عايز تفهم أحد أهم الفروق بين الإنسان اللي عنده (

عايز تفهم أحد أهم الفروق بين الإنسان اللي عنده ( ADHD ) .. و الإنسان اللي ماعندوش .. أفضل تشبيه ربنا هداني إني أشرحه لأحد أصدقائي حتي الآن عن الموضوع ده هو : نفس الفرق بين المياه … و الصلصال .. … الصلصال .. درجات في ( نشوفيته = بلاستيكيته = Plasticity ) . في معاك من أول الصلصال المحجر .. درجة بلاستيكيته بتساوي صفر .. اللي تشكله بصعوبة جداً .. و لكن أى وضع حتشكله عليه .. و تسيبه سنين .. حترجع تلاقيه زي ما هو بالظبط . .. و علي أقصي الناحية التانية بالكامل .. في المياه .. اللي درجة بلاستيكيتها ضخمة جداً .. اللي هي علي حسب الوعاء أو المكان اللي حتحطها فيه .. حتتشكل عليه بأقصي سرعة ممكنة . … بالظبط نفس التشبيه .. الإنسان العادي .. أقرب بكتير لل ( صلصال ) .. بياخد وقت علي ما يحب الحاجة .. يتمرن عليها .. يتقنها .. و لكنها بعد كدة بتبقي جزء من هويته .. من تكوينه .. لو سبته سنييييييييين .. و رجعت له .. حتلاقيه لسة زي ما هو ( مهندس , طبيب , صنايعي , إداري , … ) و غالباً حتلاقي روتين حياته ماتغيرش كتير .. مهما راح و سافر و إشتغل و غيّر شركات و بيئات شغل و شركاء حياة و أصدقاء .. حتلاقيه لسة زي ما هو .. … أما الإنسان ال (ADHD ) … فده بقي بالظبط زي المياه .. علي حسب إيه المحيط بيه .. علي حسب هو حيتحول خلال أسرع فترة ممكنة لإيه .. . وديه يشتغل في فرقة موسيقية مثلاً و هو عمره في حياته ما كان له في الموسيقي .. حتلاقيه خلال أسبوع تقريباً بقي بيتكلم بلغة الكار و فاهم أغلب الآلات الموسيقية بتشتغل إزاي .. و غالباً حتلاقيه بدأ يلعب آلة منهم . . خده بعد الأسبوع ده .. وديه في شركة مالتيناشيونال بتتعامل في أدق تفاصيل ماليات و إقتصاديات السوق .. و حتلاقيه بعد أسبوع بالظبط ضارب القميص السماوي المكوي علي الكرافتة السمرا علي البنطلون الكحلي .. و بيتكلم ولا كأنه كان عايش في (Wall street ) . … و لكن … ( و السبب إني إخترت المجالين دول كأمثلة - اللي هما الموسيقي و الإقتصاد و البيزنس ) .. إن : المجالين دول .. صعب جداً .. جداً جداً .. تتقنهم بالشكل الكافي إنك فعلاً تكون محترف .. سهل جداً جداً إنك تقول كلمتين علي بعض بسرعة .. فيتوهم اللي قدامك إنك فاهم .. و لكن .. أى حد محترف فعلاً لو قعد معاك .. بعد خمس دقائق بالظبط حيكتشف إنك بالونة منفوخة هوا و فاضية من جوا . … هل ده لأنك بتحاول تنصب عليه مثلاً ؟ .. أو توهمه بحاجة مش حقيقية ؟! .. إطلاقاً .. و لكن ( لو إنت مش فاهم عقلك شغال إزاي ) .. إنت نفسك بتكون وهمت نفسك إنك ( فهمت كل حاجة في العالم ده بأسرع وقت ) . و ده بيكون وهم .. مش حقيقي .. إنت بس إتشكلت بسرعة أوي أوي علي هيئة العالم اللي إنت تواجدت فيه لمدة بسيطة .. بالظبط زي الحرباية . … و لأن ده مش شيء سهل إطلاقاً بالنسبة للناس العاديين .. فإنت فعلاً بتكون بالنسبة لكل اللي حواليك ( إستثنائي ) .. لأنك