جزء كبير من القصص اللي أفتكرها في طفولتي , كانت

جزء كبير من القصص اللي أفتكرها في طفولتي , كانت بتبتدي بـ : كان في ملك و عنده تلات أولاد , و عايز يعرف يورث المملكة لمين فيهم . … إتفرجت علي الحلقة الأخيرة من مسلسل ( Succession ) حالاً, و الحلقة نفسها لسة نازلة من ساعات قليلة .

دي مش أول مرة أكتب عن المسلسل ده , يمكن لأني تابعته من أول ما إبتدي من أربع أو خمس سنين تقريباً , .. و كنت منبهر بالروعة اللي تم كتابة الشخصيات و الأحداث فيه .

المسلسل مقتبس جزء كبير من تفاصيل أحداثه و شخصياته , من حياة ( rupert murdock ) الإمبراطور الأمريكي اللي متحكم فمجموعة قنوات ( Fox) .

و من اللحظة الأولي في المسلسل , بتشوف تفاصيل عالم ال ( 00001, % ) اللي ثرواتهم بتتخطي ال10 مليار دولار . شباب في عمر التلاتين .. و لكن عمرهم ما قلقوا و لو للحظة بأى شيء من التفاصيل اللي ممكن تكون عايش حياتك بتفكر فيها .

ميزانية صرفهم اليومي ممكن توصل لمئات الآلاف من الدولارات يومياً .. و مايشغلهمش إطلاقاً أو يسبب لهم أى نوع من أنواع الإزعاج .

كان أحد الوثائقيات الممتعة اللي إتفرجت عليها من شهر تقريباً .. عن طبيعة الحياة بناءاً علي مقدار ثروتك . من ألف دولار شهرياً مثلاً ل 2000 دولار .. حياتك بتبقي عاملة إزاي ؟ و من 2000 ل عشرتلاف .. و من عشرتلاف .. ل خمسين ألف .. و بتفضل تطلع .. لحد ما بتوصل إن ماحدش بيسألك عن دخلك .. و لكن عن ال (networth) بتاعتك .. و دي بتبدأ بعد ال 10 مليون دولار تقريباً .. اللي هو إنت مش بتقول أنا بيدخلي مبلغ كذا شهرياً .. لا .. و لكن أنا قيمتي بتساوي كذا . و معاك بقي و إنت طالع لحد مية مليار .. و كمل .

و إزاي إن بعد مرحلة معينة ( عند المليون دولار ) تقريباً .. بتبدأ الحياة تظهر لك بشكل مختلف .. اللي هو إنت خلاص مش قلقان إن في أى شيء ( طبيعي ذو قيمة) ماتقدرش تشتريه .. إطلاقاً .. تقدر تروح أى دولة .. و تأجر سكن فأفضل الأماكن في الدولة دي لمدة معينة .. و تبقي مش قلقان نسبياً من فواتير الأكل و الشرب و اللبس و الحياة عموماً فيها ..

بس حيبدأ يظهر لك عالم جديد بالكامل .. عالم تمن الحاجات اللي فيه مش بيعتمد إطلااااااااقاً علي قيمتها . يعني مش بتبدأ تدور علي ( قيمة مقابل سعر ) في العربيات أو التكنولوجيا أو الأماكن اللي حتسكن فيها .. و لكن بتبدأ تشوف العالم اللي ( سعر الحاجة .. هو اللي بيحدد قيمتها ) . حتي لو كانت بدون قيمة إطلاقاً .

يعني بتشوف بدلة بتساوي 150 ألف دولار .. ( شفتها بعيني بالمناسبة 🤣) . بالنسبة لك لو إنت كل ثروتك هي مليون دولار .. حتحس إنك ماتقدرش تصرف خٌمس ثروتك علي البدلة دي .. لكن حتلاقي واحد جنبك .. ركن اللامبورجيني بتاعته ( اللي مش أى لامبورجيني .. لا .. و لكن واحدة من عدد معدود جداً مصنع بشكل مخصوص ) .. و مش حيكون مأجر اللامبورجيني زيك .. لا .. هو غالباً بيمتلك 10 عربيات تانيين .. و كلهم ( super cars ) .. و مش نازل يتفرج أو يدور علي بدلة … لا .. هو أثناء ما هو ماشي في العالم حواليك ( لأسباب غيرك إطلاقاً ) .. شاف البدلة أُم 150 ألف دولار دول .. و عجبته .. و بعت حد من حاشيته يخلص فيها . … البدلة اللي ب150 ألف دولار .. إطلااااااااقاً مش أريح ولا أجمل ولا أحسن من البدلة اللي تقدر تشتريها ب 4000 جنيه من وسط البلد . ( بدلة فرحي بالمناسبة جبتها ب1600 جنيه و كنت شايف ده تبذير 🤣🤣 , و أنا باكره لبس البدل عموماً ) .

