النوعية دي من الإيميلات بيجيلي منها دستة كل أسبوع تقريباً

النوعية دي من الإيميلات بيجيلي منها دستة كل أسبوع تقريباً .. علي حاجات مختلفة من ال ( Digital Assets ) اللي عندنا . معني ( Digital Asset = ممتلك رقمي ) .. حاجات زي ( مواقع معينة , أكاونتات سوشيال معينة , قنوات يوتيوب , … و هكذا ) .. و في الحالة اللي باشيرها هنا دي .. الكلام علي ( كورس من الكورسات اللي كنت رفعتها علي يوديمي من زماااااان ) . … … ** شوية معلومات صغننين *** … من كل عشر إيميلات بيوصلوني تقريباً .. واحد أو إتنين منهم هما اللي بيبقوا فعلاً وراهم شغل كويس .. و يستحقوا إني أرد عليهم و آخد و أدي معاهم .. ال8 التانيين .. غالباً بيبقوا ( Spam ) .. أو شركات ناشئة جداً جداً جداً .. و بيدوروا علي طرق رخيصة للإنتشار زي ال ( Cross sharing in low value demographics ) . الجملة الطويلة اللي بالإنجليزي الأخيرة دي معناها : إنهم يبعتوا إيميل طويل ملخصه … حانشيرلك شغلك عندينا … و تشيرلنا شغلنا عندك .. و فيد و إستفيد .. … بس لأن معظم إيميلات ال( كروس شيرينج ) دي بتبقي من سماسرة شركات .. مش من الشركات نفسها .. فبيكون العائد منها مجرد رقم سابسكرايبارز و بس .. يعني هو ( سمسمار الشركات ) بيكون شغله مجرد إنه يوري العملاء بتوعه أرقام بتزيد علي السوشيال ميديا بتاعتهم … بس مش فارق معاه الأرقام دي بقي من ناس عايزه منتج العميل ولا لا .. .. فحتلاقي معظم الإيميلات بتاعت ( سماسرة الشركات ) دول .. بتجيبلك مشتركين وهميين أو من مناطق زي ( مصر , بنجلاديش , باكستان , المناطق الفقيرة في الهند , فلبين , … و هكذا ) .. … … المهم .. كلامي هنا مش عن الجزء اللي فات بتاع ال( Spamming ) ده … كلامي عن الإيميلات اللي بتبقي بشغل حقيقي .. و كويس جداً أحياناً .. … إن الناس دي .. عمرهم ما كانوا حيوصلوا ليا .. أو أوصل ليهم .. بدون ما يكون عندي ( ديجيتال أسسيت ) زي الكورس ده .. و موجود علي يوديمي من زمان .. .. حاجة عملتها و سيبتها شغالة من أكتر من 4 سنين تقريباً .. و لحد النهاردة بتعمل ليا شغل بالمنظر ده . … االإيميل ده ملخصه : ” كورس الأفترإيفكت بتاعك حلو ( مع إنه غالباً مافتحش فيه حاجة 😅😅.. بس شاف شوية أرقام الناس اللي خدته .. و التقييم بتاعه ) .. و عايزينك تعمل لنا كورس علي الأبليكيشن الجديد بتاعنا اللي بيعمل موشن جرافيكس .. و تفاصيله كذا و كذا و كذا ” .. ” و الموضوع فيه لقمة عيش ليك و لينا .. و الله يكرمك و كان الله بالسر عليم ” . … … … إن شاء الله غالباً فعلاً حاعمل ميتنج زوم معاهم .. و أسمع لكلامهم و أشوف حجمهم و لو في فرصة لعمل شغل مشترك مثلاً .. أغلب الظن ( و لأني ماعنديش وقت أعمل كورسات خالص دلوقتي ) حاشير الموضوع و الشغلانة دي بالكامل لشخص ( من تلات أشخاص عارفين نفسهم كويس 😎) ..إنهم اللي يعملوا الكورس و الموضوع بالكامل …و حاشرف إشراف بسيط جداً .. و حاحدد لنفسي نسبة صغننة من الربح ( غالباً 10% ) . … … … السبب إني باكتب البوست ده دلوقتي هنا .. هو إني أتمني إن كمان أربع سنين من دلوقتي إن شاء الله .. شخص ما حيكون خد أكشن بناءاً علي البوست ده النهاردة .. و قرر إنه يتعب نفسه و يصرف وقت و مجهود عشان يبني شيء ما ( ديجيتال أسسيت ) معينة .. و حيكتب بوست مشابه عنده يشرح للناس إزاي إن أى بذرة بترميها في الأرض .. و ترويها .. مهما طال الزمن .. بتطرح .. و وظيفتك عمرها ما كانت إنك تنتظر ( طرح الثمار ) ده .. … وظيفتك دايماً في الحياة هي ال ( بذر ) .. و إزاي ترمي ( بذور ) أكتر .. و تروي أكتر .. و أنواع مختلفة أكتر .. و هكذا .. … … و أياً كان اللي يطرح منهم .. نحمد الله علي كل النعم و إنه جل جلاله وفق لنا كل الظروف اللي مانقدرش نتحكم في 1 علي مالانهاية منها .. … … و نكمل بذر .. .. و الله أعلم .