الإجابة في خطوات واضحة و مترتبة

4- أفضل طريقة أنصحك بيها عشان تفشل في عمل المبلغ ده .. أو أى مبلغ تظن إنه هدفك .. هو إنك تعتقد إنك المفروض تعمل حاجة جديدة .. أو إنك تجري ورا وهم ال ( فرصة ) .. أو خرافة ال ( لُقطة ) .

AR 9 د

الإجابة في خطوات واضحة و مترتبة : … أول و أهم تلات خطوات عشان تفشل : .. 0 - إعمل save للبوست ده , و إنساه .. و ماتقراهوش تاني . 1- إقرا جزء من البوست , و كسل تكمله لأنه حيكون غالباً طويل … و روح إفتح تيكتوك أو إنستاجرام و سكرول بلا هدف هناك . 2- إقرا جزء من البوست , و كسل تكمله .. و إكتب كومنت تطلب التلخيص . 3- إقرا البوست قراءة جرائد سريعة , و بعدين إكتب كومنت تسأل فيه علي حاجة مشروحة أو واضحة … أو تسأل علي حاجة تقدر تحصل علي إجابتها من جوجل خلال أقل من دقيقة . .. 4- أفضل طريقة أنصحك بيها عشان تفشل في عمل المبلغ ده .. أو أى مبلغ تظن إنه هدفك .. هو إنك تعتقد إنك المفروض تعمل حاجة جديدة .. أو إنك تجري ورا وهم ال ( فرصة ) .. أو خرافة ال ( لُقطة ) . … 5- إعتنق العلوقية كأسلوب حياة .. يعني بعد ما تواجهك أول عقبة أو مشكلة .. كسل .. و خد بعضك إنزل علي القهوة إتفرج علي الماتش لحد ما تنسي إنت كنت عايز تعمل إيه أساساً . … 6- ماتصدقنيش لما أقول لك إن طريقة عمل الفلوس ماختلفتش منذ خلق الله البشر .

و هي إن الفلوس بتيجي لما ( تتاجر … في سلعة أو خدمة ) يعني : تدرس مهارة ما .. و تقبض فلوس مقابلها . أو تبيع سلعة ما .. و تاخد عمولتك . خليك معتقد دايماً إني مخبي سر المهنة و مش عايز أقوله علي العلن هنا . … طيب .. نتكلم جد شوية ؟ : … 7- أى هري تسمع عنه ( كريبتو , ذكاء إصطناعي , غباء طبيعي , برمجة , حوسبة سحابية , … ) ما هي إلا أدوات .. مجرد أدوات .. تتعلمها ( لو أردت , و لو قدرت ) عشان تسهل لك جزء من الشغل .. و لكنها مش الشغل ذاته .. و مش طريق مختصر للربح السريع . … 8- ماتأجلش إنك تبدأ تتاجر .. لحد ما تفتح مول . يعني إيه ؟

يعني نفترض إنت مقدار مهارتك الحالي يساوي 1 من 100 … حلو .. يبقي تقسم وقت شغلك تلات أجزاء مهمين .. أ - جزء تتاجر فيه ( يعني تحاول تبيع مهارتك دي مقابل أى فلوس .. حتي لو كانت بضع ملاليم ) . ب- و جزء تتعلم فيه ( و تحاول تنمي مهارتك اللي بتتاجر فيها ) ج - و جزء تحاول تعرف فيه إنت مش عارف إيه .

شرح النقطة ( ج ) لأنها بالنسبة ليا أهم نقطة : إنت دلوقتي ممكن مايكونش عندك أى معلومة عن إن منصة معينة زي ( شوبيفاي ) ممكن تدخل عليها و تعمل ( تكامل = integration ) مع عدد من خدمات الذكاء الإصطناعي اللي ظهرت مؤخراً .. و تخليك تقدر تعمل متجر متكامل معتمد علي أمازون في عُشر الوقت اللي كان الموضوع ده بيحتاجه من 6 شهور فاتت .

لما قرأت إنت الخمس سطور اللي فاتوا دول .. إنت ماعرفتش أى حاجة عن تفاصيل الموضوع ده .. و لكنك عرفت إنك ( ماتعرفش ) أى حاجة عن تفاصيل الموضوع ده .. و بالتالي .. تقدر تحطه ضمن الحاجات اللي تتسلي فيها النهاردة بالليل و تتفرج علي فيديو يوتيوب عنها . لأن ممكن يكون في إحتمال إنه يفيدك في حاجة تكون شغال فيها حالياً . أو يفيدك في المستقبل و يربط معاك في فرصة ما .. ماكونتش حتعرف إنها فرصة .. إلا لو كنت عارف عن عناوين الموضوع علي الأقل . …

9- اللي بيحصل في المعتاد بقي للأسف إيه ؟ : إنك بتقرا الكلام اللي فوق ده .. و تتكسف .. تتكسف تكتب علي الفيسبوك بتاعك إنك بدأت تكون شغال ك ( حط أى مهارة مش محتاجة رخصة و نفسك تشتغلها هنا ) … لأنك خايف من تريقة إصحابك عليك .

