إمبارح جربت أتزلج علي الجليد للمرة الأولي في حياتي

إمبارح جربت أتزلج علي الجليد للمرة الأولي في حياتي . … الفيديوهين دول ده جزء بسيط من 90 دقيقة كاملين كلهم عبارة عن 5 لفات بالعدد , 5 لفات حوالين حلبة التزلج دي . ال5 لفات خدوا مني 90 دقيقة بالظبط . أول واحد ( و انا مش قادر أسيب سور الحلبة .. ده كان أول ما دخلت الحلبة ) , و التاني ( لما خلاص طالعين , ده كان بعد 90 دقيقة ) . … كل مرة كنت باعدي علي حلبة التزلج دي في دبي مول , بافكر أدخل أجرب .. و بعدين ألاقي أسباب كتير للتأجيل . إمبارح قررت إني أجرب , و بعد ما دفعت ال125 درهم تذكرة الدخول , و الموظفة اللي بتديني التذكرة بتنبه عليا إني مش حاينفع أسترد الفلوس دي لو وقفت بعد 5 دقايق مثلاً . و بعد ما الموظفة إتأكدت إني فاهم إني مسئول بالكامل عن أى حاجة تحصل لي من إصابات , و إن لا دبي .. ولا دبي مول مسئولين عن الإصابات دي . و بعد ما بدلت حذائي بحذاء تزلج مخصوص مقاس تنين عشان يناسب رجلي مقاس ( 48 ) 😅😎 . و لأول مرة في حياتي أخطوا علي الجليد بحذاء تزلج .. و …

و حرفياً ماكنتش عارف أقف .. آه والله .. الوقوف نفسه بدون الإعتماد علي سور الحلبة عشان أسند عليه .. كان باين و كإنه من المستحيلات في الوقت ده …

أول 5 دقايق بالكامل قضيتهم علي الجليد .. كانوا عبارة عن تشبث كامل بالسور بتاع الحلبة .. و محاولة مني بس إني أفهم أقف إزاي !!

لحد ما الموظفة نفسها اللي قطعت ليا التذكرة , و كانت بتتفرج عليا و هي بتمصمص شفايفها و بتقول لنفسها تقريباً ” إنت إيه اللي جابرك يابني ؟! ” . لقيتها بتخبط ليا علي زجاج الحلبة .. و بعدين كلمت أحد المتزلجين المحترفين اللي بيكونوا موجودين جوا الحلبة علي الووكي توكي .. و ببساطة شاورتله عليا و قالتله ما معناه ” شوف المعوق ده .. أول مرة يجرب .. ساعده لوجه الله ”

المتزلج المحترف كان هندي مسلم ربنا يبارك له ( إسمه راسل ) .. أول ما قرب عليا و إتعرفنا علي بعض و عرف إني إسمي إسلام .. و إني مسلم . إعتبر الموضوع قضية عقيدة تقريباً … و قرر إني نجاحي في التزلج النهاردة حيكون نصر للإسلام ككل تقريباً .

و بدأ يشرح لي إزاي … أقف .. باتعلم الوقوف من جديد .. و بدأت ذكريات لما كنت باحبي لسة .. و ( ياختي كاميلة , و يلا هوبا , و تعالي خد الشوكولاتة ) ترجع لي تاني .. و لما كنت باتعلم الوقوف و أنا طفل صغنن .

و بعد شوية محاولات كتير , و زحلقة كتير … وقفت . كنت بدأت أتصبب عرقاً .. علي الجليد .. لأني لما باتوتر أو أعمل أى مجهود مهما كان بسيط .. باعرق ال70% من سوائل جسمي فجأة تقريباً .. لدرجة إن راسل بدأ يسألني كل شوية ( أجيبلك مناديل ؟! , أجيبلك مية ؟ .. أجيبلك إسعاف ؟! ) .

و بعد ما أتقنت الوقوف نسبياً .. بدأت المرحلة اللي بعدها .. المشي .. و قدامي بدأ راسل يمشي ( 1 … 2 … 3 ) .. 3 خطوات فقط .. و بعدين يقف . بيعلمني إزاي أمشي .. 3 خطوات بس .. و علي مدار ال40 دقيقة اللي بعد كده .. ده كل اللي أنا فضلت أعمله .. آه والله .. تلات خطوات و أقف … تلات خطوات و أقف .. و كل شوية ألاقي راسل واقف جنبي .. و بعلو صوته بعد كل تلات خطوات يقول : ( الله أكبر ) ..

40 دقيقة كاملين .. لفيت فيها الحلبة مرتين تقريباً … كنت مرعوب أبعد عن سور الحلبة .. كنت بامشي 3 خطوات بالعافية .. و أقف .. و بعدين 3 خطوات تانيين .. و أقف . و كل ما أقرب عشان أسند علي سور الحلبة .. راسل ينده عليا من بعيد ( no wall , no wall ) يعني ماتسندش علي الحيطة .. ماتسندش علي الحيطة .

40 دقيقة كاملين بدأت ألاقي الناس كل شوية يخبطولي علي زجاج الحلبة من برة , و بالعافية أقدر ألف وشي عشان أبص ليهم .. ألاقيهم بيشجعوني . و أطفال بتشاور لي و تشجعني .. و أبهات و أمهات ماسكين عيالهم و بيشاوروا عليا و يقولولهم كلام أنا مش سامعه .. لكن من جوايا كنت متخيل إنهم بيقولوا لهم إسمعوا الكلام و إشربوا اللبن و إلا حتبقوا زي عمو .