بتتعلم بسرعة جداً .. مش لأنك أذكي أو أكثر مهارة .. إطلاقاً .. و لكن لأنك ( بدون إرادة منك ) بتلاحظ كل شيء حواليك .. تركيزك بيتشتت بين كل حاجة حواليك .. فبتلقط كل الحاجات الصغننة اللي بتساعدك تكون صورة سريعة جداً .. أى حد يشوفها من بعيد .. يفكر إنها صورة كاملة .. … علي عكس الإنسان العادي .. اللي إنتباهه متركز أفضل منك بكتير .. و بيركز في اللي هو محتاج يشتغل عليه بس .. فأى حد بيشوفه من بعيد .. بيلاقيه كوّن جزء صغير جداً من الصورة الكاملة .. … المقارنة بينكم من بعيد بتكون ظالمة جداً للإنسان العادي .. لأنك أى حد شايفك من بعيد .. شايفك خلاص .. فهمت كل حاجة و عرفت كل حاجة .. و لكن .. بمجرد ما يتقرب منكم إنتوا الإتنين .. ( كإن يتعمل عليكم زووم بالظبط ) .. هو بيكون عنده تفاصيل الجزء الصغير اللي هو ركز عليه .. و لكن إنت الصورة الكاملة بتاعتك دي .. بتبكسل .. بتكتشف إن كل التفاصيل تقريباً مش موجودة .. و إنت نفسك بتتفاجئ ب ده .. إنت بتتفاجئ .. إزاي .. ده أنا فاهم المنهج كله .. ده أنا كنت باشرح للناس إزاي يفهموا الأجزاء دي .. ده أنا كنت باذاكر منهج رابعة و أنا لسة في سنة تانية .. ده أنا والله عارف كل شيء عن كل شيء عن العلم ده .. و لكنك .. ماعندكش أى قدرة .. إطلااااااااقاً .. علي إنك تفتكر التفاصيل الصغيرة .. و لو حاولت .. بتتلخبط .. بتتشتت .. بتنسي .. و الدنيا كلها بتضرب بظرميط جوة دماغك . … طب ده معناه إيه ؟! .. معناه إنك معيوب ؟! .. بايظ ؟! .. ماتنفعش ؟! .. مش مفيد ؟! .. إطلاقاً .. بالعكس .. إنت مميز جداً جداً .. و لكن لو تم إستخدامك صح .. أو إنت إتعلمت تحط نفسك في المكان الصح . … إنت تقدر تكون صنايعي ممتاز جداً .. و تتخصص فأدق تفاصيل و أعماق الحاجة اللي إنت نفسك فيها .. لدرجة إنك حتبدع أحسن من أى حد .. و لكن بشرط .. ( و دي الحاجة الصعبة هنا ) .. إنك حتلغي كل حاجة تانية من حياتك … مش بس هوايات أو إهتمامات أو أنشطة … لا … ده حتي أى شيء ممكن ياخد من إنتباهك أو تركيزك بدون إرادتك .. … أنا جبت 99% في تالتة ثانوي عام بفضل الله ( كنت أيامها لسة ماعرفش كل الكلام اللي فوق ده ) … و لكني كنت عايز أنافس أصدقائي .. و أفرّح أمي بيا و ماشوفهاش زعلانة لما كنت باتفرج علي التيليفزيون أو أقرا كتب غير دراستي . ( الكلام ده سنة 2004 - 2005 … يعني قبل الموبايلات و النت و الكلام ده كله ) .. فكنت بأقسم علي نفسي إني مش حادخل أساساً أوضة التيليفزيون لمدة أسبوع .. و أقسم علي نفسي إني مش حاشتري أو أستعير كتب و روايات .. و أقسم علي نفسي إني مش حاطلع من أوضتي أساساً لمدة 10 ساعات مثلاً .. و فضيت أوضتي من أى شيء غير الكتب و الملازم بتاعت الدراسة .. … و بمجرد ما كنت باعمل كده .. و أكوّن حوالين نفسي وعاء مافيش منه مخرج تاني لإنتباهي و عقلي و تركيزي .. خلال أقل من ساعة .. كنت باغطس فأعماق أعماق المواد اللي قفلت علي نفسي الأوضة معاها .. … دي كانت حياتي