( إنت إتغيرت .. و بطّلت تحبّني زي الأول 🥲😭)

( إنت إتغيرت .. و بطّلت تحبّني زي الأول 🥲😭). … الجٌملة الأيقونية دي .. أحد أكثر الجٌمل تكراراً في حياة البشر علي مدار التاريخ .. و اللي هو غالباً لو في حضارة كائنات فضائية كانت بتدرسنا علي مدار ال1000 سنة اللي فاتوا مثلاً .. و قرروا إنهم لما يتكلموا معانا .. يستخدموا أكثر جٌملة مٌعتادة و مألوفة بالنسبة لنا .. حيكون أول خطاب رسمي من سفير كوكبهم لنا هو : ” إحم إحم ..من قادة كوكبنا لأهل كوكب الأرض .. إنتوا إتغيرتوا .. و بطّلتوا تحبّونا زي الأول . ” .. و بعدين لو كانوا مركزّين في دراستهم ل دولة مصر بالذات خلال آخر 15 سنة .. أتوقع جداً إن تاني جٌملة في الخطاب تكون : ” أمّا بعد … فيييييييييجووووووووو الدخلللللللاااااااااااااوييييييييي ” 🤣🤣🤣🤣 … تعالي نتسائل شوية معلش .. ليه الجٌملة دي بالذات .. مٌتكررة طول الوقت و فكل مكان بالمنظر ده !! . … المشاعر … لٌغة عامة بين كل البشر علي مدار التاريخ .. الحٌب هو نفس الحٌب .. من عمّو اللي كان فاتح كشك جنب قصر هولاكو أيام المغول .. لحد طنط اللي واقفة في كانتين البيت الأبيض بتبيع ملبّس . نفس الحب و نفس الكره و نفس الغيرة و نفس الخوف .. المشاعر مابتختلفش بإختلاف اللغة ولا الزمن ولا المكان . … لكن .. الجٌملة دي مش بس عن ال ( مشاعر ) .. الجٌملة دي كمان عن ال ( تغيّر ) .. .. يعني .. في ناس ممكن تعيش في أماكن مابيحصلش فيها تغيّر لأى شيء إطلاقاً في الحياة ( نفس درجات الحرارة , نفس المناظر الطبيعية , نفس البرامج في التيليفزيون , و دايماً الأهلي بيغلب الزمالك 🤣 , .. ) .. فبالتالي .. بيكون الشيء الوحيد اللي بيلاحظوا ال ( تغيّر ) فيه .. هو ال ( مشاعر ) .. اللي هي الشيء المٌشترك الأكبر بينهم جميعاً ك بشر . … و الجٌملة دي ( إنك إتغيرت و مابقتش بتحبّني زي الأول ) .. بتعبّر عن إدراك مٌهم جداً جداً جداً جداً .. و هو : إدراك تغير لمتعدد !! . … يعني إيه ( تغير ل متعدد ؟! ) .. يعني : تغير أكتر من حاجة في نفس الوقت مع بعض . المشاعر إتغيرت : مقدار الحب و طريقته . و الوقت كمان إتغير : يعني دلوقتي .. مٌختلف عن زمااااااان .. و الشخص الأول ( إنت ) : إتغيرت عن زمان . و الشخص التاني ( هي ) : إتغيرت كتير عن زمان . … زماااااااان .. فأول العلاقة .. كان بيجيب وردة حمرا .. النتيجة : هي تفرح جداً جداً جداً .. و إنت تفرح جداً جداً جداً بناءاً علي فرحها ده … ف هي تفرح أكتر ب فرحك .. و إنت كمان .. و هكذا و هكذا . … دلوقتي .. بعد سنيييييين طويلة .. لما برضو بتجيب وردة حمرا .. النتيجة : هي مش بتفرح … ف إنت مش بتفرح .. ف هي بتضايق .. ف إنت بتضايق .. و هكذا و هكذا . … إيه السبب ؟! : .. إنها هي اللي إتغيرت .. طبيعي .. زي أى إنسان في الحياة .. ف أصبحت في مكان مٌختلف تماماً عن زمان . .. بالظبط زي لما بتكون بتلعب كورة مع صاحبك … و عايز تعمل له ( ثرو - بينية ) 🤣 .. مش بتباصي له في مكانه … و لكن بتباصي له في مكان بعيد قٌدّامه .. ف أثناء ما هو بيجري .. يلاقي كورتك وصلت له . … هي كمان .. إتغيرت .. و أصبح الحاجة اللي بتؤدي لنفس مقدار السعادة بتاع الوردة بتاعت زمان .. مش هي الوردة بتاعت زمان .. و لكن قد تكون حاجات تانية زي ( ساندوتش شاورما .. ساندوتش شاورما إكسترا تومية .. نص مشكّل .. نص مشكّل زائد طرب .. ساندوتش شاورما زائد نص مشكّل زائد طرب زائد ورق عنب ) . … فبالتالي … لو كان زمااااااااااااااااااااان .. الوردة بتؤدي ل لحظة حب بتساوي ( 42 ) مثلاً . و لكن دلوقتي .. نفس الوردة بتؤدي ل لحظة حب بتساوي ( 1 ) !! . . ف ده مش لأن الوردة إتغيرت .. ولا مقياس الحب إتغير .. و لكن .. إنت إتغيرت .. هي إتغيرت .. و الزمن إتغير . . ف أصبح حالياً .. عشان تحصل علي لحظة حب بتساوي ( 42 ) .. إنت محتاج ( ساندوتش شاورما إكسترا تومية و كولا دايت ) 🤣. . و في المٌستقبل .. بعد سنييييييييين كتير يعني .. عشان تحصل علي نفس لحظة الحب اللي بتساوي ( 42 ) دي .. غالباً حتحتاج حاجة مٌختلفة .. لأن المعدة خلاص مش حتستحمل الشاورما ولا التومية .. و غالباً جداً ممكن تلاقي إن الحاجة دي هي مرة تانية .. وردا حمرا .. بل .. ممكن جداً نفس الوردا الحمرا دي .. تؤدي ل لحظة حب بتساوي : 99 . … كل اللي أنا شرحته فوق ده بقي .. هو : التفاضل و التكامل 🙂 .. آه والله العظيم . .. ببساطة .. التفاضل و التكامل .. هو : ( التفكير في التغير ) … بس كده .. .. و دي كانت هي المرحلة التالتة في التفكير في حياة ( لايبنز ) .. أحد أشهر إتنين معروف عنهم إنهم ” إخترعوا ” علم التفاضل و التكامل . مع إن الحقيقة فيها تفاصيل كتير جداً أكتر . … لايبنز زي ما شرحت في البوستات اللي فاتوا .. أبوه ( أستاذ الفلسفة ) مات و هو عنده 6 سنين . و ساب له مكتبة ضخمة جداً .. أغلبها كتب عن ( المنطق و الفلسفة ) .. … و علي مدار طفولة لايبنز و بدايات شبابه بالكامل .. كل حياته كانت محاولة للإجابة علي أسئلة كتيييييير عن : هو العالم كده ليه ؟! ليه حروب ؟! ليه ألم ؟! ليه مٌعاناة ؟! ليه غباء بشر ؟! ليه الأهلي دايماً بيغلب الزمالك ؟! . … و زي أى إنسان ( غالباً كان برضو عنده adhd 🤣) .. السعي للإجابة علي الأسئلة دي بيكون ( بالمنطق ) . . لكن زي ما شرحت في البوستات اللي فاتت .. أى سعي للإجابة بشكل منطقي علي أسئلة عامة في الحياة .. بينتهي بإدراك إن : المنطق ذات نفسه في العام .. غير منطقي . … و بعد ما بيتخانق لايبنز مع نفسه .. و يكتشف إن المنطق و الفلسفة .. جامدين .. ثابتين .. مش بيراعوا تغيرات الحياة .. ولا تغيرات الأسعار .. و إن البنزين كل شوية بيغلي 🤣 . .. ف بيقرر يبحث في ده .. يبحث في ( التغير ) .. .. و عند النقطة دي .. بيكتشف كنز ضخم في مكتبة والده .. و هو : كل أبحاث و دراسات علماء كتييييييييير ( أغلبهم مسلمين بالمناسبة ) في الموضوع ده بالذات .. .. أبو جعفر