عن كأس العالم للألعاب الإلكترونية في السعودية أبو 500 مليون

عن كأس العالم للألعاب الإلكترونية في السعودية أبو 500 مليون دورار . … زماااااااااان .. سنة 2015 تقريباً .. فلقطة فمسلسل ( The good wife ) اللي كنت باتفرج عليه أيامها .. شخصية في المسلسل إشتري حاجة معينة بال ( بيتكوين ) .. و عشان كده ماحدش عرف يعمل تتبع لعملية الشراء دي .. و الحوار خد دقيقتين بالعدد في الحلقة دي في المسلسل . الموضوع شد إنتباهي .. عملت سيرش .. و خلال أيام كنت وقعت في غرام تكنولوجيا ال ( Blockchain ) و ال ( كريبتو ) .. و كل الكلام اللي أصبح معروف لكل العامة حالياً .. .. و زي أى حاجة بتشد إنتباهي .. بتستحوذ عليه بالكامل .. و بعدين بابدأ أتكلم فيها مع الداني و القاصي .. علي مدار الأسبوعين التاليين .. ماكنش في قعدة باقعدها مع أهلي أو أصحابي غير و أقعد أكلمهم عن الحاجة العجيبة دي .. و هما يطنشوني أو يتريقوا عليا 😅 . و بعدين سؤال صديق منهم إستفذني إني أشرح له عن التكنولوجيا دي .. و عملت ال3 فيديوهات اللي علي يوتيوب لحد يومنا الحالي و أنا باشرح تفاصيل الليلة دي كلها .. أيام لما كان البيتكوين الواحد بيساوي ( 12 دولار ) 😅 .. و هو حالياً بيساوي : 60 ألف دولار تقريباً 🤣🤣🤣 .. … … محادثاتي مع أصدقائي برضو .. و نقاشاتي مع أهلي مازالت مسجلة إزاي إني كنت باشرح لهم إن في تكنولوجيا جبارة لسة ماحدش كتير بيتكلم عنها إسمها ( CHAT GPT ) .. و الكلام ده بعد ما CHAT GPT طلع نسخة محدودة منه لعدد بسيط يستخدموه .. و كان لسة مابقاش تريند بأى شكل من الأشكال .. و كالمعتاد كانوا بيطنشوني و يتريقوا عليا ( بس أقل بكتييييير من زمان 🤣) .. و حالياً طبعاً مش محتاج أتكلم علي وضع التكنولوجيا دي في العالم عامل إزاي . … … شهر 11 اللي فات .. بلغت أهلي و أصدقائي برضو إني حاكرس جزء كبير من وقتي للجيمز و الألعاب الإلكترونية .. و حابدأ أستريم ( يعني أطلع ألعب لايف علي منصات زي twitch و غيرهم ) .. و كتبت و شرحت عن ده كتير أيامها هنا علي الفيسبوك برضو . و كالمعتاد .. كتير من أهلي و أصدقائي كانوا بيتريقوا عليا .. و إن المفروض إن في مجالات تانية كتير بفضل الله حالياً عندنا فيها تواجد .. و ماينفعش إني أطنش مجالات قائمة و واضحة زي ( التجارة الإلكترونية ) مثلاً .. و أركز في حاجة زي ال ( جيمز ) . و طبعاً و كالمعتاد كنت متفق معاهم إن اللي باعمله ده جنون 🤣.. بمقاييس واقعية كتير جداً .. و لكن معظم المقاييس الواقعية الكتير جداً دي .. مقاييس وضعية من صنع بشر .. يعني بتتغير بإيدين بشر برضو .. و بين يوم و ليلة 😅 … … … علي مدار الأسبوعين اللي فاتوا .. إنتشر أخبار ( كأس العالم للألعاب الإلكترونية ) اللي حيُقام في السعودية .. و اللي جوايزه مئات ملايين من الدولارات .. و إنتشر برضو أخبار إطلاق سيرفرات ( Riot = أحد أكبر شركات الألعاب الإلكترونية في العالم ) في الشرق الأوسط .. بحيث إنه يخدم بشكل مباشر اللاعبين في السعودية و مصر و الإمارات و الدول المحيطة . … … علي مدار الشهور اللي فاتت جاوبت علي أسئلة كتير ليها علاقة بمجال ال( جيمز و الألعاب الإلكترونية ) عموماً ..و علي سبيل المثال لا الحصر :