في وظائف ماينفعش تمارسها إلا لما تكون واخد رخصة إنك فاهم ما يكفي إنك تمارسها ( دكتور , مهندس , … ) لكن في وظائف تانية كتير تقدر تمارسها كهواية و تقبض مقابل لده ..

و زماااااان , قبل 6 شهور يعني .. قبل ما الذكاء الإصطناعي يكون منتشر بالمنظر ده .. كان الموضوع أصعب بكتير من دلوقتي .. لكن حالياً تقدر جداً تمارس عدد محترم من الوظائف و المهام … فقط بالإعتماد علي أدوات الذكاء الإصطناعي .

لكن المهم إنك ( تبطل تتكسف ) … السيناريوهات التالية .. كل واحد منهم جربته بشكل فردي .. و جربته بشكل مؤسسي .. مع إختلاف حجم الموارد المستخدمة . …

10 - سيناريو ( بياع الكتب العالمي ) .

1- إعمل موقع أو مدونة بأى إسم ليه علاقة بالكتب بشكل عام ( تقدر تعمله بداية من صفر دولار ) .

2- إستهدف في إنشاء لغة الموقع ( مش ترجمة جوجل .. لا .. و لكن لغة المحتوي اللي علي الموقع ) لغات البلاد اللي تحب تشتغل معاهم ( إنجليزي , فرنساوي , … ) .

3- شوف الأفلام اللي نزلت في السينيما العالمية ( و المحلية .. علي حسب البلد اللي مستهدفها ) .. و اللي مستوحاه من كتب أو قصص منشورة .

4- أدخل علي أمازون ( أو أى موقع لشركة أفيلييت تديلك أكسس لأمازون ) مع مراعاة إنه يكون في البلد اللي مستهدفها .. و إشترك في برنامج أفيلييت أمازون .

5- دور علي الكتب اللي الأفلام اللي نزلت مستوحاه منها .

( السيناريو ده أنا باشرحه من أيام فيلم Dune ما نزل من سنتين .. و إشتريت السلسلة بنفسي ليا شخصياً كمان أيامها و نزلت صورتها هنا أتذكر ) .

6- إعمل بوستات عن الكتب اللي الأفلام مستوحاه منها , حط لينكات الأفيلييت للكتب .

7- إعمل أكاونتات سوشيال ميديا للموقع بتاعك ( فيس , يوتيوب , إنستا , تيكتوك , … ) .

8- حول البوست اللي كتبته علي الموقع لمحتوي مرئي و صوتي ينزل علي أكاونتات السوشيال دي .

9- روح عد فلوسك علي أمازون .

10 - نفس الخطوات السابقة تقدر تطبقها علي أى سلعة تانية تحبها .. و فأى ( demographic - بلد و لغة و منطقة يعني ) تحبها . طالما في ( hype - دوشة ) علي السلعة دي في ال( mainstream media - يعني الأفلام و البرامج و المسلسلات ) .

السيناريو ده تقدر تسميه ( بدايتك في ال growth hacking ) .

متطلباته :

و مش محتاج منك أى خبرات أو مهارات سابقة .. تقدر تتعلم كل ده علي يوتيوب و بالعربي خلال أسبوع أو أقل تقريباً .

11- سيناريو ( سمسار الأنفار ) .

1- أدخل علي أكتر من موقع للشغل الحر زي : ( الحريفة , upwork , … ) .

2- إعمل 2 أكاونت علي كل موقع … واحد كشركة طالبة شغل .. و التاني ك ( مُقدم خدمة - فريلانسر ) بيدور علي شغل .

3- فاكر الأسئلة بتاعت أولي إبتدائي زمان ؟ .. بتاعت التوصيل .. حتعمل نفس الشيء .

4- حتشوف ( فريلانسر بيدور علي شغل في الموقع الأولاني ) .. و تشوف مهاراته . و تدخل تدور علي شغلانات مطلوبة في الموقع التاني .. فنفس مهارات الفريلانسر الأولاني . و توفق راسين في الحلال .. مع توضيح عمولتك اللي تحبها .

