الإنفلونسر .. نايتروس

الإنفلونسر .. نايتروس : الجزء التالت في : ليه باكره الماركتنج بالرغم من إنه جزء كبير من شغلي .

من دقائق .. شفت بوست لإنفلونسر مشهور جداً ( بدون ذكر أسماء ) .. هو طبيب و عنده مطعم و نزل كتاب :) . و كان كاتب فيه كلام جميل ما شاء الله عن رحلته من أيام ما كان مش معروف .. لحد ما أصبح مليونير و راكن المرسيدس تحت البيت . البوست تحفيزي جداً ما شاء الله .. تحفيزي و يشجع ناس كتير إنها تتشجع .. تتشجع و … و إيه ؟! … … موتور أى عربية .. عبارة عن مجموعة من المكابس .. بينفجر تحتها بنزين و هوا .. و نتيجة الإنفجار ده .. قوة ضغط عالية بتحرك المكبس .. فيحرك عمود الكرانك .. فيحرك العجل .. و العربية تمشي … بسرعة .. السرعة بتعتمد علي قوة الإنفجار المعتمدة علي ( نوع البنزين و كمية الهوا) اللي تحت المكبس . … زود هوا .. حتزود قوة الإنفجار ( و ده اللي بيحصل في المواتير التيربو ) . زود بنزين .. حتزود قوة الإنفجار ( و ده علي حسب سعة الموتور و حجم السليندرات ) . زود محفذ ( زي النايتروس ) .. حيزود قوة الإنفجار .. جداً … و ده اللي بتشوفه فأفلام ( fast and furious ) . … طب فين المشكلة ؟ مش إحنا عايزين العربية تمشي .. بسرعة ؟ إيه مشكلة النايتروس ؟! . .. الإجابة هي : المفاصل … العفشة يعني .. … … القوة الضخمة الناتجة عن النايتروس دي .. بتروح فين .. بتمشي فمفاصل العربية .. مسمار مسمار .. و صامولة صامولة .. و مهما كانت العفشة قوية .. و تستحمل .. عند مرحلة معينة .. لو زادت قوة الإنفجار عن حد معين .. حاجة حتتكسر .. و مجرد ما صامولة واحدة أحياناً بتتكسر … باقي العربية بالكامل بتبدأ تتدغدغ .. حتة حتة . … … نفس التشبيه ده .. أنا شايفه في المجتمع حالياً .. لما يبقي مقياس النجاح الوحيد هو ( الفلوس ) بس .. بالظبط كأنك بتقيس نجاح أى عربية ب ( السرعة ) بس .. فالنتيجة هي إن عشان أوصل لأعلي سرعة ممكنة .. مش مشكلة أدمر العفشة بتاعت العربية .. أو حتي تولع كلها .. المهم إني أكون الأسرع .. … … اللي عمله و بيعمله أى إنفلونسر حالياً … مش وصفة سحرية محتاجة مقادير مش فمتناول العامة .. إطلاقاً … أى حد معاه موبايل بكاميرا .. يقدر يبتدي ( ينتج ) محتوي .. و معيار ( قبول ) الناس ده … معيار بتنجاني للغاية .. لا يقيس أى شيء إطلاقاً .. لأن في عالم الإنترنت المفتوح بالكامل .. أى سلعة .. مهما كانت .. حتجد مشتري .. و إتنين .. و عشرة . … كل اللي إنت محتاجه عشان تزود عدد متابعينك .. مش إطلاقاً إنك تحسن نوعية إنتاجك .. و لكن إنك تستمر .. تستمر في الإنتاج .. بلا توقف .. تستمر في ضخ البنزين و الهوا تحت المكابس بتاعتك .. و تستمر .. و عند مرحلة معينة .. حتكتشف إن شرارة واحدة .. كفيلة بتفجير الخليط المضغوط ده من الكم الكبير من المحتوي .. و يحصل الإنفجار . … … و حالياً .. علم ( الشرارات ) ده .. أصبح علم مشهور و بيتم تدريسه .. إسمه ( how to go viral ) .. أو إزاي أحقق الإنتشار الفيروسي ده و أبقي تريند .. كل اللي إنت محتاج تعمله علي العام مثلاً : 1- إشتم حد الناس بتحبه . 2- إعلن حبك لحد الناس بتشتمه . 3- غني .. خصوصاً لو صوتك وحش و نشاز . 4- إقلع .. خصوصاً لو بنت . 5- عارض أى شائع .. و إعتنق أى غريب . 