1- هل ده شيء مفيد ؟! .. يعني أنا باقدم إيه مفيد للبشرية لما بالعب جيمز ؟

الإجابة :

السؤال ده أحد أكبر المصائد اللي بيقع فيها الإنسان المسلم خصوصاً .. لأن ك( مسلم ) .. إنت مطالب طول الوقت إنك تكون واعي بتبذل وقتك و مجهودك فإيه .. و بالتالي .. الشيطان بيدخل للإنسان المسلم من المدخل ده .. عشان يزقه في طريق الرهبانية و الإنعزال عن البشر و الحياة عموماً .. و ده بالكامل عكس اللي ربنا أمرنا بيه كمسلمين . يعني : لعبة كرة القدم مثلاً .. صناعة عالمية علي مدار ال100 سنة اللي فاتوا .. و مليارات من البشر بيتابعوها و متعلقين بيها .. هل تقدر تقول إن لاعب كرة القدم مش بيقدم شيء مفيد ؟ .. تبقي سطحي جداً للأسف .. لأن لاعب كرة القدم .. بيقدم اللعبة اللي الناس بتتفرج عليها فيدفعوا فلوس عشان يشوفوه .. و يدفعوا فلوس عشان يشتروا التيشيرت بتاعه .. و الفلوس اللي بيدفعوها دي هي اللي بتحرك شركات الإنتاج إنها تشتري معدات تصوير أفضل .. فتحرك شركات إنتاج الكاميرات لإنتاج أفضل .. فيدفعوا مرتب مهندس الإلكترونيات اللي شغال في شركة الكاميرات المحترمة دي . و الفلوس اللي دفعوها مقابل التيشيرت .. دي اللي راحت للعمال اللي شغالين في مصانع التيشيرتات .. و المحلات اللي بتبيعهم . فهمتني ؟ … العالم كله في وضعه الحالي بيدور بالمنظر ده .. … ( الأكاديميا عموماً = يعني الناس بتوع الدكتوراة و الماجستير ) دول بياكلوا و بيشربوا منين ؟! .. من فلوس المنح اللي بتقدمها لهم الجامعات .. و فلوس المنح دي بتيجي منين ؟ .. من رعاية المصانع و الشركات اللي مهتمة بأبحاث الدكاترة و الأكاديميين دول .. و المصانع و الشركات دي بتشتغل إزاي ؟! بإنها تبيع منتجات للجمهور .. و البيع ده بيحصل إزاي ؟ .. عن طريق الدعاية الإعلان و التسويق .. و هكذا .. فإنت مثلاً لو شغال دكتور جامعة محترم .. إطلاقاً مش منطقي إنك تبص للاعب كرة قدم إنه أقل منك في القيمة .. إطلااااااااقاً .. بدون لاعب كرة القدم .. دكتور الجامعة مش حيلاقي ياكل . … … … هل معني كده إن أى شيء بيدخل فلوس كتير يبقي صح ؟!

الإجابة :

