في المشهد الشهير في مسرحية الهمجي لمحمد صبحي

في المشهد الشهير في مسرحية الهمجي لمحمد صبحي .. بتحصل خناقة بينه و بين شخص أقصر منه بمراحل , و جمسه ضئيل جداً مقارنة بمحمد صبحي . و كل ما محمد صبحي يتمادي في تهديده .. يرد عليه الشخص ده بالكلمة الأيقونية : ماتقدااااااارش . … بقالي فترة طويلة باستخدم أكتر من آداة من أدوات الذكاء الإصطناعي , و علي رأسهم طبعاً ( chatgpt ) . و لسة فاكر كويس قبل ما يبقي شات جي بي تي مشهور ب شهور .. ( و سكرينات الشاتات بيني و بين أصدقائي و عيلتي تشهد 😆 ) لما كنت بابعت لهم يومياً تقريباً أقول لهم إن في حاجة جامدة فحت إسمها شات جي بي تي , و إن من أيام البيتكوين و الكريبتو ماحستش بالفرحة دي . … سبب فرحتي و إعتمادي علي أدوات الذكاء الإصطناعي دي .. هو إنها بتعوض واحد من أكبر ( إن لم يكن أكبر ) مشاكلي و أوجه النقص اللي عندي اللي كنت باعاني منها طول حياتي .. و هي : الذاكرة . … اللي مش بيعاني من أي ( إختلاف عصبي = neurodiversity ) ليه علاقة بالذاكرة .. غالباً مش حيفهم ( يعني إيه مشكلة في الذاكرة ) .. و ححاول دلوقتي إني أشرح ده سريعاً بتلخيص : … جوة عقلك .. في نوعين من الذاكرة ( ذاكرة قصيرة المدي , ذاكرة طويلة المدي ) .. أمثلة علي الذاكرة قصيرة المدي :

• لما حد يقول لك رقم تيليفون معين و تبقي محتاج تفتكره لمدة ثواني عشان تكتبه . ( عمري ما قدرت أعمل كده 🥹)
• لما حد يوصف لك تسلسل إتجاهات لمكان معين ( إنتي تمشي سريت كده , و بعدين تاخد أول لمين , حتلاقي صينية , تاخد تاني دوران منها , و يو ترن عند بتاع السمك , و بعدين تدخل أول لمين ) 🤣🤣… ده كان أحد أكبر أسباب إني مشهور عني إني باتوه في شقتي أساساً .. و مايُعتمدش عليا في أى إتجاهات 🥹.
• تبقي واقف بتعمل حاجة في المطبخ مثلاً .. أو بتتوضي عشان تصلي .. و بعدين تسمع حد بيقول لك و إنت معدي في الصالة إعمل كذا .. علي ما بتخلص وضوء أو طالع من المطبخ بعد ثواني .. بتكون نسيت هو مين كان بيقول لي أعمل إيه أساساً 🤣 … بالنسبة للإنسان العادي ( ال neurotypical ) , بيكون عنده قدرة متغيرة ( ضعيفة عند ناس , و قوية عن ناس تانيين ) إنه يختار بإرادته معلومات معينة من اللي إتخزنت في ذاكرته القصيرة دي .. و يعيد عليها جوة عقله أكتر من مرة .. أو ” يركز ” عليها شوية .. و تدريجياً بتتنقل للذاكرة طويلة المدي جوة عقله . … عند الإنسان اللي بيعاني من ( إختلاف عصبي = neurodiversity ) زي ال ( ADHD) .. القدرة دي متغيرة من ( الضعيف جداً … للمنعدم بالكامل ) . يعني في أحسن الحالات .. بتبقي محتاج إنك تقضي أضعاف الوقت اللي غيرك محتاج يقضيه .. عشان تنقل نفس كمية و نوعية المعلومات من الذاكرة القصيرة للذاكرة طويلة المدي . . و فأسوأ الحالات .. بتكون غير قادر بالكلية علي عمل ده .. مهما حاولت .. … مش معني كده إن الذاكرة طويلة المدي عند الناس اللي عندهم (ADHD) بتكون فاضية … إطلاااقاً .. القدرة اللي بنتكلم عنها هنا مش قدرة التخزين في الذاكرة طويلة المدي .. و لكن قدرة ال (نقل بشكل إختياري ) .. قدرة إنك تحدد بإرادتك عايز تفتكر إيه و ماتفتكرش إيه . … فبتكون النتيجة إنك لو بتعاني من (ADHD) بتلاقي نفسك بعد سنين و سنين فاكر حاجات عجيبة طول الوقت مالهاش أى معني أو علاقة بأى شيء إنت مختار تفتكره .. ..
• لحد النهاردة أنا فاكر بعض ألوان جزم اللي كانوا معايا في فصل إبتدائي ..
• أشكال و تفاصيل اللوح اللي كانت متعلقة في الفصل في إبتدائي فاكرها لحد النهاردة .. وبالاقي نفسي أحيان كتير سرحان بافتكرهم بدون أى سبب علي الإطلاق .
