الملك و الدوام لله

الملك و الدوام لله .. سنة 2016 .. و بعد فترة بسيطة من شغلي ببعض أدوات الجرافيكس و خصوصاً ( أفتر إيفكتس ) . صديقي @[764355036:2048:Anas Esam Mansour] كلمني بيقول لي إن في ناس طيبين محتاجين حد يعمل لهم شغلانة أفتر إيفكتس .. رحت القاهرة يوم معتبره فسحة أشوف لو أقدر أساعد .. و ماكنتش عارف إطلاقاً مين محتاج إيه .. و دي كانت أول مرة أقابل فيها د زينب زمزم رحمة الله عليها فمكتبها .. و أقعد معاها .. و بعد كده .. و لمدة كام شهر .. قضيت منهم أسابيع كتير ببات حرفياً في الستوديو / المكتب ( اللي هو بافرش مرتبة جنب الريندر فارم 😅🤣 ) والله العظيم .. و أصحي .. يروح الراجل الطيب اللي كان بيساعد في حراسة المكان رايح جايب فول و فلافل من عربية جنب الستوديو .. و نفطر أنا و @[100003070782392:2048:Eng Nader Ahmed] و هيثم ( المخرج ) إبن د زينب .. .. نادر ده أساساً باعتبره من أعجب الشخصيات اللي أنا مٌقصر في التواصل معاهم جداً .. غير ذكاءه ربنا يبارك له فيه .. و شخصيته اللي مليانة تجارب و خبرات ( الراجل ده بيمشي يجمع تجارب و خبرات 🤣 ) .. إلا إنه من عدد بسيط جداً من البشر اللي فعلاً كنت باحس إني مستريح و أنا قاعد معاه .. … علي مدار الكام شهر اللي عشت فيهم في الستوديو ده حرفياً .. و إشتغلت علي ( سيرة النور ) .. الساعات اللي قضيتها في الكلام مع د زينب .. أضافت ليا حرفياً خبرة سنين في أى حاجة لها علاقة بالتصميم و الفنون .. ربنا يرحمها و يغفر لها .. عمري ما أنسي لحظات بسيطة .. زي مثلاً كانت واقفة جنبي أثناء ما باخلص تركيب مشهد .. و لقيتها شاورت علي خلفية شاشة عليها صورة من فيلم كارتون طرزان ( القديم ) .. و بدأت تشرح ليا تكوين الألوان مع الضوء في التصميم .. و بالرغم من إني كنت خدت كورسات في الكلام ده .. إلا إني والله إنبهرت بإزاي عينيها شايفة حاجات أنا أساساً ماكنتش واخد بالي منها .. اللي هو إنت بتفضل أعمي عن شيء ما .. لحد ما يتشاور لك عليه .. … حقاً أدين لها بالكثير من معلوماتي في المجالات دي .. و لهيثم إبنها برضو و ما علمه ليا من البسيط عن الإخراج و عوالمه .. .. ذكرياتي في الستوديو و مكتبها .. حتفضل من أكثر الذكريات العزيزة في قلبي دايماً .. رحمها الله و غفر لها ..