعرها .. لدرجة إنه ما زال ماسك فنجان قهوة من المكنة المٌعقدة اللي هي بتكرهها . هي متأكدة إن هو أساساً جاب المكنة دي عشان يستفذها … عشان يحسسها بغباءها و ضعفها .. لأنه خايف من قوتها و إمكانياتها الكامنة . هي أينعم ماعندهاش فشل كلوي .. لكن ماحدش ضامن الأيام دي دلوقتي .. و بعدين مش يمكن مكنة القهوة القديمة تكون بتسبب فشل كلوي .. و عشان كده نادر بيشرب من المكنة الجديدة المٌعقدة اللي هو بس بيعرف يشغلها .. تلاقيه عارف كده و سايبني أشرب منها عشان يجيلي فشل كلوي .. فأضطر أروح أغسل .. و يلاقي هو وقت يفضل قافل علي نفسه باب المكتب زي ما بيعمل دايماً .. أنا كنت شاكة إنه بيعمل حاجة غلط لما بيقفل علي نفسه باب المكتب .. لكن دلوقتي أنا متأكدة خلاص .. هو بيفتح فيديوهات مكن قهوة مٌعقد و يقعد يتفرج عليها .. نادر بطّل يحس بيا .. يهتم بيا .. يفكر فيا .. يترجي فيا .. يبكي عليا .. مش حانسي يووووووووم .. إن هو جااااااااااارح .. ثانية واحدة !!! في المسلسل نادر حاول يحضن .. لما حس إنه حيخسر ريم للأبد .. مش يمكن لو خليته يحس إنه حيخسرني خلاص .. يهتم بيا ؟! .. ثانية واحدة !!! نوتيفيكيشن علي الموبايل بتقول إن ( طه ) .. عمل ليا فولو علي إنستاجرام !! .. مين طه ده ؟! .. شكله إبن بلد و جدع و طويل و شبه طه اللي في المسلسل .. ده متصور مع بنوتة صغننة هو كمان .. شايف حاضنها إزاي و هو ماسك كٌباية شاي .. أيوة كده .. شاي .. مش قهوة .. الشاي ساهل .. و يا سلام بقي لو ب نعناع مثلاً .. مش مٌعقد زي القهوة .. يعني مش دلوقتي لو أنا متجوزة طه .. كان زماني مفضيّة مكان مكنة القهوة المقعدة اللي مش باعرف أشغلها دي .. و حاطّه مكانها الكرسي التحفة اللي شٌفته صدفة و طلبت من نادر نجيبه و هو رفض .. و سبب رفضه التافه جداً هو إنه مش فاهم ليه نجيب كرسي ” تحفة ” مش للقعاد .. هو مش بيقدر الجمال و الفن .. و بقالي ساعة قاعدة بافكّر أهه .. و هو ماحسش بيا إطلاقاً ولا جه حضنّي ولا مرة .. أنا حاقبل الفولو بتاع طه علي إنستاجرام . … معلش .. طوّلت شوية في تخيلاتي .. و لكن ده لأنّي والله قمت فجأة بعد ما نمت لمدة ساعتين تقريباً .. و فتحت الموبايل اشوف الساعة كام .. لقيت عدد الفولورز عندي زادوا بتاع 5000 تقريباً خلال كام ساعة 🙂 .. واضح إن الناس بتحب بوستات الفوازير .. ف .. حاضر .. حاعمل فيديو إن شاء الله أشرح فيه الحلول فيديو عشان الناس اللي ماقتنعتش من مجرد الكتابة . و حاقرأ أغلب التعليقات إن شاء الله .. و لكن .. لما عملت سكرول سريع عالفيس و أنا نايم .. و شفت كذا بوست عن : روعة و جمال و حلاوة و نعومة و حنان و طعامة و قد إيه مسلسل ( لا تٌرد ولا تٌستبدل ) كريسبي .. حسّيت إني مش حاعرف أكمل نوم غير .. لو كتبت الكلمتين دول .. أو عملت فنجان قهوة مٌعقد أنا بس اللي باعرف أعمله ( بالجنسنج و الزعفران و القرفة و الجنزبيل و نص الفنجان الأول يبقي لبن سخن في المايكروييف و بعدين نقلب فيه الزعفران و الجنسنج الأول و بعدين ننزل عليه بالقهوة البن وسط محوج اللي منضاف عليها كيس علي كافيه و يتساب مكان في الفنجان ل معلقة كبيرة عسل نحل سدر مضاف عليه غذاء ملكات النحل و بعدين … … .. و الله أعلم .