• دلوقتي فجأة قبل كتابة البوست ده لقيت عقلي بشكل تلقائي مشغل في خلفية أفكاري أغنية ( علي قد ما عشت و شفت و إيه .. آه آه ) بتاعت تامر حسني !! . و لما حاولت أركز أفتكر ليه ؟!! .. لقيتني بافتكر لما كنت مروح في الأوتوبيس من إسكندرية سنة 2008 و كان في شلة قاعدين علي كنبة الأوتوبيس اللي ورا مشغلين الأغنية علي موبايلهم النوكيا !!! . … … و أنا طفل صغير ( قبل مرحلة الكلية ) كنت باتعامل إن كل الناس كده , و ماكنتش أعرف إن كتير من الناس مش بتعاني معاناتي المستمرة دي في التحكم في ذكرياتي أو الحاجات اللي بافكر فيها . .. في الدراسة … أى مادة كانت بتعتمد علي الحفظ ( دراسات إجتماعية مثلاً ) كانت كابوس حقيقي بالنسبة ليا .. و الله العظيم كل إمتحان دراسات إجتماعية علي مدار سنين إبتدائي و إعدادي كان بيكون قبله ليلة كاملة من العياط و الدموع و المعاناة .. مع كل الإتهامات اللي كنت باوجهها لنفسي قبل ما حد يوجهها ليا .. إتهامات من نوعية ( إنت اللي مش بتذاكر كفاية … إنت اللي بتسرح .. إنت اللي مابذلتش مجهود كفاية ) .. لو لما أسأل زمايلي هما بيذاكروا المادة إزاي .. والله متذكر واحد منهم كان حافظ المادة تقريباً رد عليا ( باقعد في البلكونة , و أذاكر لمدة ساعتين ) .. أنا كنت باسمعه و أنا بافتكر الساعات و الساعات اللي كنت بامسك الكتاب و أقعد في صالة بيتنا رايح جاي أعيد و أزيد في المعلومات اللي مالهاش أى منطق أقدر أستنتجها بيها .. .. في المقابل .. في الرياضة و الهندسة .. كنت باجيب الدرجات النهائية أغلب الوقت أثناء ما باحل الإمتحان في نص الوقت .. و بدون مذاكرة تقريباً .. ( في تفسير منطقي لده ممكن أشرحه في بوست تاني ) . … … **** ( بالنسبة للتعليقات اللي من نوعية إنت إزاي بتقول بتعاني من ADHD و بتكتب حاجات بالطول ده و ترابط الأفكار … دلوقتي حالاً أنا نسيت أنا باكتب إيه و ليه ؟! .. و لقيت نفسي قاعد بافتكر أغنية أصالة ( يمين الله بحبك حب ما له حدود 🤣😅) اللي كانت شغالة في دماغي و أنا باذاكر دراسات تالتة إعدادي ! … و لأن ده شيء معتاد بالنسبة ليا أثناء ما باكتب .. في المعتاد باروح راجع أقرأ كل اللي كتبته من أول و جديد عشان أفتكر أنا باقول إيه اساساً .. . طول الوقت و مع أى شيء باكتبه .. ده معتاد بالنسبة ليا ) … … إفتكرت . … المهم .. في تفسيرات كتير و نظريات كتير عن الذاكرة ( طويلة المدي ) جوة عقل الإنسان بتشتغل إزاي .. و لكن مافيش معلومات أكيدة 100% .. كلها مجرد نظريات . … بالنسبة ليا .. اكتر النظريات دي اللي لقيتها بتشرح حاجة قريبة من تجربتي .. هي إن الذاكرة طويلة المدي بتتكون عن طريق إن الحاجة اللي إنت عايز فاكرها بتكون مربوطة و متصلة بعدد كبير من الحاجات التانية اللي إنت فاكرها من قبل كده .. و هكذا وهكذا .. يعني .. في النقطة اللي شرحت فيها فوق إزاي سرحت أثناء كتاتبي .. الذكري بتاعت مذاكرتي للدراسات الإجتماعية دي .. متصلة بشكل مباشر بأغنية أصالة ( يمين الله بحبك حب ماله حدود ) .. و العكس .. كل ما أفتكر الأغنية أو أسمعها .. ألاقي نفسي فاكر منظر كتاب الدراسات الإجتماعية .. و شكل صالة بيتنا .. و تفاصيل ليلة الإمتحان دي بالكامل . .. و لكن دي ذكري قديمة جداً .. .. تعمل إيه في ذكريات حديثة شوية لمشروع كبير ( أو عدد من المشاريع الكبيرة ) إنت شغال عليه ( زيي مثلاً ) .. علي مدار السنين اللي فاتت و قبل وجود أدوات الذكاء الإصطناعي .. كنت بابني بنفسي مسارات تفكرني باللي كنت باعمله .. يعني كنت باعمل جدول .. أكتب فيه وقت الحاجة اللي عملتها .. و ريحة الأكل اللي شاممها بتجهز