حرفياً في ثانوي عام . … بعد ثانوي .. و في الكلية و ما بعدها .. فشلت في إني أقفل نفسي في وعاء معين .. لأن الحياة كانت مليانة كل ال( أخرام و المنافذ و المساحات ) اللي عقلي و طاقتي و إنتباهي كانوا بيتحركوا لها طول الوقت . .. النتيجة .. فشل أكاديمي .. و فشل في إني ( أتخصص ) في أى شيء لمدة طويلة جداً من عمري .. لدرجة إن ال (CV ) بتاعي لأطول مدة فحياتي كان أول جملة فيه هي : ( Jack of many trades , almost master of some = يعني : سبع صنايع .. و شبه بافهم في شوية حاجات ) .. … و لأطول فترة في حياتي كنت شايف إن ده عيب ضخم فيا .. و لكن عند مرحلة معينة في حياتي .. إكتشفت إن كل وعاء قعدت جواه فترة لحد ما إتكونت عليه و أصبحت شبهه خلال فترة قصيرة جداً .. ترك فيا ذكريات .. ترك فيا خبرة .. … الإنسان ال (adhd ) طول الوقت بيكون عايش في رعب .. إنه لما بيلاقي نفسه إتشكل بالكامل علي وعاء جديد .. بيظن إنه نسي كل شيء هو كان بيعمله قبل كده .. أو لو قعدت فترة بدون شغل مثلاً .. بيبدأ يصدق إنه نسي كل دراسته و خبرة شغله السابقة .. .. ده مش حقيقي .. إنت مش ناسي .. لأنك أساساً ماكنتش فاكر أو محتفظ في ذاكرتك بشيء .. إنت بس إتكونت و إتشكلت علي حسب وعاء جديد .. حتي لو كان الوعاء ده هو بيتك و أوضتك بدون شغل .. .. و لكن .. بمجرد ما تفهم ده عن نفسك .. حتفهم إن دورك كان عمره ما إنك تفضل محتفظ بكل تفاصيل دراستك و شغلك السابقين ( لأنك مش صلصال .. ربنا ماخلقش عقلك إنه يكون كده ) .. . و لكن .. أى مكان حتتحط فيه .. حتكتشف إن عقلك فاكر ملامح كل شيء إنت عديت بيه قبل كده … الملامح .. مش التفاصيل … و بين الملامح و التفاصيل فرق ضخم . . الملامح هي اللي بتساعدك إنك تشوف علاقات أكتر .. أسرع .. و تتأقلم أسرع بكتير .. … مكانك في الشركات ( لو لسة بتقدّم يعني ) .. مش إنك تتحط فمكان شبهك ( لأنك مافيش شبه لك ) .. و لا إنك يتبني حواليك منظومة ( يعني إنت مش إداري و لك أسلوب معين .. و بتاخده معاك من شركة ل شركة ) .. . مكانك في الشركات .. بالظبط زي الدم .. تتساب شوية .. تمشي بين كل الأقسام و التفاصيل و المكاتب .. و تدريجياً .. حتشوف حاجات ماحدش غيرك شافها .. و حتملي فراغات ماحدش غيرك يقدر يملاها . . فاهم إن ده مش سهل إنك تشرحه ل (HR ) بتاع شركة إنت بتقدم فيها .. . و لكن .. ده المفروض يساعدك تأهل نفسك قبل ما تقدم أساساً .. أو .. و ده الأهم .. تفهم إنت ممكن تشتغل علي نفسك إزاي .. عشان تتعلم أو تتمرن أو تتدرب . … المياه .. مهما حاولت تشكلها زي الصلصال .. حتفشل .. و لكن صمم لها وعاء .. و حطها فيه .. حتملي كل الوعاء ده فأسرع وقت .. .. و الأهم .. ( و ده سبب إن الناس ال adhd مميزين جداً ).. هو إن المياه ممكن تتحرك .. و تنقل طاقة .. و تولد كهربا و بخار و حضارة كاملة … الصلصال مايقدرش يعمل ده .. .. يعني .. دورك مش إنك تكون صلصال بتحاول تتشكل علي شيء و تقف مكانك .. … و الله أعلم .