الخازن .. رحمة الله عليه .. شرف الدين الطوسي .. رحمة الله عليه .. عٌمر الخيام ( أينعم هو بتاع الرٌباعيات 😅 ) .. رحمة الله عليه . . و غيرهم كتير من ( العلماء و الفلاسفة المٌسلمين ) رحمة الله عليهم .. كلهم كانوا توصلوا لأهمية دراسة ال (تغير ) .. و بالفعل أجابوا علي أسئلة كتيييييير زي : ( تحسب إزاي مساحة تحت منحني , تجمع عدد ضخم من الأرقام التربيعية أو التكعيبية المتسلسلة , تحدد أعلي أو أوطي نقطة في منحني إزاي , … ) . … عٌمر الخيام ذات نفسه .. كان بيحل معادلات تكعيبية بشكل هندسي .. و يحسب أماكن تقاطع المنحنيات . … كل اللي فات ده .. تفاضل و تكامل .. .. و لكن .. لو إنت ماقضيتش وقت كفاية تكسر خوفك من مصطلحات غريبة علي حدسك الطبيعي .. زي ( تكعيبي , تربيعي , منحني , حساب , معادلات , … ) .. . ف دايماً حتحس بحاجز نفسي و عقلي ضخم بينك و بين التفاضل و التكامل . . لكن في الحقيقة .. الموضوع مش مٌعقد إطلاقاً .. بالعكس .. سهل و بسيط و سلس و منطقي جداً جداً جداً .. بمجرد ما تتعلم لغته .. … و ده الإنجاز الحقيقي اللي عمله ( لايبنز ) .. إنه ( أسس ) لغة ثابتة و واضحة للتفاضل و التكامل .. ما زالت بنستخدمها حتي النهاردة .. بنفس الرموز .. و نفس المعاني .. و نفس القواعد . لٌغة أوروبية لاتينية مفهومة لأبناء زمانه و مكانه . … لكن .. الأفكار اللي اللغة دي بتكتبها .. و الشعر و التشبيهات و المشاعر اللي اللغة دي بتوضحها .. موجودين منذ بداية التاريخ .. و عشرات من علماء المسلمين ناقشوها و شرحوها و حلوها .. … … أغلب الرجالة لما بتسمع الجٌملة الأيقونية دي ( إنت إتغيرت و بطّلت تحبني زي الأول ) .. عقلهم بيعمل ( إيرور ) 🤣 .. و بيفضل يضرب أخماس في أسداس و يسأل نفسه .. هو أنا عملت إيه غلط ؟! .. و المفروض أعمل إيه .. و بينتهي بإن عقله بيهنج و يجيب شاشة زرقا 🤣 .. في حين إن عقل الست .. بيكون شايف الجٌملة منطقية جداً .. منطقية للغاية .. سهلة و بسيطة و حدسية .. و السبب : هو إن عقل الست تشريحياً و عضوياً بيقدر يستحمل كم كبير جداً من المتغيرات طول الوقت اللي مش ( محسومة , مٌنتهية , واضحة , … ) .. . لكن .. عقل الراجل .. الوضع فيه مٌختلف تماماً .. عقل الراجل .. الحياة فيه ثنائية بالكامل .. يعني : ( باحب أو مابحبش ) مافيش مقدار تغير . ( فرحان أو زعلان ) مافيش مقدار تغير . ( جعان أو شبعان ) مافيش مقدار تغير . . عقل الست .. رااااااااااااااائع .. في النقاش و الجدال و البحث و التباحث و ناخد و ندّي و نروح و نيجي .. و بيستريح في ده .. و مش بيحس بأى مشكلة إطلاقاً . . عقل الراجل .. مٌصمم لأخذ القرارات بأسرع وقت ممكن , و من خلال أقرب طريق ممكن , و بيشوف أغلب أمور الحياة ك : آه أو لا . .. صفر أو واحد . .. و دي .. هي كانت المرحلة التالية في حياة لايبنز .. محاولته لتبسيط كل شيء في الحياة ل : منطق ثنائي فقط . . و لهذا بوست قادم .. إن شاء الله … و الله أعلم .