بمناسبة البنزين اللي غلي

بمناسبة البنزين اللي غلي .

أنا مؤمن إن كل إنسان و ليه معاناته الخاصة , و إبتلائاته اللي تخليه دايماً شايف الدنيا .. دنيا .. مش جنة . و مؤمن برضو إن كل معاناة و إبتلاء ربنا بيكتبه علينا في الدنيا , بيرزقنا معاه الحل … أو الصبر … أو الصبر حتي الحل .. و بعد ما بيتحل قصة معاناة معينة … بييجي غيرها … وهكذا و هكذا .. لحد ما تُقبض روحنا إن شاء الله .

أحد أكبر إبتلائاتي و معاناتي الخاصة , اللي ماحدش حيفهمها أو يحس بيها إلا لو كان مُبتلي بيها برضو للأسف … عقلي .. الكتاب اللي أقراه , بانساه .. لحد ما أتسأل عليه أو فحاجة فيه .. أفتكره .. و أفتكر معاه 5 أو 6 كتب تانيين قريتهم في مجالات عقلي ربطها بالموضوع اللي بنتكلم فيه بالصدفة , و بعدين أفتكر بتاع 10 مواضيع تانيين ليهم علاقة ب56 قصة تانية .. و بعدين .. إيه ده ؟! .. شايف الكتاب اللي هناك ده ؟ .. عنوانه حلو .. حاشتريه . 🥲

و يشاء السميع العليم إني أدرس مجال قريب جداً جداً من البرمجة , و بعدين أتخصص تخصصات قريبة جداً جداً جداً من البرمجة .. و أقع فحبها و غرامها .. حب من طرف واحد للأسف . علي مدار ال15 سنة اللي فاتوا .. بمجرد ما أسمي الله , و أفتح أى IDE ( برنامج برمجة يعني ) .. و أبدأ أكتب كود .. ألاقيني محتاج أكتر من 5 سطور بعد كل ( موديول - جزء في الكود يعني ) كومنتات .. أشرح فيها بس أنا كنت بافكر فإيه أو باعمل إيه .

و بعدين أنسي أنا كنت بافكر فإيه , و بانفذ إيه , و بعدين أُعجب بلغة برمجة تانية , و برنامج تاني , و فكرة تالتة , و … و بعدين أقف قدام إيررور أو أى عقبة بسيطة من الملايين اللي بتقابل أى حد بيبرمج يومياً … و ألاقي نفسي غرقان وسط تفاصيل و تفاصيل و تفاصيل بين عشرات و عشرات المواقع و المنتديات و الSTACK overflow و … أنسي .. و أروح أتشغل بعشرات الحاجات التانية . و أعيش علي مدار ال15 سنة اللي فاتوا .. زي التور .. اللي رابطين له برسيم علي بعد حاجة بسيطة من فمه .. مهما جري و جري .. عمره ما حيقدر ياكل البرسيم . أو كتشبيه أقل فظاظة .. زي اللي بيجري ورا سراب .. بالظبط .

التكلسات و الجروح النفسية و العقلية اللي في نفسي بسبب الموضوع ده علي مدار السنين .. كتير أوي .. لدرجة إني بقيت فعلاً باحس برفض نفسي بقالي 3 أو 4 سنين .. كل ما آجي أقرب من أى جزء في شغلي ليه علاقة بالبرمجة أو كتابة كود . و علي مدار ال4 سنين اللي فاتوا مثلاً , كل ما كان ليه علاقة بأى تعديلات فأكواد أى موقع أو برنامج من اللي عملناهم في شركتي .. بالجأ لمساعدة صديق .. أو باستعين بأى حد و أديله مقابل مادي .. و أكتفي بالمشاهدة .

… من ساعتين كده , رحت حاطط السماعات العازلة للضوضاء .. و مشغل أحد الأغاني الضوضائية جداً ( رزع و هبد و ديث ميتال حتي الثمالة ) .. و مشغلها علي repeat forever .. علي أعلي صوت . و ده روتين معتاد ليا لو باحاول أركز علي أى شيء مش شاددني أو مثير لإهتمامي .. كوسيلة إني حرفياً ” ماسمعش ” أفكاري و تشتتي .