5- لو قدرت تعمل ده بشكل مؤسسي .. حتبقي برنس و رئيس قسم .. و إبعتلي عشان محتاج ناس زيك دايماً … يعني إيه بشكل مؤسسي ؟! .

يعني في شغلانات بتحتاج أكتر من مهارة و فريلانسر .. زي ( بناء موقع بشكل إحترافي مثلاً ) . الموضوع ده بيحتاج علي الأقل :

كل واحد من دول حتلاقيهم لوحده عايش بيدور علي شغل في الموقع الأولاني ..

و الراجل اللي طالب الشغلانة .. مش فاضي يدير الموضوع بالكامل .. و عايز حد يلاقي الأربعة مع بعض .. و يوصلهم ببعض .. و يتابع ..

لو قدرت تعمل الموضوع ده .. و لقيت نفسك فيه .. خلال 6 شهور غالباً حتفتح شركتك الخاصة .. أو حتمسك إداري عند حد زيي مثلاً . …

لو إنت الحركة بالنسبة لك سهلة .. مواصلات بقي أو عربية .. تقدر تعمل الأصيع بكتير ..

تاخد بعضك و تنزل علي المواقع اللي فيها شغل في مصر ( مش الشارع بتاعكم .. و بالتأكيد مش الشارع اللي وراكم ) .. لا …

تنزل علي العاصمة الإدارية الجديدة , تنزل علي الساحل .. تنزل علي أى مكان فيه بناء و ناس شغالة .. و تبدأ تشوف الطلب علي إيه ..

الأماكن دي مش حتلاقي فيها ناس بتدور علي ( مصممين جرافيكس , ولا كتاب محتوي 😅 ) .. لا .. أغلب الظن حتلاقي الشغلانات و المهارات المطلوبة :

تدون اللي تقدر عليه .. و ترجع تدور علي موقع الفريلانس اللي يعجبك .. و وفق الروس في الحلال و خد عمولتك . … متطلبات الموضوع ده :

12 - السبب إني كتبت السيناريوهين اللي فوق دول .. هما إنهم بيشملوا أغلب الأفكار . يعني إما تبيع ( سلعة ) .. أو تبيع ( مهارة ) .

في ( variations - أشكال مختلفة ) كتييير جداً من السيناريوهين دول .. و كلهم حلوين .. و كلهم بينفعوا ( طالما مش حتخالف دينك ) . .. و أنا قدر إستطاعتي حاحاول أجيبك لو وقفت فأى نقطة .. و لكن : رجااااااااااااااااااااء ماتستسهلش … يعني مش تبعت ليا تسألني ( أعمل موقع إزاي ؟! ) .. يا باشا والله جوجل حيديلك إجابة ممتازة .. مستسهل تسألني ليه ؟! .. رجاااااااااء .. ماتستخدمنيش ك ( جوجل ) .

لكن .. لو بعد ما سألت كل محركات البحث .. و إصحابك .. و أهلك و المجتمع و الناس .. لسة عطلان .. أنا تحت أمرك قدر إستطاعتي … حاكون سعيد جداً إني أدور معاك علي إجابة اللغز اللي عجز الجميع في حله ده .

13- أنا باشرح الحاجات دي للبشر بقالي سنين .. و بفضل الله وحده .. الحاجات دي إشتغلت و بتشتغل معايا و مع اللي بيكمل منهم … و بتطلع نتائج ممتازة بفضل الله و كرمه .

الموضوع مش ساهل .. و صعب .. و محتاج حرقة دم و أعصاب و مجهود كتير . و بالتأكيد حتواجه مسائل من نوعية ( طب أنا عملت فلوس .. أجيبهم مصر إزاي ؟|! ) .. يا باشا الإجابة ببساطة .. لو إنت معاك فلوس و عايز تجيبهم مصر … حييجوا 🤣.. والله العظيم حييجوا 🤣.. قول بس للي حواليك و حتلاقي ناس كتير بتخدم ( مقابل عمولتهم طبعاً 🤣 ) . و العكس صحيح .. يعني عايز تشتري لامبورجيني تحطها فوق سطح بيتكم .. برضو حتقدر .. في ألاف الطرق .. .. لكن .. حتفضل تقرا بوستات الفيسبوك اللي تخليك مفكر إنها قفلت من كل حتة .. حتبقي ( و أنا آسف في اللفظ ) مُغفل .. يعني بيتم تغفيلك .. تنييمك .. تكسيلك . … … خد أكشن .. و الله أعلم .