كنت باسجل فيديو إمبارح عن إن أحد اللعنات اللي بيعاني

كنت باسجل فيديو إمبارح عن إن أحد اللعنات اللي بيعاني منها أمثالي ( ADHD ) هي الإحساس الدائم و المستمر إنك في المكان الغلط بتعمل الحاجة اللي مش علي مزاجك . يعني لو أنا فحفلة و كل اللي حواليا بيتنططوا إحتفالاً بشيء ما ( حتي لو كان إحتفال بيا شخصياً ) , بابقي حاسس إني عايز أكون لوحدي في مكتبي عشان في أفكار فنافوخي قررت تطلع دلوقتي . و لو أنا لوحدي فمكتبي , بابقي مش عارف أشتغل دقيقتين علي بعض لأني حاسس إن العالم كله بيحتفل فمكان تاني , و أنا اللي قاعد محبوس لوحدي . و حالياً قاعد باخلص شغل بالمايوه علي البووول , و حاسس إني عايز أكون في الجيم و إني مقصر , و إني جعان و عايز آكل , بس الأكل بيخليني ماعرفش أشتغل , و إن في كام ميعاد ممكن كنت أبقي باخلصهم دلوقتي . و إن و إن و إن .. … السبب البسيط في اللعنة دي .. هي إن أياً كان اللي باعمله .. عقلي برضو مافيهوش دوبامين كفاية في حالته العادية .. يعني لازم يكون في قمة الإثارة و الإنتشاء و الإندماج في الشيء .. و إلا يكون حاسس إنه بينام و مخنوق و مكتئب و إن السعادة كلها في شيء آخر . … يعني حالتي المعتادة دائماً هي إما :

• مش في المووود . أو :
• في الزوووووووون .. و مركزززز جداً و سيبوه لوحده دلوقتي ماحدش يكلمه . و باقي الوقت .. طول الوقت .. إحساس مستمر إنك في المكان اللي مش علي مزاجك .. بتعمل اللي مش علي مزاجك .

** بالمناسبة .. ده برضو أحد أسباب إن بعد ما تبذل مجهود جبار عشان ترتب أوضة مكتبك بالشكل اللي تحلم بيه , و تجيب إضاءة و شاشات و إكسسوارات و كل اللي ممكن تتمناه .. بمجرد ما تنتهي من ده .. و المفروض تشتغل بقي .. تلاقي نفسك قاعد زهقان بتدور علي حاجة جديدة تشد إنتباهك . … … الحمد لله … لعله خير