في ( تريككاية - trick - خدعة عقلية ) إتعلمتها

في ( تريككاية - trick - خدعة عقلية ) إتعلمتها عن عقلي من فترة طويلة .. لما ألاقي نفسي مش عارف أبتدي كورس معين .. أو شغلانة معينة .. أو حتي مسلسل معين .. اللي هو عارف إنت لما تيجي تتفرج علي مسلسل معين .. جامد جداً .. كل الناس بتشكر فيه .. بس كل ما إنت تفتح الحلقة الأولي منه .. تزهق بعد 5 دقايق و تفصل .. ؟ .. عارف الإحساس ده ؟! . .. التريككاية هي : إبتدي المسلسل من الحلقة التانية .. أو التالتة .. إبتدي الكورس من المحاضرة الخامسة مثلاً .. ( لو الكورس 20 محاضرة ) .. إبتدي الشغلانة من النص .. يعني بدل ما تبتدي بإنك تعمل خطة عمل لمنتج معين ( موقع / أبليكيشن / … ) .. لا .. إبتدي بإنك تعرض المنتج ده للبيع ( قبل ما تعمله ) .. و تحاول تشوف عروض أسعار له بناءاً علي ( Metrics) إنت لسة بتتوقعها . … السبب في نجاح ال ( تريككاية ) دي مع عقلي هو : إن عقلي بيجاهد عشان يلاقي سبب يبتدي أو يكمل أى شيء .. .. المسلسل الجامد جداً اللي الناس كلها بتتكلم عنه مثلاً .. إهتمام الناس بيه ده مش سبب كافي أبداً إنه يشدني له .. و كل مرة أحاول أبتديه من البداية الطبيعية له .. أزهق .. لأن مش دايماً بدايات المسلسلات بتعرض عدد كافي من الأسئلة بشكل مثير للفضول بحيث إنه يشدك بكفاءة . .. فبالتالي .. لما بابتدي المسلسل من الحلقة التانية أو التالتة … بيظهر عدد كبير من الأسئلة اللي بافضل أسألها ( حتي لو كان متجاوب عليها في الحلقة الأولي ) .. و لكن ده بيكون كفاية إنه يشدني أتفرج عالحلقة اللي بعدها , و اللي بعدها .. و أشوف تخميناتي و إفتراضاتي صح ولا غلط . .. و مسلسلات كتير جداً .. مشهورة جداً و جامدة جداً .. حاولت لسنين أتفرج عليهم من البداية .. و كنت بازهق .. و لكن لما طبقت عليهم ال (تريككاية ) دي .. إتشديت لهم جداً و كملتهم بالكامل .. و بعد نهاية المسلسل كله تقريباً .. بارجع أشوف أول حلقتين سبتهم . … … نفس الموضوع بالنسبة للكورسات في مجالات كتير جداً … أو الكتب ( روايات أو كتب في مجالات علمية معينة ) .. بابتدي بإني أكوّن أكبر قدر من الأسئلة فعقلي .. و أحاول أتخطي أول فصلين تلاتة مثلاً .. … و في الشغل كتير الطريقة دي بتكون سبب إننا نوفر وقت كتير بفضل الله .. بكل تأكيد مش بابيع سمك في مياه .. ولا بابيع منتج ماتعملش مثلاً .. لا .. باكون واضح جداً إن أى أكشن بناخده في غير توقيته و مكانه الطبيعي بيكون واضح إنه لشيء في قيد التطوير .. .. و لكن ده بيوفر علينا هري و وقت كتير كنت باضيعه زمان في إفتراضات لا حصر لها . … … اللي فات ده .. كان مقدمة فدماغي لبوست باكتبه دلوقتي عن : better call saul مسلسل تحفة حاولت أتفرج عليه من ساعة ما بدأ ينزل من 7 سنين .. و كل مرة أحاول .. أفشل .. لحد ما بدأته من كام يوم من الحلقة رقم 4 .. و خلصته من يومين .. و فعلاً فيه عدد كبير من الأفكار اللي تستحق إني أكتبها هنا . .. و لكن لو كملت كتابة هنا .. البوست حيطول بشكل أكثر من المُعتاد حتي بالنسبة لبوستاتي الطويل .. فبالتالي .. إما ليلا النهاردة إن شاء الله .. أو بكرة .. ممكن أكتب عنه لوحده .. .. و يكفي البوست ده بشكله الحالي ك ( تريككاية ) أنصح أى حد دماغه فيها شبه من دماغي .. بإنه يجربها . .. و الله أعلم