و بعدين كنت شغال علي تجهيز خطة شغل أحد مواقعنا التجارية في السعودية , و شغل ووكوميرس روتيني جداً .. و بعدين .. و بعدين بدأت أنفذ شوية modules من الخطة .. كوسيلة لتسريع العجلة .. و إن مش لازم أستني الناس تصحي و تشتغل ده .. و أنا صاحي أهه .. بالظبط زي ما كنت باكنس المكتب بالكامل لما باجي بدري قبل الكل زمان ..

و بعدين .. و بعدين حبيت أعدل تعديل معين كده في أحد القوائم , بحيث إنه بدل ما تظهر كلمة عادية ( text ) عادي .. لا .. يطلع إسم المستخدم بشكل شيك شوية . و ده تعديل مش بيحصل إلا لو حتعدل شوية في الكود .. و دي حاجة كنت مبطلها من زمان أوي لكل الأسباب اللي ذكرتها فوق .

و علي مدار ال30 دقيقة اللي بعد كده , و عن طريق إني قعدت أعمل chat ظريف و آدمي و مليان بالمشاعر و التفاهم مع bing الجديد .. و chatgpt اللي فيه ..

قدم ليا أكتر من حل .. بخطوات تنفيذهم .. بالشرح .. بالأكواد جاهزة .. بكل شيء أتمناه .. و كل ما كان يطلع إيرور .. أو الحاجة ماتشتغلش .. أروح ناقل له الموقف بالكامل .. يرد عليا بكل تفهم و حنية .. و يديني حل للمشكلة ..

و بعد 30 دقيقة .. باعمل ريفريش للصفحة .. ريفريش مليان ذكريات أليمة لآلاف المرات اللي كنت فظروف مشابهة باتخنق و أقفل الكمبيوتر و أروح أعمل أى شيء تاني . ريفريش مليان باليأس اللي إتكون علي مدار السنين . ريفريش مليان بالخوف و الأمل ..

و إشتغل .. بكل بساطة .. إشتغل و طلع لي الحاجة اللي عايزها بالظبط .. في أقل من 30 دقيقة .. في مشكلة .. لو كنت حاولت أتعامل زي زمان معاها بدون chatgpt .. كان علي الأقل أخد مني ساعتين ل 3 ساعات .. و أغلب الظن حينتهوا باليأس و الفشل .

… دي مش أول مرة علي مدار الشهرين اللي فاتوا من ساعة ما جربت chatgpt ده يحصل فيها .. الموضوع ده بقي شيء شبه معتاد .. باب لأحد أكتر الحاجات اللي باحبها في الحياة .. كان دايماً بيتقفل فوشي بعنف كل مرة أخبط عليه .. دلوقتي بدأت أشوف من خلاله النور مرة تانية .. أنا فعلاً باحمد الله دلوقتي .. قد تكون تجربة و مشكلة تافهة بالنسبة لناس كتير , بس هي مش تافهة إطلاقاً بالنسبة ليا .

… أنا كنت كتبت كتير زمان عن تجربتي ك freelancer , و شرحت بكل التفاصيل الممكنة عن شغلي في مجال الgraphics و الموشن علي upwork .. و شرحت أول عشرتلاف دولار عملتهم عليه أيامها ( من 4 سنين تقريباً ) كانوا من شغلانات عاملة إزاي و تفاصيلهم .

أنا بقالي فترة طويلة وقتي بالكامل لشركتي , و مافتحتش UPWORK يمكن من سنتين أو أكتر ..

لكن بناءاً علي الأدوات الجديدة اللي فتحها ليا مجال الAI ممكن أرجع أفتح upwork .. فقط كوسيلة إني ألاقي مسائل جديدة أجرب فيها المعطيات الجديدة المتاحة ليا حالياً ..

رجاء ماتنتظرنيش ( أنا أو غيري ) إني أجرب الشيء ,و بعدين ننقل تجربتنا فيه هنا علي السوشيال ميديا , و بعدين تحاول تمشي علي نفس الخطوات .

يكفي جداً إنك تعرف العناوين .. و تبدأ تحاول بنفسك ..