6- خالف … تُعرف . … … الخطوات دي مش علم جديد أو الناس لسة مكتشفينه من كام سنة .. إطلاقاً .. الخطوات دي مذكورة بالحرف فكتب علوم الإجتماع و النفس من مئات السنين .. و كان بيستخدمها أى حد عايز يسلط الضوء علي نفسه .. و لكن زمان .. تسليط الضوء علي نفسك ده كان في حد ذاته مش هدف .. بل كان وسيلة عشان توصل لهدف تاني ( سياسي أو ديني أو عسكري ) .. و لكن دلوقتي .. تسليط الضوء علي نفسك .. أصبح الهدف .. لأن منصات الإنترنت المختلفة .. ربطت الهدف ده بالفلوس .. بعلاقة مباشرة . … … … فنتيجة طبيعية دلوقتي .. إن في مجتمع عدد أفراده ألف شخص مثلاً .. واحد منهم أصبح يمتلك ثروة نتيجة تسلسل خطوات معين .. و الثروة دي بتزيد بشكل مضطرد ما شاء الله .. مما يمكنه إنه يشتري و يقتني أغلي حاجات في المجتمع ده ( أغلي شاليه .. و أغلي عربية مثلاً ) .. إيه اللي حيحصل ؟ … ببساطة .. تاني أغني واحد بعده .. حيحس إنه بيخسر .. و حيحاول يعلي سرعته هو كمان .. و يبقي أغني .. ليه ؟! عشان يضمن قدرته علي إمتلاك ( أغلي شاليه .. و أغلي عربية ) .. و لما يوصل إنه يمتلك نفس السعر … إيه اللي حيحصل ؟ … ببساطة صاحب ( أغلي شاليه .. و أغلي عربية ) حيعلي السعر .. لأن في إتنين عارضين عليه نفس السعر لسلعة معينة .. فنتيجة لزيادة الطلب .. حيغلي المعروض .. … و تكون النتيجة إن صاحب ( تاني أغلي شاليه .. و تاني أغلي عربية ) هو كمان حيعلي السعر عشان يفضل الفرق بين السلعتين ( الغالية .. و الأغلي ) ثابت . … و بعدين ؟ و بعدين تالت أغني واحد .. و رابع .. و هكذا .. المجتمع بالكامل ( الألف شخص دول ) .. حيتحركوا كلهم في إتجاه واحد بس .. الفلوس .. بس . … … و لأن المجتمع من اللحظة الأولي .. ماقرنش و ماربطش بين ( الفلوس ) .. و الطريقة اللي جات بيها الفلوس دي .. فأى حد مجرد ما يجمع القدر الكافي من الفلوس .. حيقدر يمتلك أغلي السلع اللي موجودة في المجتمع .. حتي لو كان وصل لده عن طرق غير شرعية و غير أخلاقية . … مش معني كده إن كل اللي معاهم فلوس بيمارسوا طرق شرعية أو غير أخلاقية .. و لكنهم قبلوا إنهم يكونوا ضمن سباق بيحدده معيار واحد بس .. الفلوس .. و أصبحوا بيعلنوا عن إنجازاتهم في المضمار ده ( الفلوس ) .. بنفس الطريقة اللي أى حد معاه فلوس بيعملها .. أصبحوا بيعلنوا إنهم ( نجحوا ) .. و إشتروا أغلي السلع . … … … و بعد فترة مش بعيدة .. بنبدأ نلاقي الشروخ بدأت تظهر فكل مكان جوة المجتمع .. صواميل فكت .. و مسامير إتكسرت .. و لكن خلاص .. مافيش فرامل .. الفرامل كانت أول حاجة تم التضحية بيها في سبيل سباق السرعة .. الأخلاق و الشرائع كانت أول حاجة تم التضحية بيها في سبيل سباق الفلوس .. … و حادثااااااااااااااه … … … … طب إيه الأكشن الصح أو المناسب فوجهة نظري ؟! … إقدر إنك تبقي إنت اللي سايق عربيتك .. أياً كان نوعها إيه .. و إطلع من السباق .. يعني : أوصل إنك تبقي متحكم فحياتك مادياً .. و قدر المستطاع إبدأ إمشي فطريقك بدون ما تنافس علي أغلي السلع .. و ماتحسسش أى حواليك إنك بتسابق .. ماتعلنش عن نجاحك بالفلوس .. و إفهم إن سباق الفلوس ده … دايماً آخره حادثة .. … و لما تكلم الناس عن نجاحك .. قدر الإمكان .. كلمهم عن العالم الواسع اللي ربنا خلقه .. برة الطريق الضيق اللي بيتسابقوا فيه .. … … و لما تحط لنفسك هدف .. تمشي وراه شوية .. ماتحطش الهدف ده عربية سابقاك شوية علي طريق الفلوس .. و دور علي ناس قدرت تهرب .. تطلع برة السبق ده .. حتي و لو علي عجلة مش عربية .. أو علي رجليها .. … … و الله أعلم .