تاني بتسأل السؤال الغلط .. بالشكل الغلط . الفلوس الورقية بوضعها الحالي عالمياً .. عبارة عن شبكة عنكبوت ضخمة جداً جداً .. و كلها متصلة ببعضها .. و زي أى شبكة عنكبوت .. العنكبوت اللي بيفرز خيوطها و بينسجها ماعندوش أى معايير لل( صح ) أو ال ( غلط ) .. و معياره الوحيد هو ال ( سيطرة ) الكاملة .. يعني أى إنسان عايش بشكل مستقل عن شبكة العنكبوت دي .. هو عدو مباشر للعنكبوت و لابد من السيطرة عليه .. أو إزالته من الوجود . (لو عايز تفهم أكتر عن معني التشبيه المجازي ده .. إقرأ أكتر عن ال(Gold dollar , petro dollar, brics , … ) .. و معيار ال( صح ) و ال ( غلط ) أساساً .. معيار مختل و وهمي .. و متغير بتغير موازين القوة علي مدار التاريخ .. و كإنسان مسلم .. المفروض معيارك الوحيد و الأوحد في قياس الأمور يكون ال ( حلال ) و ال ( حرام ) . و لكن ال( حلال ) و ال ( حرام ) عشان تطبقهم صح .. محتاج تفهم حاجة مهمة جداً جداً جداً .. و هي حالات تواجد المسلم في المجتمع … الإنسان له أربع حالات في التواجد في المجتمع بيفرق معاهم كيفية تطبيق ال( حلال) و ال ( حرام ) . 1- مسلم في مجتمع مسلم .. 2- مسلم في مجتمع غير مسلم .. 3- غير مسلم في مجتمع مسلم .. 4- غير مسلم في مجتمع غير مسلم . .. و فكل حالة من الأربع حالات .. معايير الحلال و الحرام بتتطلب دراية عالية بال (فقه ) . و الفقه هو إنك تكون فاهم كويس جداً جداً جداً ( سياسة + إقتصاد + علم نفس و إجتماع ) .. فوق إنك تكون دارس إسلام و تفسير و علم حديث .. .. يعني .. إنك تكون عالم بالقرآن و التفسير و علوم الحديث .. و لكن غير عالم بطبيعة العالم حواليك ( السياسة ) .. و طبيعة الفلوس فيه ( إقتصاد ) .. و أحوال البشر فيه ( علم نفس و إجتماع ) . . للأسف في الحالة دي ماينفعش تفتي في العدييييييييييييييييييد من الأمور .. .. و العكس برضو .. إنك تكون ( عالم بالإقتصاد و السياسة و علوم النفس و الإجتماع ) .. لكن كل معلوماتك عن الدين و الإسلام هي نشيد طلع البدر علينا .. يبقي ماتفتيش إطلاقاً في الحلال و الحرام .. و لا تطلع و تقول إنك ” مفكر ” إسلامي 🤣 . … … … طيب إنت كده في الغالب لسان حالك هو ( أنا تهت مني , أنا مش أنا ) بصوت عبد الباسط حمودة … صح ؟ 🤣 .. .. اللي عايز أوصل له من الهري اللي هريته فوق ده كله هو :

زمااااااااااااااان .. أيام الإمبراطورية العثمانية .. البشر في أوروبا إخترعوا آلة الطباعة ( ماكينة الطباعة ) … اللي تمكنك من طباعة كتب كاملة في وقت أقل بكتيييييير جداً من كتابتها يدوياً .. و شوية علماء مسلمين أئمة مفوهين ربنا يخفف حسابهم .. أفتوا بحرمانية الطباعة .. و إنها رجس من عمل الشيطان .. و الموضوع بقي خناقة و تريند ( أيام الدولة العثمانية بقي 🤣 ) .. و فين و فين علي ما طلع السلطان العثماني ( بايزيد الثاني ) .. و سمح بإنشاء المطابع في الدولة العثمانية .. لكن بشرط إن اللي ينشئها يكون اليهود و المسيحيين بس ( لأنه مش عايز يعمل حاجة حرام 🤣😅 ) . . و مش بس كده .. لا .. ده شرط إن مايتمش إستعمال الحروف العربية في الطباعة ( عشان يزود الطينة بلة ) … و لو عايز تطبع .. تستخدم اللغة و الحروف اللاتينية الأجنبية فقط . . متخيل ده سبب تأخير قد إيه للحضارة الإسلامية عموماً و العربية خصوصاً ؟ متخيل المصيبة ؟! … … … دورك كمسلم قبل إنك ترفض أى شيء لأنه غريب عليك .. إنك تفكر و تتدبر و تتعلم .. و تشتغل علي دماغك فإنك يكون عندك المؤهلات للتفكير و التدبر و التعلم طول الوقت . و تفهم إن ربنا خلق كل شيء حواليك بشكله الحالي .. ليك إنت .. يعني كل حاجة بتحصل حواليك و إنت شايفها و ساخط و رافض و بتتخانق مع دبان وشك بسببها طول الوقت دي … دي بمشيئة الله القدير وحده . .. و خالقها لك .. و خالقك ليها .. و الله جل جلاله أرحم بيك من أمك و أبوك .. يعني عارف إستطاعتك و قدرتك و عزيمتك .. بس تعيش كإنسان ( بيفكر أولاً ) .. مش كحيوان .. كل قلقه و همه طول الوقت هو فإنه ياكل و ينام و يدور علي أى وسيلة يزق بيها اليوم لحد ما يخلص و خلاص .. … … و الله أعلم .

#إسلام_أسامه_الجويلي