قصة ال ( K-pop ) و الدراما الكورية .. من

قصة ال ( K-pop ) و الدراما الكورية .. من البداية خاااااااااااااالص .. بالحلمنتيشي .. الجزء الأول . … زماااااااااااان .. سنة 1818 .. في ألمانيا .. بيتولد كارل ماركس … ( أيون .. بوب الشيوعية الكبير أوي أوي .. هو ده ) . كان عايش في عصر شكله ظاهريًا بيلمع: مصانع، اختراعات، أغنياء بيشربوا شاي في البلكونة. بس الحقيقة؟ الناس اللي شغالة في المصانع دي كانت بتنام وسط المكن. أطفال بيشتغلوا. ستات بتتضرب. ورجالة بياخدوا نص الأجر عشان “البركة”. ال ” بركة = Blessings” دي كانت حاجة حقيقية .. بسبب إن الكنيسة الأوروبية في الوقت ده كانت متواطئة مع أصحاب المصانع .. و بيقنعوا العمال إنهم ياخدوا نص الأجر بس .. مقابل إن القسيس يطبطب عليه 😅 .. و دي أحد أسباب المقولة المشهورة في الثورة الفرنسية بتاعت : ” أشنقوا آخر إقطاعي بأمعاء آخر قس 🤣 ” .. ما علينا .. .. ماركس شاف ده كله، وقرر يسأل: “هو ليه شوية ناس بيملكوا كل حاجة، والباقي بيشتغل زي الحمار ويموت؟” … قعد يفكر و يكتب بوستات سنين ( هو كان صحفي بالمناسبة ) .. أثناء ما صاحبه اللي مش مشهور إطلاقاً اللي إسمه ( فريدريك إنجيلز ) هو اللي كان بيصرف عليه .. .. و في الآخر وصل لشوية أفكار .. تلخيصهم في سطر واحد: “التاريخ كله صراع طبقي… والبشر مش هيتحرروا غير لما الفقرا ياخدوا السلطة من الأغنيا.” ..

• البرجوازيين (الطبقة الغنية) = ناس قاعدة فوق بتتحكم في كل حاجة
• البروليتاريا (العمال) = اللي بيشيلوا الدنيا على كتافهم ومش لاقيين ياكلوا … و بعدين تنبأ نبوءته الشهيرة و قال: البروليتاريا هتثور… وهتاخد كل حاجة… وهتعمل مجتمع من غير طبقات، من غير استغلال، من غير جشع.

بس…و مات وهو مفلس، وحاسس إن فكرته ماتت معاه.🤣 … روسيا دلوقتي عالخريطة مش جنب ألمانيا مباشرة .. إنت لو فألمانيا .. تاخد توكتوك من علي أول الشارع .. يوصلك بولندا … تعدي الشارع تلاقي نفسك في أوكرانيا .. تتمشاها عادي لحد روسيا .. .. و لكن .. موضوع بولندا و أوكرانيا ده جديد .. زماااااااان .. الكلام ده كان مفتوح علي بعضه .. و الهوا كان بيطير الجرائد من ألمانيا .. تقع في بلكونات روسيا .. فبعد كام سنة؟ جت روسيا وقالت: “احنا جربنا القياصرة والملكيات، وزهقنا من الاستعباد… طب مانجرب فكرة الراجل الألماني أبو دقن ده ( اللي هو ماركس يعني ) ؟ ”

و صحيوا تاني يوم من النوم و قرروا يبدأوا : الثورة البلشفية سنة 1917 خلاصتها الشديدة فحت أوي : لينين يركب، القيصر يتعدم، وكل النظام يتقلب. وبدأت أول دولة في العالم تعلن إنها ماشية على أفكار ماركس. … بس ده كان مجرد الريبوت الأولاني للفكرة… نسخة بتقول: “ماركس قال نظريات… إحنا هنطبقها، بس على طريقتنا.”

وهنا… الميديا بدأت تلعب دورها لأول مرة.

📺 ماركس يدخل التليفزيون… بس بـ Version روسي الروس قرروا يسيطروا على كل حاجة:

التعليم؟ ماركسي. الإعلام؟ ماركسي. الفن؟ ماركسي. الحب؟ ماركسي حتى لو مقلتش “أنا بحبك” بس قلت “أنا بحب طبقتك🤣.”

الرجل العادي بقى بيشوف الحياة كلها بنظارة حمراء. المشاعر، الأغاني، حتى المسرحيات… كلها بتخدم الصراع الطبقي.

وهنا ظهر خط مهم: لما تتحكم في مشاعر الناس من خلال الميديا، تقدر تتحكم في كل حاجة. ( خليك فاكر الموضوع ده .. عشان في مرحلة في البوستات اللي جاية .. حتلمّس مع باشمهندس جوبلز .. وزير إعلام هتلر فألمانيا ) ..

