مشاريعي الضخمة اللي أعلنت عنها من كام سنة نجحت و

مشاريعي الضخمة اللي أعلنت عنها من كام سنة نجحت و حققنا مكاسب ضخمة بفضل الله … بس عندي مشكلة دلوقتي .. عايز ترشيحات لقاعة كبيرة تتحمل 500 فرد مثلاً .. أعمل فيها حفلة الكريسماس 🥳 .. و عيد ميلادي فنفس الوقت 🥳.. … حاجيب سوبر ميجا ستار واحد بس يغني .. و بالنسبة لباقي المغنيين حادّي فرصة للوجوه الجديدة و المواهب الشابة .. و حاعمل مسابقة قبل الحفلة بأسبوعين .. حتتعرض في 8 قنوات فضائية ..و حاعلن نتيجتها يوم الحفلة .. و ال5 مواهب اللي حاتفوز في المسابقة .. هما اللي حيغنوا جنب السوبر ميجا ستار ( اللي حيكون مفاجأة حاعلن عنها في الحفلة 🥳😎) .. و المعازيم حيكونوا كل المشهورين و النجوم اللي ممكن تتخيلهم .. … … السوبر ميجا ستار اللي باتكلم عنه علي فكرة .. حيفجر مفاجأة جامدة جداً في الحفلة دي .. و يعلن عن ألبومه الجديد .. و اللي مخصص نص الأغاني اللي فيه عن التعاطف مع ضحايا العنف . كلنا عارفين السوبر ميجا ستار ده من زمان .. و متربيين علي أغانيه . . و صوته و أغانيه بتفكرنا بكل ذكرياتنا السعيدة و أفراحنا .. إحنا محتاجين نفرح فعلاً .. … المعازيم اللي في الحفلة مش بس مشهورين و نجوم .. لا .. أنا علاقاتي برؤساء أضحم الشركات في العالم توطدت علي مدار الكام سنة اللي فاتوا .. و كلهم حييجوا يجاملوني في الحفلة اللي عاملها دي .. و بالتالي حافتح فرصة حوار معاهم .. بدل موضوع مقاطعة منتجاتهم و الهري ده .. إحنا عايزين حلول جذرية واقعية .. بدل خراب البيوت اللي بينشر له الظلاميين السطحيين دول .. … و كدليل علي حسن نية رؤساء الشركات الضخمة دي .. قرروا إن كل المشاريب و الوجبات اللي في الحفلة دي .. حينزل زيها بالظبط في الشارع للناس الغلابة اللي عمرها ما داقت أكل زي ده .. … إحنا عمرنا ما كنا بتوع عنف أو خناق .. اللي بيحب العنف و المشاكل دول هما أعداء الفرحة و السعادة .. أنا و زمايلي في المدارس زمان كنا بنشوفهم دايماً بيكرهونا و بيزعقوا لينا في النادي لما كنا بنحتفل و نشغل أغاني و نرقص .. أنا كذا مرة صاحباتي كانوا بيشتكوا إنهم مش عارفين يرقصوا براحتهم في حفلاتنا و خروجاتنا .. عشان كده أنا حاخصص جايزة إستثنائية في حفلتي و أقدمها للقويات المتحديات اللي واقفين قدام المجتمع بجرأة و شجاعة .. و مش بيخافوا من تكشير أعداء الفرحة و السعادة .. أفضل 5 بنات حيرقصوا في المسابقة اللي إتكلمت عليها فأول البوست .. و فيديوهات رقصهم علي تيك توك يجيبوا لايكات و مشاهدات أكتر .. هما اللي حياخدوا الجايزة الإستثنائية دي . … … المشكلة اللي إتكلمت عنها في أول البوست بالمناسبة مش إني مش لاقي قاعة مناسبة أعمل فيها الحفلة بتاعتي .. لا .. المشكلة إني لاقيت قاعة ممتازة .. و فيها كل المزايا و موقعها خرافي .. بس تستحمل 50 فرد بس .. و أنا عايز أعمل التوسعات فيها عشان أقدر أجيب كل اللي تتمنوه إنتوا من نجوم و مشاهير .. و لكن سكان و أهالي البيوت اللي حوالين القاعة مش راضيين يسيبوها عشان أهدهم و أوسع القاعة .. … متخيلين ؟! .. يعني أحلامكم فإنكوا تشوفوا أحسن مصارعين بيلاعبوا بعض .. و أرجع لكم توني ستارك يعمل أيرون مان تاني .. و أخلي ذا روك يدخل في الجزء التالت من أولاد رزق .. و كل أحلامكم دي .. ممكن ماتحصلش .. لأن في ناس مش راضية تنقل ؟! . … مع إني حاوفر لهم كلهم أحسن سكن في الكومباوندات بتاعتي !! .. … … أنا فاهم إن في ناس منكم ممكن يتعاطف معاهم و يقول لي إني ظالمهم لأني قاطع عنهم مياه و كهربا بقالي فترة طويلة .. و لكن إنتوا مش شايفين الدوشة اللي هما عاملينها للعمال بتوعي اللي شغالين بيجهزوا لكم الحفلة ؟! .. .. بس ماتشغلوش دماغكم بالمشاكل دي .. أنا بافضفض معاكم .. و باعلن عن إن الحفلة بالكامل حتتعرض مجاناً علي القنوات المجانية ..و مش بس كده .. لا .. كل فضايح و أخبار المشاهير و النجوم اللي حاستضيفهم .. حيتم تسجيلها و تسريبها للقنوات المشفرة … و لأني عودتكم دايماً إني بارعي ريادة الأعمال و باحب أعلمها للناس .. حاشارك معاكم الحسبة عاملة إزاي تقريباً ..

• عدد اللي حيشتغلوا في و علي الحفلة .. بيساوي تقريباً : 2000 إنسان .. كل واحد منهم فاتح بيت .. يعني شوف أنا فاتح كام بيت دلوقتي ؟! ..

• 20% من أرباح العروض و الأفلام و البرامج اللي حاعملها من الحفلة .. حاطلعه أجيب بيه أكل و شرب لكل الناس اللي حتسيب بيوتها دي ..

• متخيلين العائد الثقافي و الحضاري اللي حيطلع من مشاركة فننا و رقصنا و جمال أجسام بنات أراضينا للعالم كله قد إيه ؟! .. العالم كله حرفياً حيبقي بيتفرج علينا .. و حييجوا بعد كده يطلبوا حفلات خاصة زي دي تاني .

• آه كنت حانسي .. نقطة مهمة أوي في الآخر .. حلقة (john oliver ) الأخيرة .. اللي بيتكلم فيها عن صناعة الشوكولاتة .. و مدي الظلم اللي فيها .. و إنها قايمة بالكامل علي تجارة عبيد أطفال تقريباً .. .. ماتتفرجوش عليها .. لأني حاوزع شوكولاتة فاخرة علي كل الحضور .. و حاطلع شوكولاتة فاخرة كهدايا لكل اللي حيشارك هاشتاج الحفلة و يتفرج عليها من الأول للآخر .. .. في حد في الدنيا يكره الشوكولاتة الحلوة المسكرة دي ؟! .. ماتبقوش سطحيين بقي .