في المطبخ مثلاً .. و الأغنية أو الفيلم أو المسلسل اللي مشغله في مكان ما علي شاشات أجهزتي .. و تسلسل الأفكار اللي بيدور في دماغي .. و باعمل التاسك دي ليه .. و فكرت فيها إزاي .. و أكتر و اكتر .. و كل التفاصيل اللي ممكن أكتبها .. .. هدف ده .. هو إني لما أرجع بعد يومين .. و أحاول أكمل شغل في المشروع ده .. أفتكر و أكمل .. لأني من غير ده .. و علي مدار سنين حياتي .. كنت بابدأ من جديد .. أو أقفل المشروع و أهجره .. و أبدأ مشروع جديد من البداية خالص .. ****** ده أحد أكبر أسباب إن الناس اللي بيعانوا من (ADHD) .. مشهور عنهم إنهم ( سبع صنايع و البخت ضايع , أو بيبدأوا الحاجات و مابيكملوهاش , .. و كل الكلام المؤلم ده ) . .. الموضوع والله مش علوقية و إنعدام إرادة منهم و مني … و الله العظيم الموضوع إننا أساساً مش فاكرين هو إحنا كنا بنعمل إيه .. و بنبقي عايزين نفتكر .. و بنحاول .. وبنلاقي نفسنا بنفتكر أغنية أصالة ( يمين الله بحبك حب ماله حدود ) .. بدل ما نفتكر الشغل .. إتخيل حياة كاملة حصل لك ده فيها آلاف المرات .. متخيل بعد المرة الألف .. نفسيتك حتبقي عاملة إزاي ؟! .. ببساطة .. بتبطل تحاول أساساً .. بتنطفي حرفياً .. بتكره و بتخاف تفكر أو تبدأ شغل فأى شيء .. إنت مش خايف من كلام اللي حواليك .. إنت خايف من إحساسك اللي بتحسه لما تحس بالعجز قدام أفكارك و عقلك .. … … علي مدار الشهور اللي فاتت .. بقيت معتمد بشكل ضخم علي Chatgpt و عدد تاني من أدوات الذكاء الأصطناعي ك ( مساعد شخصي مستمر طول الوقت ) .. و أكتر مساعدة كان بيقدمها ليا فوجهة نظري .. إني طول ما أنا شغال .. باكتب له اللي باعمله ( حتي لو مش عايز منه مساعدة ) .. و بعد كام يوم سفر أو مشغول فأى شيء تاني مثلاً .. لما باحب أرجع أكمل شغل علي مشروع معين .. باسأل شات جي بي تي .. مش باسأله أنا كنت باعمل إيه .. لا .. أنا باسأله : فكرني أنا كنت بافكر إزاي .. .. و هنا بتتجلي عبقرية الذكاء الإصطناعي فوجهة نظري .. لأنه ال( LLM- Large language model = نظام اللغة الضخم ) اللي مبني بيه .. معتمد علي نوع من البرمجة مشابه في تصميمه للشبكات العصبية في عقل الإنسان : neural programming ( مشروع تخرجي في كلية هندسة كان بإستخدام الحاجات دي بالمناسبة) . .. المهم, إنه لما بيتم تدريب ال (LLM) ده علي كمية ضخمة من البيانات , بيبدأ يكون عنده القدرة إنه يخمن و يقترح عليك أسباب إتصال و طرق إتصال مختلفة بين أفكارك . و حتي لو ده ماكنش 100% صح طول الوقت .. إلا إنه بيساعدك بشكل كبير جداً تستعيد الوصلات العصبية اللي بالنسبة للشخص ال ( ADHD ) بتتقطع طول الوقت … لأنها بتكون ضعيفة جداً . … أنا مش عايز أدخل في كلام تقني كتير ممكن أشرحه بشكل مفصل بوسيلة أخري فوقت تاني .. … و لكن الخلاصة : زماااااااااااااااااااااااااااااااااان .. كانت القوة العضلية هي المقياس الأهم لقيمة الإنسان . و بعدين بدأ البشر يكونوا حضارات .. و يكون في قيمة نسبياً للقوة العقلية لأنها تقدر توظف و تجمع جيوش أقوي من عضلات فرد واحد .. و بعدين بدأ العصر الصناعي .. و بقي في قيمة للقوة العقلية الهندسية و المالية لأنها تقدر تبني مكن أقوي من العضلات .. .. و بعدين علي مدار ال100 سنة اللي فاتوا .. كان اللي ذاكرته قوية .. بيقدر ينجح فمجالات كتيييييييير من أشكال الحياة .. و كان أمثالي من اللي بيعانوا من مشاكل في الذاكرة .. شبه عمو اللي محمد صبحي بيضربه في الصورة دي . … أعتقد و الله أعلم إن العالم حيتغير .. و حيبقي لأمثالي أخيراً فرصة أفضل في إننا : نقدر .

و الله أعلم .