" الريحة يا أدهم .. الريحة إيحة إيحة إيحة "
فاكر نكتة معينة ضحكت عليها كتييير زمان .. لأن كل اللى حواليا ضحكوا .. بس فاكر إنى قعدت كتييييييير أفكر فيها و أسأل .. هو أنا باضحك ليه ؟!
” الريحة يا أدهم .. الريحة إيحة إيحة إيحة “
فاكر و أنا صغير فإبتدائى أيام ما كان بييجى على التيليفزيون القناة التانية يوم الخميس فى الصيف .. ليالى أضواء المدينة .. و كان بييجى فقرة عزب شو .. و يقول نكت .. فاكر نكتة معينة ضحكت عليها كتييير زمان .. لأن كل اللى حواليا ضحكوا .. بس فاكر إنى قعدت كتييييييير أفكر فيها و أسأل .. هو أنا باضحك ليه ؟!
النكتة بتقول : مرة واحد بلدينا ماشى فى الصعيد الجوانى طلع عليه إتنين بالسلاح و رفعوه و سألوه : “إنت معانا ولا مع الناس التانيين ؟! ” رد ” معاكم .. والله العظيم معاكم ” .. ضربوه بالنار و قالوله ” هأوأوأو … إحنا الناس التانيين “
زمان و أنا فإبتدائى .. كانوا بيقسموا الفصل الولاد ضد البنات فى المسابقات .. كنت باكره ده جداً لأن البنت اللى كنت باحبها (فى إبتدائى ) كنت بابقى عايزها تغلب .. و بكل صراحة ماكنتش باستلطف معظم الولاد خالص
“إسلام مالوش فى الكورة لا ” الجملة دى بتتقال بشكل دائم منين ما يتفتح أى حوار فى الكورة حواليا .. و دايماً بارد :
- يا جماعة والله أنا ليا فى الكورة و بالعب ماتش كل خميس و بالعب بلاى ستيشن كويس و باغلب معظم الوقت .. بس أنا (ماباشجعش) حد . .. بيبصولى بإستغراب و من فوق لتحت … سيبوه سيبوه ده مجنون .
و أنا فإعدادى .. كانت مدرسة حكومية .. و كان المعتاد إن كل أسبوع تقريباً بيتجمع فرسان المدرسة بما أعدوا من قوة و أسلحة بيضاء و عتاد الخيل .. و يعلنوا الحرب على مدرسة مجاورة .. و فى المعتاد كان بينتج عن المعارك دى إصابات عديدة و عاهات لحد النهاردة إصحابها عايشين بيها .. عمرى ما طلعت أى غزوة من غزوات إعدادى دى .. و كنت دايماً باسأل : طب أنا باكره المدرسة دى بشدة و مش طايق لا الطلبة ولا المدرسين ولا المواد اللى بناخدها فيها … بس كنت طالب مثالى و متفوق و باطلع مسابقات بإسمها . يا ترى يا هل ترى .. المدرسة بتحبنى أنا أكتر ؟ .. ولا بتحب الطلبة اللى بتطلع تحارب بإسمها و تزعق بعلو الصوت فى الشارع ” مدرسة الشهيد علمت على خ$@^ت مدرسة فيصل ” ؟!
كل خميس و إحنا بنلعب كورة .. فى مننا ناس إصحابى يمكن يكونوا بيقروا البوست ده دلوقتى ;) .. بنقسم كل مرة من أول و جديد .. و زميلى فى الفريق النهاردة .. الأسبوع الجاى ممكن يكون بيلعب ضدى .. فى ناس لما بيدخل فينا جون بتزعق و تتخانق و أحياناً تمشى زعلانة اليوم بالكامل .. عمرى ما فرق معايا !! .. و عمرى ما حسيت إنى المفروض أضايق لو غلبت أو إتغلبت فى الكورة .
زمان و أنا فإبتدائى .. كان فى درس إحصاء و رسم بيانى … و إدونا واجب .. إننا نقف فى بلكونة بيتنا .. و نعد لمدة ساعة كام عربية مشت فى الشارع و نقسم :
4 عربيات زرقة
5 عربيات حمرا
2 عربية سودة
.. و نعمل رسم بيانى بده ..
سألت : طب و نوع العربية ؟ .. و سرعتها ؟ .. و ماشية لمين ولا شمال ؟ .. و أى شىء تانى ممكن يميزها ؟ … ندخل ده فى الموضوع ولا لا ؟
ردت عليا الميس :
لا .. لسة لما تكبر حتاخد الكلام ده مش دلوقتى
… لما كبرت عرفت إن فى حاجة إسمها correlation و ده كان فتالتة هندسة إتصالات بالمناسبة .
فقصص أدهم صبرى (رجل المستحيل ) .. كان لما أدهم صبرى البطارية بتاعته تفضى و يحب يعمل تيربو بوووست و يشغل النيترو .. كان بيفتكر أبوه و هو بيقول له .. “مصر يا أدهم ” … كنت دايماً باسأل .. طب لما فقد الذاكرة و عاش فى المكسيك .. كان حيفتكر الموضوع ده ب: ” المكسيك و السومبيريرو يا أدهم ” .. و يسخن و يهيج عشان المكسيك برضو ؟!
كبرنا و دايماً بنتقسم عشان أسباب كتيييير :
- الولاد و البنات
- القصيرين و الطوال
- المسلمين و المسيحيين
- المصريين ومش المصريين
- المتفوقين و مش المتفوقين
- الأهلى و الزمالك
- الريال و برشلونة
- إحنا ولا الناس التانيين .
بس أنا ولد و كنت باحب بنت طويل و إصحابى قصيرين مسلم و إصحابى و جيرانى مسحيين من مصر بس معظم شغلى و ثقافتى مع ناس من برة مصر من دول كتير متفوق و إصحابى فشلة .. و العكس شجعت حسام حسن و أبو تريكة بالعب بالريال و برشلونة و باغلب بالإتنين أنا أنا و برضو أنا من الناس التانيين
فرأييى .. إن أوقع تقسيم للناس .. هو الطريقة اللى بيحبوا يشربوا بيها القهوة … شخصياً باحبها عالريحة .. و مجتمع عالريحة بقالهم كتير بيتظلموا فى القهاوى و بيتعاملوا على إنهم مظبوط .. إحنا أقلية يا ريحة .
والله أعلم .