40 دقيقة كاملين و كل شوية يعدي جنبي متزلجين ماهرين جداً كإنهم مولودين علي الجليد , و يشجعوني إني أعمل زيهم .. و يشاوروا ليا بما معناه ( يلا .. تعالي .. ) .. و كإني باعاني المعاناة اللي باعانيها دي بمزاج أهلي مثلاً .. و إني أقدر أتزلج بمهارة زيهم .. لكن أنا اللي طالبة معايا إني أمشي ماشية البطريق المتطاهر دي شوية .

40 دقيقة .. إكتشفت بعدهم إني قدرت أمشي 5 خطوات ورا بعض من غير ما أقف 🥹🤩 . و إني بقيت مش خايف نسبياً إني أبعد عن سور الحلبة .. و لقيت راسل قرب جنبي و هو بيكبر و يهلل و يقول ( ما شاء الله ) . و بعدين بدأ يحاول يشرح ليا .. إزاي أتزلج بقي .. يعني آخد دفعة مع كل خطوة .. عشان أتزلج و أتزحلق و أبطل أمشي زي البطريق المتطاهر .. و لكن أتزلج زي البطريق المتطاهر .

و علي مدار ال45 دقيقة اللي بعد كده .. ده اللي فضلت أحاول أعمله .. و شايف نظرات التشجيع في عينين ناس كتير .. و السخرية في عينين ناس أكتر .. و الشفقة في عينين الجميع علي منظري ..

90 دقيقة كاملين .. و الألم في كل مكان في رجليا كان بيتزايد من اللحظة الأولي .. لأن جزم التزلج مش مريحة إطلاقاً .. و سببت ليا عدد محترم من ال ( blisters ) النهاردة .

90 دقيقة كاملين .. و 99% من أفكاري كانت ( لا .. كفاية كده .. تعالي نطلع ) من اللحظة الاولي . 90 دقيقة كاملين .. و أنا عارف إني منظري مثير للشفقة و السخرية لناس كتير . 90 دقيقة كاملين .. و كل اللي قدرت أعمله في آخرهم هو لفة كاملة .. لفة كاملة حوالين الحلبة .. بدون ما أقف .. و بدون ما أسند علي الحيطة .. … 90 دقيقة كاملين .. و كل اللي كنت مركز عليه علي مدار ال90 دقيقة كان : أنا عارف الإحساس ده كويس .. و فاكره .. و عارف إني بانساه كتير ..

إحساس إني باعمل حاجة معينة .. بعيدة عن كل اللي أعرفه و جربته قبل كده .. حاجة صعبة و مش سهلة .. و أحس إني مش عارف هي الناس اللي بتعمل كده بسهولة بتعملها إزاي . … … فنفس اليوم ده إمبارح .. و أثناء ما كنت في حمام السباحة العميق بعض الشيء .. أحد الزملاء اللي قابلتهم في الفندق ( زاك ) من بريطانيا .. وقفني أثناء ما كنت باسبح مسافة حمام السباحة بالكامل تحت المية عشان يسألني : أسبح إزاي ؟! .

و علي مدار 20 دقيقة تقريباً .. فضلت أشرح ل(زاك ) إزاي يسبح .. و إزاي مايخفش يغرق .. و إزاي إن الغطس أصعب بكتير من الطفو .. و علي مدار الفترة اللي قضيتها في حمام السباحة بعد كده .. كنت شايف زاك إزاي بيحاول يسبح لثوان معدودة .. في حين إني بفضل الله باقدر أسبح طول حمام السباحة بالكامل تحت المية .. و إن السباحة بالنسبة لي حالياً بسهولة المشي و الجري العادي تقريباً . … … إفتكرت ده أثناء معاناتي إني أخطو خطوات بسيطة علي الجليد . إفتكرت أول مرة حاولت أسبح فيها لما والدي ربنا يبارك له كان بيعلمني السباحة .. و مدي معانااتي عشان أفهم هو بابا بيعرف ينام فوق المية ببساطة كده إزاي ؟! . إفتكرت أول مرة مسكت كمانجا .. و ماكنتش فاهم إزاي أبطل تزييق !! . إفتكرت أول مرة فتحت فيها برنامج من برامج أدوبي .. و ماكنتش عارف أعمل إيه ! . إفتكرت أول ما دخلت الكلية و كنت شايف الدكاترة بتتكلم إنجليزي بسهولة , و طلبة مدارس اللغات بيردوا عليهم بسهولة .. و إكتشفت إني تقريباً مادرستش إنجليزي فحياتي قبل كده . إفتكرت أول مرة حاولت أعمل ركلة جانبية و كنت باقع أول ما أشيل رجلي من علي الأرض . إفتكرت كل مرة كنت باجرب فيها شيء جديد .. و ألاقي معاناة و صعوبة ضخمة فإني أبتدي .. مجرد أبتدي ..

و إني حالياً فكل مجال من المجالات اللي فوق دي تقريباً .. أٌعتبر فمستوي متقدم بالنسبة لناس كتير جداً . و إن بالنسبة لحد لسة بيبتدي .. او عمره ما إبتدي .. أو خايف .. أو بيأجل .. إنه بيبص عليا .. و يسأل نفسه : إنت بتعمل كده بسهولة إزاي ؟! . … … حاجات بسيطة جداً في حياتي أعتقد كانت سهلة لما جربتها لأول مرة .. بس حتي الحاجات دي .. الناس اللي كانوا بيعانوا فيها مقارنة بيا في الأول .. و بذلوا مجهود أكبر … كانوا دايماً بيتفوقوا عليا فيها . .. أنا مؤمن إيمان تام بإن : hard work beats talent every time العمل الشاق و المثابرة .. حيغلب الموهبة دايماً . … و الله أعلم .