و لكن البدلة اللي ب150 ألف دولار .. وظيفتها الأولي و الأخيرة هي الإعلان . الإعلان إنك تمتلك ما يكفي إنك تقدر ترمي 150 ألف دولار في الزبالة .

و ده سبحان الله شكل معظم العالم بعد المليون دولار الأولانيين . هو ناس كتير بتحاول بكل شكل إنها تتنافس فإظهار قيمتهم .. عن طريق إمتلاك أى شيء سعره مالوش أى علاقة بقيمته .

إكسسوارات من الألماظ اللي تمن مصنعيتها أضعاف مضاعفة لتمن قيمتها الحقيقية . طائرات خاصة مركونة معظم الوقت . حمامات ( و تواليتات ) مصنوعة من الدهب الخالص . و هكذا و هكذا . …

و لكن … هل المشاعر و الأحاسيس و الأفكار بتختلف ؟! .. …

اللي بتشوفه في مسلسل ( Succession ) هو توضيح قمة في الروعة للجزء ده .. للمشاعر و الأحاسيس و الأفكار .. عند ناس بتمتلك مليارات الدولارات .

إحساس الفقر .. واحد .. لأن حتي لو عندك عشرات المليارات .. حتفضل غير قادر علي إمتلاك بعض الأشياء . و مهما بلغ إمتلاكك .. و مهما بلغت ثروتك .. كل حاجة حواليك حتبقي تافهة للغاية و صغيرة للغاية بالنسبة لعقلك … مقابل الحاجات اللي إنت مش عارف تمتلكها دي .

و حتتصرف بنفس همجية الفقير , و بنفس جوع الفقير , و بنفس حقارة الفقير . و هنا ماقصدش فقير للفلوس .. … و ده لأن الفقر عمره ما كان فقر للفلوس .. إطلاقاً .. الفقر فعلاً هو فقر أفكار و عقيدة . …

آلاف من البوستات اللي باشوفها علي السوشيال ميديا بتوضح إن الناس فاهمين . و إنهم بيحتقروا تصرفات الكائن اللي بيتصور في طيارة خاصة جنب آلاف من الدولارت .

مسلسل المال و البنون كان بيتعاد كل شهر تقريباً في التيليفزيون أثناء طفولتي .

تقريباً كل المسلمين اللي أعرفهم حافظين حديث ( لو كان لإبن آدم واديان من مال .. لابتغي وادياً ثالثاً ) .

مافيش كلمة كتبتها في البوست ده بتجيب جديد , أو بتقول أى فكرة جديدة بالنسبة لمعظم البشر أعتقد ( غير مجرد تعريف بالمسلسل لو ماكانوش سمعوا عنه قبل كده ) .

و مع ذلك .. و مع ذلك باحتاج أفكر نفسي طول الوقت .. مع كل حاجة بتقع عليها عينيا في العالم اللي عايشين فيه ده .. باحتاج أفكر نفسي إن ( كل ده مجرد لعب و لهو ) . و إني محتاج أصحي .. أفوق .. و بعد عينيا عن السراب اللي الدنيا بتغرينا بيه طول الوقت .. و مهما نجري .. عمرنا ما حنلحقه .. لأنه مجرد سراب .

الحلقة الأخيرة من المسلسل إستفذت فعقلي شوية الأفكار دول .. و إعتبرتها فرصة أفكر نفسي ..

بدون ( عقيدة ) مظبوطة .. مهما إمتلك الإنسان من ثروات .. حيفضل فقير .

و الله أعلم .