المهم : الصين تحت روسيا مباشرة .. و كانت في الوقت ده طالعة من مخمضة سودة هي كمان .. الصين دي ناس عايشين بقالهم كتير أوي ( زي حضارة السبحتلاف سنة بتاعتنا كده ) .. و لكن الفرق هو إنهم ماكانوش بيبنوا أهرامات 🤣 .. هما بنوا سور كبير .. و نسوا يبنوا شباك .. .. يعني .. الصين كانت مستعدة جداً جداً للخناقة و العركة عالأرض فأى وقت .. لكن الخناقة ولامؤاخذة جات لها من حتة تانية .. من شباك المزاااااااااااااااااااااااااج العالي .. … في بدايات ال 1800 .. الصين كانت فل الفل .. عندهم كل حاجة حلوة تتمناها .. حرير و زخارف و ( خزف= الصيني اللي في النيش اللي مش حتعرف تتجوز غير لما تتخانق عليه 🤣 ) .. و : شاي .. آه والله .. الشاي ده هو كان المشكلة … ليه ؟! .. لأن .. مين أكتر ناس مدمنين الشاي في العالم ؟!. .. بريطانيا .. و في الوقت ده .. بريطانيا كانت أكبر بلطجي في العالم .. و ماكنش عاجب البلطجية دول إنهم كل يوم ينزلوا يدفعوا فلوس عالقهوة عشان كباية شاي … لا … إحنا عايزين نسيطر عالقهوة نفسها .. و نشرب من غير ما نحاسب 🤣.. … في الوقت ده كانت أساطيل القراصنة البريطانيين واخدين العالم رايح جاي يحتلوا كل يوم بلد شكل .. و من ضمن البلاد دي … الهند . تحت الصين مباشرة . … و بما إن الصين ماكنتش زي أى بلد … باقول لك ناس عايشين من زمان .. ف بريطانيا كانوا فعلاً خايفين يدخلوا معاهم في مواجهة مباشرة .. طيب .. يعملوا إيه ؟! .. سهلة .. الهند كان عندهم نبات جميل كده .. إسمه ( أفيون ) … تشد منه الشدة المتينة .. و تريّححححححححح … … بريطانيا حرفياً قررت تشد الصين علي سكة الضرب .. الموضوع كان من أوسخ اللعب السياسية في التاريخ .. و الهدف .. إن الكيف .. يذل الصين .. فتقدم الشاي مجاناً … آه والله العظيم . … علي سنة 1830 تقريباً .. كان 10% من رجالة الصين … ضرّيبة درجة أولي .. الناس اللي كانوا بيعملوا كل حاجة حلوة .. بقوا أحمد مكي في أغنية قطر الحياة فنفسهم … … و بالظبط زي ما في الأغنية … أبو أحمد مكي تقريباً او أمه بتضربه بالقلم و تطرده برة البيت بعد ما كان عايز يرمي بنت أخته من الشباك 🤣 .. الإمبراطور الصيني قرر يعدم كل البضاعة و يحرقها .. … بريطانيا كانت بالظبط زي نور الشريف في فيلم العار … و بيعيطوا علي شقا عمرهم و فلوس المخدرات اللي إتحرقت .. و قرروا يعلنوا الحرب .. بس المرة دي ماكانوش خايفين … الصين كانت فعلاً ضعيفة جداً بسبب الأفيون .. و النتيجة .. هي إن الصين إستسلمت لشروط بريطانيا … اللي سيطرت علي مواني الصين و تجارة الشاي … و ولامؤاخذة بقوا بيشربوا من غير ما يحاسبوا . و لحد 1860 .. بريطانيا إستخدمت الصين ك ( سوق الأفيون الأول بتاعها ) بالغصب .. و ماحدش كان قادر يوقفهم . … ليه ده مهم ؟! .. لأن : الصين كان عندها مليون فلاح ومفيش مصانع. .. و كانوا حاسّين بالذل بعد ما كانوا جامدين فحت زمان … و شافوا روسيا بتحدث النظام و تسطب نسخة جديدة … فقالوا .. و إحنا كمان .. “هنعمل ثورة بس بطريقة تناسبنا… ماركسية فلاحية!” ومين اللي كان بيلعب دور الـ DJ في الثورة دي؟ ماو تسي تونغ. … البوست كده طويل كفاية … الأجزاء الجاية إن شاء الله .. حاشرح فيه اللي حصل بين الصين و اليابان .. و بين الصين و كوريا .. و بين اليابان و كوريا .. و تعرف إيه اللي خلي أمريكا تفرقع صاروخين في بلكونة اليابان ( هيروشيما و ناجازاكي ) .. و تفاصيل تانية إن شاء الله ..