أحد أقوي و أفضل الردود و اللي مش معروفة تقريباً

أحد أقوي و أفضل الردود و اللي مش معروفة تقريباً .. علي الجملة المشهورة أوي و اللي إتهرست في كل أفلام و كتب و قصص التسويق .. اللي هي ” لما شخص يطلع لك قلم من جيبه .. و يقول لك .. بيع القلم ده ليا ” .. هي إنك تاخد القلم منه .. و تقول له : لو ماشترتش القلم ده مني خلال 10 ثواني .. حاحطه في @#%ك 🤣🤣🤣 ( عينك يا قليل الأدب 🤣🤣🤣🤣 ) . … سبب إني بافتكر الرد العبقري ده 🤣 دلوقتي .. هو إني بيظهر قدامي أخبار كتير جداً عن موضوع القافلة إياها .. و لكن المنظور اللي أنا باشوف الأخبار دي منه … منظور تجاري مادي بحت .. و هو نفس المنظور اللي كنت باتابع من خلاله أخبار السفينة مادلين من كام يوم .. بس كنت مسافر زي ما قلت و ماكنتش فاضي أكتب الكلام ده . … خليني أوضح : … السفينة مادلين كان عليها عدد من الجنسيات .. من أهمهم : فرنسا ألمانيا السويد البرازيل أسبانيا … تقدر بكل سهولة تعمل شوية سيرش ( و إستخدم شات جي بي تي لو حابب ) عشان تعرف حجم التعاملات المادية و الإقتصادية بتاعت كل دولة من دول .. مع الناس اللي مضايقينك .. و مع الناس اللي بتساعد الناس اللي مضايقينك ( أمريكا يعني ) .. … كل دولة من الدول اللي فوق دول .. المتحكم الأساسي في سياساتها .. هو الإقتصاد و الفلوس فقط .. لا غير . .. أى أوهام عن ( أيديولوجيات , أفكار , فلسفات , قناعات , ديانات , مسلسلات مفضلة للمرشحين مثلاً 🤣 ) … كل دي مجرد أوهام .. هري .. كلام فاضي بيتعمل عليه برامج حوارية يسهر قدامها الشعب و يسمعها بنص ودن أثناء ما هو بيحتسي الجعة في البار ليلاً بجانب فتاة حسناء . .. لكن اللي بيوصل إنه يتحكم في أوصال و مقاليد الحكم في الدول دي .. و الدول اللي بتحرك الدول دي .. هي الفلوس .. و الفلوس فقط . … عارف إنك دلوقتي بكل رجولة و جدعنة شباب القهوة .. حتطلع عشرين جنيه من جيبك و تزعق إن ماحدش حيحاسب عالمشاريب غيرك .. و إن لو العملية زنقت .. و حد مثلاً إتجنن و طلب زبادي خلاط بالفواكه .. و إحتجنا فلوس كمان .. تعرف تلم تلاتين جنيه من إصحابك و تقفلها خمسيناية 🤣🤣.. … لكن للأسف .. الخمسين جنيه بتاعتك .. و ال 100 جنيه بتاعت صاحبك اللي شغال في الخليج و بييجي يتفشخر عليكم كل عيد .. و ال 200 جنيه اللي صاحبك التالت كان محوشهم عشان المصيف .. و الكام مليار جنيه أو دولار اللي تظن إنك قادر علي تجميعهم .. … كل دول .. فكة .. مابيحركوش قلم علي ورقة .. عشان يمضي موافقة أو قرار فأى دولة من الدول دول . ( نفس القلم اللي فأول البوست بالمناسبة 🤣) … عارف القلم ده بيحركه إيه ؟ الفلوس بتاعت بكرة … مش بتاعت النهاردة .. يعني إيه ؟ … يعني لازم تفهم إن في عالم كامل مختلف عن العالم اللي إنت عايش فيه ده .. لو إنت عايش في عالم .. بتقلق فيه برصيدك اللي في البنك .. و بتحاسب كاش .. و محوش لك قرشين .. و معاك عربية أو إتنين أو حتي تلاتة .. و شاليه أو فيلا في الساحل و أختها في السخنة .. يبقي إنت كده عايش في العالم الأولاني .. العالم اللي المهم فيه هي ( فلوس النهاردة ) .. برنس طبعاً .. و لكنك بدأت تشوف حدود العالم ده .. تجيب آخره .. و بدأت تفهم إن في عالم تاني خااااااااالص .. بيبتدي بعد العالم ده .. … العالم التاني ده .. عالم ناس مابتحاسبش كاش .. مابتحاسبش خالص .. عالم ناس كل ما يملكوه في الحياة .. هما سالفينه .. بضمانات .. . يعني إنت مثلاً بتتشتري عربية و تدفع فيها 3 مليون .. تمام .. ألف مبروك .. صاحبك بقي بيشتري عربية تمنها 13 مليون .. و لكنه مابيدفعش مليم .. لا .. هو بيخلي البنك يشتريها بضمان فيلا تمنها 30 مليون .. و الفيلا اللي تمنها 30 مليون … دي هو مش مكيشها .. لا .. هو بيمتلكها بضمان مصنع قيمته 50 مليون .. و المصنع قيمته بتتحدد بناءاً علي قيمة شركة هو شريك فيها .. و الشركة قيمتها بتتحدد بناءاً علي سمعة السهم بتاعها في البورصة .. و سمعة السهم بتتحدد بناءاً علي صورة و شكل العربية اللي راكبها صاحبك ده . … فهمت حاجة ؟! .. … معلش .. لو كنت تهت في الكام سطر اللي فاتوا دول .. إقراهم تاني .. و لكن يهمني إنك تعرف إن العالم بتاع الدول و الشركات و الكيانات الكبيرة اللي بتسمع عن أساميها في المؤتمرات النضيفة اللي بيوزعوا فيها وجبات و باتيهات مجاناً 🤣 . العالم ده .. عالم مايهمهوش معاك كام في البنك .. و لكن يهمه أكتر بكتييييييييييييير أوي .. إنت شكلك حتعرف تجيب لنا إن شاء الله في المستقبل .. كام . . السمعة .. أهم من الرصيد … اللي كام شخص ( بتوع السفينة مادلين ) دول حاولوا يعملوه في الرحلة البحرية الظريفة دي .. هي عملية ضغط علي ال ( سُمعة ) .. سمعة دولهم .. و الشركات اللي بتحرك دولهم .. … المحاولات دي مش أول مرة تتعمل .. و جريتا ( البنت السويدية اللي معاهم ) تاريخها حافل بمحاولات أكثر جنوناً للضغط علي هيئات و مؤسسات عالمية عشان الهيئات و المؤسسات دي تغير مواقفها .. خصوصاً في أهم القضايا اللي البنت دي مهتمة بيها .. و هي البيئة . .. و لكن .. يؤسفني أقول لك .. إن البيئة متاخدة ورا مصنع الكراسي بقالها 10 سنين مثلاً .. و ماحدش عارف يعترض . و إن قضايا تانية كتير جداً علي مدار ال100 سنة اللي فاتوا .. زي قضايا الهنود الحمر فأمريكا مثلاً .. أو السود فأمريكا و أفريقيا .. و غيرهم من القضايا المشابهة للي بيحصل فأهالينا .. حاول ناس كتير مهتمين بيها إنهم يأثروا علي الرأى العام .. و للأسف .. النسبة الأكبر دائماً كانت إنتصار مبين لل : فلوس . .. و زي ما شرحت لك .. الفلوس اللي كانت بتنتصر .. مش فلوس تبرعات متجمعة كاش .. و لكن فلوس مصالح .. اللي هي ( إستثمارات مستقبلية ) . … في المثال الظريف بتاع أول البوست .. عشان تهدد التهديد اللطيف ده ( إنك تحط القلم في $@% إحم .. عين اللي بيكلمك ) .. لازم تكون بتمتلك القوة اللازمة لتحقيق التهديد ده .. ساعتها فقط … بتضمن إن الفلوس تطلع من جيبه و تدخل جيبك . … أى صورة أخري من صور النقاش في المثال ده .. غير مجدية إطلاااااقاً .. مهما إستعطفته .. مهما حاولت تقنعه بمشاعرك .. مهما جبت له ناس يقنعوه بمشاعرك و مشاعرهم .. الفلوس الحقيقية ( مش بتاعت العالم الأولاني .. و لكن بتاعت العالم التاني ) .. مابتطلعش .. غير لسببين وحيدين فقط علي مدار التاريخ : المصلحة … أو القوة . .. يعني إما إنه يكون مصلحته إنه يشتري القلم ( بتاعه ) منك .. ( يعني يشوف عندك سُمعة مستقرة .. و صورة عربية جديدة مش مخدوشة و متبهدلة .. و بدلة نضيفة مش متكسرة … فاهمني ؟! ) .. .. أو إنه يخاف علي مصلحته برضو 🤣🤣🤣 .. و يشتري القلم بتاعه منك 🤣 … و الله أعلم .