عن الإنفلونسرز

عن الإنفلونسرز .. … من 70 سنة فاتوا تقريباً .. أحد أهم رواد زمن الفن الجميل .. و علامة من علامات الحضارة و الثقافة الفنية المصرية الأصيلة .. و يمكن بمصطلح العصر الحالي .. كنا نقدر نقول عليه واحد من أهم ال ( إنفلونسرز - مؤثرين ) في زمنه .. شكوكو 🤣🤣. مشهور له قصة مع حد مغمور شوية .. ناس كتير ماتعرفهوش .. و ممل و بيكتب كلام مجعلص و معقد زي إسمه .. اللي هو ( عباس محمود العقاد ) . . واحد صحفي أيامها حب يعمل تريند .. راح ل ( العقاد ) .. و قال له ( تفتكر مين أشهر .. إنت ولا شكوكو ؟! ) . العقاد رد عليه بإستغراب ” مين شكوكو ؟!! ” .. مش باقول لك إنه كان ممل و معقد 😤😡.. مين ده اللي مايعرفش شكوكو في الخمسينات في مصر ؟! .. . الكلام ده وصل ل ” شكوكو ” .. ف راح قايل للصحفي رد قصف فيه جبهة ” العقاد ” .. و قعّده في بيته .. و علّم عليه .. و عرّفه مين هو بابا المجال في مصر أيامها 🤣 . . شكوكو قال للصحفي : ” قول للي إسمه العقاد ده ينزل ميدان التحرير و يقف علي رصيف .. و أنا حانزل قصاده فارس ل فارس .. و أقف عالرصيف التاني .. و شوف الناس حتتلم علي مين أكتر ” . . شوف قوة الرد من شكوكو ؟! .. مش باقول لك شكوكو ماكنش سهل يابا .. كان فاهم الدنيا كويس و عارف ياخد حقه بدراعه صح . . المهم .. اللي إسمه ” العقاد ” ده .. رد بعد كده رد بايخ و ممل جداً .. رد بيوضح هو إزاي مش فاهم فعلاً الناس ولا البلد الأصيلة دي .. بلد السبحتلاف سنة حضارة .. بلد الناس الطيبة اللي بتحب النكتة و دمها خفيف . . العقاد رد و قال : قول ل شكوكو ينزل يقف علي رصيف في التحرير ماشي .. و هات رقاصة وقفها علي الرصيف المقابل .. و شوف الناس حتتلم علي مين أكتر . … القصة دي مشهورة بالمناسبة .. و إتكتب عنها كتير .. … من 70 سنة .. كان جدك هو اللي حاضر الكلام ده في شبابه أيامها .. كان غالباً في العشرينيات أو التلاتينيات .. و كان لسة بيسمّي الله و يبتدي حياته .. كان بيتعب في الشغل في الشركة أو المحل أو المصلحة عشان يجيب لجدتك الأكل و الفلوس .. و يرجع بالليل آخر اليوم عايز يريّح دماغه .. يروح مشغّل الراديو .. ( أو لو كنتوا أغنية شوية .. يشغل التيليفزيون ) .. و يختار شكوكو .. عشان يضحك .. عشان يريح دماغه .. عشان يصحي تاني يوم فايق و رايق إنه يروح الشغل في الشركة أو المحل أو المصلحة .. و يجيب لجدتك أكل و فلوس … و هكذا . … غالباً باباك إتولد في الجو ده .. شاف أبوه ( اللي هو جدك ) .. بيتعب فعلاً عشانه و عشان أسرته .. بيعرق و ينهج و يشتغل و يفحت في الصخر .. و يرجع آخر اليوم .. يضحك قدام شكوكو .. .. باباك شاف جدك و هو بيحب شكوكو .. باباك هو كمان حب شكوكو .. أصل مين مش حيحيب حد بيلبس أراجوز و يقول نكت و يهز وسطه ؟! . … و ملايين من المصريين كانوا زي باباك و جدك .. طلع منهم أجيال كتير بتقدس شكوكو .. الطلب علي شكوكو و اللي شبهه بقي عالي أوي .. و الدنيا عرض و طلب , صح ؟ .. و اللي الطلب عليه كتير .. تمنه بيبقي غالي .. و شكوكو و أمثاله بقوا نجوم المجتمع . … من 80 سنة .. كمية ضخمة من المقالات إتكتبت في الجرائد عن خطر الطريق اللي ماشي فيه الممثلين و المغنيين المصريين .. و إزاي إن اللي بيعمله الوجوه الجديدة زي ( عبد الحليم , أم كلثوم , عبد الوهاب , … و غيرهم ) إنحلال و حيؤدي لدمار قيم كتير جداً في المجتمع . . و جزء كبير جداً من المقالات دي .. كان اللي كاتبه ناس أبعد ما يكونوا عن التيار الديني بالمناسبة .. . الرد الأيقوني اللي إترد عليهم أيامها .. كان .. و ما زال حتي النهاردة هو : حق الإختيار مكفول للجميع . اللي عايز يروح الكباريه يقدر يروح .. و اللي عايز يروح المكتبة يقدر يروح .. و اللي عايز يروح الجامع يقدر يروح . … جدك زمان .. إختار الإختيار الأسهل و اللي كان متاح قدامه .. و بكل المنطق اللي كان عنده أيامها .. هو ماعملش حاجة غلط . . لكنه مافكرش فتأثير ده علي أبوك .. اللي طلع يعرف شكوكو و يحبه و عنده إستعداد يقف في جمهوره في ميدان التحرير .. و ماعرفش عن حد زي ” العقاد ” .. غير إنه في منهج المدرسة الممل . . و ده بالتالي أثّر عليك إنت حالياً .. إنك شايف كل اللي بيحصل حواليك .. و التجويع و التنكيل اللي بيحصل في أهالينا .. و دماغك قاعدة بتعمل إيرور !! . . لأنك للأسف مضطر تخترع العجلة من جديد جوة دماغك .. و كإنك بتتعرف علي البشرية من أول و جديد .. راجل في منتصف التلاتينات أو الأربعينات .. و لكنك بعقل طفل مايعرفش أى شيء عن التاريخ أو المنطق أو العقيدة .. فطبيعي جداً تكون قيمتك .. قيمة طفل .. سهل تجيبه أو توديه بشوكولاتاية .. او ترقية .. أو شوية فلوس . … هل أقول لك إقرأ عبقريات العقاد ؟! ( عبقرية سيدنا محمد , عبقرية أبو بكر , عبقرية عمر , … ) إنت عارف أساساً هما كام مجلد ؟! طب عارف هو إعتمد علي إيه في كتابة العبقريات دي ؟! طب عارف قصص المجاعات اللي عدت علي المسلمين قبل كده ؟! .. بداية من شعب أبي طالب ؟! .. عارف ده حياخد منك وقت و مجهود قد إيه ؟! .. و لكن الأهم .. عارف بعد ما تعمل ده ( لو عملته ) .. إنت حتبقي عبارة عن إيه ؟! . حتبقي إنسان .. مش تايه .. مش مُغيب .. أو الأهم .. مش سهل إن حد يضحك عليك .. عارف لو في مليون واحد منك بقي .. هل تتوقع إنكوا حتدوروا علي رصيف شكوكو تقفوا قدامه ؟! … إنت بتتعب .. أنا عارف .. بتشتغل و تتفحت طول اليوم عشان تجيب فلوس و أكل لأهلك .. و فآخر اليوم .. بتبقي عايز تفك شوية .. و تضحك شويتين قدام شوية إنفلونسرز بيضحكوك .. او ممثلين بيهروا أى كلام و خلاص .. حقك .. فاهمك . .. و فاهم جداً جداً إنك شايف إنك خلاص .. صعب دلوقتي تلاقي الدماغ الرايقة اللي تقعد تقرا كلام مجعلص .. مش بعد ما شاب ودوه الكُتّاب .. صح ؟! .. لكن كمان 20 سنة من دلوقتي .. إبنك اللي قاعد علي حجرك و شايفك بتضحك ده .. حيكبر يبقي شبهك بالظبط .. هو اللي حيبقي إسمه راجل .. تحب يبقي واقف فين كمان 20 سنة ؟! .. … الدنيا مابتتغيرش في يوم و ليلة .. ربنا مأنزلش القرآن كله في يوم واحد .. مع إنه من قدرته إنه يقول للشيء كن ف يكون . ربنا مخلقكش تعيش لحظة .. و لكن تعيش سنين كتير .. و تتكاثر .. و تورّث ولادك صفاتك .. و أفكارك .. . دلوقتي إنت حاسس بالضعف و الذل و المهانة و العجز .. ده حصاد زرع إتزرع من سنين طويلة زمان .. إبدأ إزرع من دلوقتي .. عشان تحصد كمان 10 سنين .. أو 20 سنة .. .. و الله أعلم إيه اللي ممكن يحصل .. .. الله أعلم .