أحد البرامج الرائعة اللي ما زلت باستمتع بيها و باكملها

أحد البرامج الرائعة اللي ما زلت باستمتع بيها و باكملها اليومين دول .. هو : ( the toys that made us ) = (اللعب اللي شكلت حياتنا ) سلسلة بتحكي تفصيلياً فكل حلقة .. قصة لعبة من اللعب اللي شكلت طفولتي شخصياً .. و طفولة أكتر من جيل علي مدار ال50 سنة اللي فاتوا ..

• سلاحف النينجا
• باور رينجرز
• هيلو كيتي
• ترانسفورمرز … و غيرهم كتير .. … … فاكر كويس جداً إن ( باور رينجرز ) بالأخص .. كان بيشكل جزء أساسي من مرحلة أولي و تانية و تالتة و رابعة إبتدائي بالنسبة ليا .. و كان المسلسل بتاعهم اللي إتعرض عالقناة التانية فرمضان .. عبارة عن أيقونة للفترة دي من حياتي .. و لحد النهاردة الموسيقي بتاعت المقدمة بترجعني أكتر من 25 سنة لورا .. و ألاقي نفسي بازعق بأى حروف و أى كلام مع الأبطال بتوع المسلسل أثناء لحظة تحولهم ..( أكيد ماكنتش أعرف معني it’s morphing time ) أيامها .

• و طبعاً الواد الأزرق بتاع ترايسيراتوبس .. كان هو المفضل عندي * . … … إلا إن دلوقتي .. و بعد مرور السنين دي كلها .. أعرف إن القصة كانت كلها علي بعضها مجرد شوية وسائل دعائية عشان المهم إن اللعب نفسها هي اللي تبيع .. و إن مصدر الربح الأساسي .. و الهدف من ورا المسلسل .. كان مجرد بيع لعب و شنط و تيشيرتات ( كان عند كل واحد مننا أنا و أخويا تيشيرت باور رينجرز بالمناسبة ) .. … و نفس الموضوع كان برضو مع 90% تقريباً من الأيقونات الثقافية للمرحلة دي من طفولتي .. و إن القصة .. و الهدف .. و المغزي .. و كل الهري ده .. ماكنش ولا ليه أى لازمة .. إلا إنه يشتغل كماركتنج علي المنتج الأساسي .. و هو اللعبة نفسها . … … أنا فعلاً كنت بعيد جداً عن معرفة كواليس عوالم لعب الأطفال من زمان .. و كل فترة كنت بأجل إني أبدأ أدرس العالم ده عن قرب .. لكن البرنامج ده إداني كورس مكثف جداً عن العالم ده .. .. شركات معينة كنت عارف مدي حجمها و تأثيرها في السوق ( زي Matel مثلاً ) .. لكن ماكنتش غطست فأعماقها ولا تفاصيل صفقاتها علي مدار تاريخها ( و في المعتاد أنا باعمل ده مع الشركات ال500 الأساسيين دايماً = Fortune 500 ) . لكن إستمتعت لما شفت إزاي شراكات معينة هي اللي شكلت وضع Matel في السوق حالياً و زمان . … …

• حاجات زي المصارعة الحرة .. و هالك هوجان .
• ستار وورز = حرب النجوم .. و ستار تريك .
• باربي طبعاً .. كل دول كان أكتر من 70% من العوامل المؤثرة فيهم … هي البلاستيكات و لعب الأطفال اللي إشتريناها علي مدار 40 سنة ..و أكتر . … … … فكرتين أساسيين مسيطرين علي عقلي خلال الأسبوعين اللي فاتوا ليهم علاقة بالموضوع ده . 1- تصنيع اللعب ( و بالذات حالياً في عصر الطباعة الثري دي ) مش مكلف إطلاقاً مقارنة بمجالات صناعية تانية أكثر صعوبة . و الإبداع العقلي الناتج عنه إنتاج ثقافي ( عمل مسلسلات كرتون يعني مثلاً ) شيء متاح جداً و كل سنة بيكون أسهل و أسهل للجميع .. الرابطة المفقودة زمان في الموضوع فوجهة نظري كانت .. هو التمويل المستمر خلال أول سنة .. لحد ما يبدأ يكون في بوادر ربح .. سؤالي هو : هل ما زال التمويل و مساندة منتج محلي في المجال ده … بنفس الصعوبة بتاعت زمان ؟! … … الفكرة التانية : 2- زمااااااااان … في عصور ما قبل الموبايل و الإنترنت .. كانت المنتجات المادية ( مساطر .. أدوات مدرسية .. لعب أطفال .. ) هي المحرك الأساسي لإقتصاد العوالم دي … … حالياً .. في عالم ضخم تاني مختلف إسمه ( المنتجات الرقمية ) .. اللي ممكن جداً يتم تطويعها عشان تستوعب أى إنتاج ثقافي مختلف .
• لعب موبايل بطولة شخصية زي بكار مثلاً ..
• عملات و ( Collectables - تجميعات ) في عوالم رقمية ( زي بوكيمون مثلاً ) يشتريها الطفل بفلوس حقيقية .. و يبقي ممكن يتاجر بيها بعد كده مع أطفال غيره ( خصوصاً إن ده ممكن جداً بإستخدام Blockchain tech حالياً ) . .. سؤالي هو : فوجهة نظرك .. خلال فترة قد إيه .. حيبقي جزء من مصروف الأطفال .. عملة رقمية .. يستخدموها بحرية في عوالمهم .. و يشتروا منتجات رقمية من النوعية دي … بدل شيبسي و بيبسي حالياً مثلاً ؟! . … … … … أنا حقاً أتمني إن أحد العوالم اللي أستثمر فيها مواردي و مجهودي في المستقبل .. يكون ليه علاقة بالمجالات دي .