عارف ليه صلاح أبو المجد إتشهر ؟

عارف ليه صلاح أبو المجد إتشهر ؟ عشان شاور و قال ” عند البربئ اللي هناك ده ” . … في مشاهد أيقونية شفت بعضها في حياتي في الحقيقة .. و كتير منها بيتعمل في أفلام و مسلسلات .. و هي مشاهد ال : المصيبة و الهرجلة . .. اللي هي لما السفينة تبدأ تغرق .. و تلاقي كل حد بيجري فأى حتة مش عارف يروح فين . أو اللي هي لما المكان اللي فيه عدد كبير من البشر يولع .. و تلاقي كل حد بيجري فأى حتة مش عارف يروح فين . .. و اللي هي حالياً زي المكان اللي إحنا عايشين فيه ده .. مصيبة .. و هرجلة .. و كل الناس حاسين إن الدنيا بتغرق و بتولع فنفس الوقت .. و كل حد بيجري فأى حتة مش عارف يروح فين . .. في الحالات المشابهة بتاعت ( هرجلة المجموعة ) دي .. أى حد بيعلي صوته و يقول : ( هنااااااك ).. و يشاور علي أى حتة .. حتلاقي في أمم بتمشي وراه بدون تفكير و لو للحظة .. ببساطة لأن مافيش وقت للتفكير .. و بمجرد ما تلاقي شوية بدأوا يتحركوا في إتجاه واحد … تلاقي كل اللي في المكان بدأوا يبصوا علي نفس المكان و اللي بيتحركوا عليه يكتروا .. أصل أكيد اللي بدأوا يتحركوا في الأول شافوا حاجة إحنا مش شايفينها .. و أنا كمان عايز ألحق قبل ما ألاقيش مكان ليا .. بغض النظر إنك مش عارف تلحق إيه .. أو تلاقي مكان فين .. و لكن الأكيد هو إن أى حاجة أحسن من ال ” ولا حاجة ” اللي إحنا فيها هنا . صح ؟ … … و هي دي المنطقة اللي عايش فيها كتييييييييييييير من المؤثرين في الرأى العام بقالهم فترة طويلة هنا فمصر .. و تقدر تقسمهم لأربع أنواع أساسية :

1- الهجاص و فاهم إنه هجاص : و مش فارق معاه .. و شايف إن ( يعني أنا أذيتك فإيه ؟ ) .. أنا بافتي .. و إنت حر و عندك عقل .. تصدق الفتاوي بتاعتي و تمشي وراها .. أو تفكك ..

2- الهجاص و اللي مصدق نفسه : و ده بيكون لأنه لسة مالبسش خوازيق كفاية .. او لبس في حيطة مثلاً تخليه يفوق و يفهم إنه هجاص .. و تلاقيه طول الوقت مؤمن جداً بالهري اللي بيقوله و بيشاور عليه بكل قوة .

3- اللي فاهم فعلاً بس خايف يطلع مش فاهم كفاية : و ده تلاقيه قليل الفتوي جداً .. و لو طلعت منه بفتوي بالعافية .. لازم يديهالك بكل مصادرها اللي عنده عشان يشيل عن نفسه أى مسئولية لو لبست في حيطة بعدها ..

4- اللي فاهم .. و عرف ما يكفي لدرجة إنه يعرف هو فاهم قد إيه : و ده حتلاقيه لما بيتكلم .. نادراً لو قال حاجة جديدة أو عالموضة أو تشد الإنتباه .. ببساطة هو لف و دار و شاف ما يكفي .. لحد ما فهم إن الموضوع مافيهوش جديد … إطلااااااااااقاً .. و ده في الأغلب بيكون فهم موقعه من الإعراب بالنسبة للدين إيه .. يعني إما بيكون فهم إن الدنيا اللي بيجري وراها بتسحله و تستعبده و أصبح شايفها في مكانها الحقيقي ( دنيا .. من الدونية .. يعني تحت أوي ) .. أو قرر إن الدنيا حتكون هي جنته .. و في سبيلها باع آخرته بالكامل و العياذ بالله .. و ماعندوش أى مشكلة يبيع أى شيء في سبيل الفلوس الورقية . … … … إطلاااااقاً أنا مش بادّعي إني عارف صلاح أبو المجد في أنهي فئة من الأربعة .. و برضو مش باقول إن الكلام اللي هو قاله في البوست الأخير ده غلط بالكامل .. و دي المشكلة .. إن كلامه مش غلط .. و مش صح .. كلامه مجرد إتجاه .. من ال360 إتجاه المتاحين بالنسبة لأى حد .. و أى حد حيتحرك في أى إتجاه .. حيوصل .. الفكرة هي إنك تتحرك .. .. أنا أعرف أصدقاء شخصيين مادخلوش جامعات والله .. بل والله العظيم ماكملوش ثانوي عام .. و دخلهم الشهري يكفي إنهم يشتروا أحدث آيفون 15 برو ماكس مرتين .. شهرياً .. و يزيد . .. أعرف ناس ماعدوش التلاتين و حالياً معاهم دكتوراة في تخصصات علمية و هندسية دقيقة جداً .. و دخلهم الشهري برضو حلم مستحيل التحقيق بالنسبة لأصدقاء تانيين في الأربعينات علي درجة مدير عام . .. أعرف ناس تزوجوا و هما عندهم 21 سنة .. و حالياً ما شاء الله من أنجح الرموز في مجالاتهم . .. أعرف ناس عدوا ال39 سنة .. و لسة ماخطبوش ولا مرة .. و برضو من أنجح الرموز في مجالاتهم . .. أعرف ناس زيي عمرهم ما إشتغلوا ك موظف في أى مكان .. و حالياً بفضل الله ناجحين و شركاتهم محققة نجاحات حقيقية في مجالاتهم بفضل الله . .. و أعرف ناس بيشتغلوا كموظفين من و هما 16 سنة .. و حالياً بيتعمل لهم ( Head hunting = يعني الشركات بتطلبهم بالإسم ) و من شركات في ( Fortune 500 ) . … … أعرف ناس بتشتغل شغلانات قمة في البساطة .. و دخلها الشهري كتير بيصرفوه في عشا في فندق 5 نجوم .. و مع ذلك سعداء و مستقرين نفسياً بشكل يخليك تتمني دقيقة من حياتهم مقابل نصف ثروتك . .. أعرف ناس نجحت بالصح و الحلال دنيوياً .. أعرف ناس نجحت دنيوياً بالحرام و خسرت دينها .. أعرف ناس بين ده و بين ده .. و ربنا أعلم بنواياهم .. أعرف ناس من عشرات الأشكال و الألوان و الجنسيات و اللغات .. و لكن .. .. و لكن عمري ما حاشاور لك علي أى حد منهم و أقول : ” هناااااااااك ” .. ليه ؟! لأني مش حُمااااااااااااااااااااار .. ( أحمل أسفاراً لا أفقه عنها شيء ) . .. يعني إيه ؟! … يعني البشر عاشوا آلاف السنين في الأرض دي .. أقوام بعد أقوام .. و أمم بعد أمم .. و جربوا كل شيء و أى شيء ممكن تتخيله و ماتتخيلوش .. و دايماً كان بيوصل الفلاسفة منهم و اللي بيشغلوا دماغهم لشوية أسئلة أساسية … ملخصها : نعمل إيه فإيه ؟! .. يعني نتجوز ولا نشتغل ؟ نهاجم ولا ندافع ؟ سلام ولا حرب ؟ نستثمر ولا نحوش ؟ و هكذا و هكذا .. .. و لكل أمة .. ربنا أرسل لهم نبي .. منهم .. بلغتهم .. يفهمهم و يفهموه .. و شرح لهم . .. و قصص كل اللي يهمنا من الأمم دي .. و اللي نحتاجه منها .. ربنا أنعم علينا بيه في القرآن .. و رزقنا بخاتم الأنبياء و المرسلين .. و اللي في ختام رسالته قال لنا ( الْيَوْمَ أَكْمَلْتُ لَكُمْ دِينَكُمْ وَأَتْمَمْتُ عَلَيْكُمْ نِعْمَتِي وَرَضِيتُ لَكُمُ الْإِسْلَامَ دِينًا ). .. الدين مش مادة برا المنهج .. الدين مش حاجة مش بتنضاف للمجموع .. الدين والله العظيم فيه كل الإجابات لكل الأسئلة .. و أكتر … و لكن .. و لكن كتير بيتصرفوا بالظبط زي الأمم السابقة ما إتصرفت .. و جادلوا .. و قالوا ( بس لو كان القرآن نزل كله آية واحدة , أو لو كان نزل فيه حاجات علي مزاجنا , أو لو كان نزل علي حد تاني , … و غيرها من الحجج ) . … … … مرة كمان .. أنا مش باقول إنه هو غلط .. أنا مش باهاجمه .. أنا واضح في عنوان البوست .. هو بيحاول .. ربنا يجازيه خير و يصلح نيته لما يحب و يرضي .. و لكن الطريقة إنك تستفيد من كلامه فعلاً .. هو إنك تفهم إنه كلام طالع من بشر .. و رؤيته محدودة بمحدودية بشريته .. و بالتالي تسمع منه .. و تقول شكراً .. و تفكر .. إيه من كل اللي قاله ده يتماشي مع ال ” هدي ” اللي جاي لك من ربك .. الله سبحانه و تعالي .. … … التشبيه مع الفارق .. لما تبقي ماشي علي خريطة راسمها و موضحها لك مؤسس المدينة اللي إنت ماشي فيها .. اللي مافيش ذرة تراب بتتحرك جوة المدينة إلا بعلمه و مشيئته .. و تتوه شوية … فتسأل حد قدامك لسة جاي المدينة جديد .. بس شايفه بيشاور للناس .. تثق فيه بشكل أعمي ؟ .. ولا تسمع منه و تفكر الأول ؟ .. مش يمكن هو فهمه مش كامل ؟ .. فبعد شوية فهمه لو وصلت لحتة أبعد منه شوية .. تقدر إنت كمان تصحح له و تشاور له و تساعده ؟؟ .. … … و الله أعلم .

#إسلام_أسامه_الجويلي