بوست مش مفيد إطلاقاً .. مجرد مشاركة معاناة بسيطة

بوست مش مفيد إطلاقاً .. مجرد مشاركة معاناة بسيطة . … يوم الجمعة اللي فاتت .. قرروا قطع الكهربا الساعة 5.30 فجراً .. اللي هو كنت لسة فأول رشفة في مج ال(ali cafe دابل بالجنسنج + معلقة بن العميد محوج غامق ) … و لسة بابتدي أستقبل اليوم . بعد إستمرار القطع لمدة نص ساعة .. قررت إني أنزل أسوق شوية و أستمتع بالشوارع الفاضية .. بعد ساعة رجعت .. جرّجت العربية و قفلت باب الجراج .. و طلعت .. لقيت لسة الكهربا مقطوعة .. قلت لعله خير .. قريت سورة الكهف و أنا باعتني بالنباتات في البلكونة و أسقيهم … و بعدين الكهربا جات أخيراً بعد ساعتين و نصف إنقطاع تقريباً .. .. يومها العصر .. كان زفاف أخو أحد أصدقائي .. فتحت باب الجراج .. و أول ما ركبت العربية شميت ريحة فظيعة و العياذ بالله .. قلت لعل أحد الحيوانات الأليفة من القطط و الكلاب في الشارع دخل الجراج و قضي حاجته كالمعتاد .. لكن الريحة ماختفتش بعد ما طلعت من الجراج و مشيت .. لما وصلت القاعة .. و ركنت العربية .. نزلت و بابص بالصدفة في الدواسة قدام رجلي الشمال .. و أكتشف إخراجات قطة علي بعد سنتيمترات من رجلي .. حمدت الله إن الجزمة ماتلوثتش .. و طلعت الدواسات و نضفتهم بالرملة .. و حطيتهم في الشنطة ورا ( غلطة ضخمة دي ) .. … طلعت من الفرح بدري عشان مشوار طارئ كالمعتاد .. خلصته .. و بعدين طلعت عالمغسلة .. و حكيت لهم علي اللي حصل .. و قلت لهم عيشوا .. … بعد ما عاشوا و غسلوا برا و جوا و عملوا واكس سوناكس كمان .. و عطرناها .. ركنت العربية و قفلت باب الجراج .. و باحاول أفتكر .. هل أنا اللي نسيت باب مفتوح مثلاً ؟! أصل الإزاز بيقفل أوتوماتيك بمجرد ما أسيبها و أمشي .. و الأبواب كمان المفروض إني لو سايب باب مفتوح إن العربية بتقعد تزن بصوت عالي لو بعدت عنها ( مفتاح كارد بصمة ) . طب حتي لو كنت نسيت باب أو إزاز مفتوح … أنا قفلت الجراج ورايا .. و لو كان في قطة جوة .. كنت حالاقيها و أنا داخل أو و أنا طالع . … المهم إني و أنا واقف قدام باب الجراج .. لقيت أحد قطط الشارع اللي عارفهم كويس .. و كانت حامل من فترة و إختفت .. واقفة قدامي و تلات هرات جداد خلفتهم 😍😍 واضح إنها كانت مستنياني أسيب باب الجراج مفتوح عشان تدخل تكمل إستقرارها جوة .. و اضح إنها قضت فترة الوضع تقريباً فأحد أركان الجراج عندي .. و إني كدة باقفل الباب قدامها كأني باطردها 😭😭 … … تاني يوم الصبح ( إمبارح ) بمجرد ما فتحت باب الجراج .. كان لسة في ريحة فظيعة .. و العربية برضو كان فيها ريحة ما زالت .. كان يوم طويل و مليان إنترفيوهات لناس جديدة محتاجينهم في الشغل .. و ماكنتش نمت قبلها .. فقررت إني أأجل الموضوع للنهاردة .. بس رحت جبت شوية فواحات من المغسلة جنبي .. و نصحني أحدهم هناك إن قطته عملت كده فعربيته من قبل … و الحل إني أسيبها في الشمس شوية مفتوحة . سبت فيها الفواحات إمبارح المغرب .. و طلعت نمت … … من ساعة النهاردة خدت العربية و رحت في الشمس قدام النادي و فتحت كل الإزاز و السقف .. الريحة في الصالون تكاد تكون إختفت .. أو إن الفواحات مغطية عليها .. لكن الشنطة كانت ريحتها لا تطاق .. شلت أرضية الشنطة و فضلت أدور لعل يكون في حاجة ماشفتهاش ناتج عنها الريحة دي .. و لكن مالقتش حاجة .. رشيت معطرات كتير .. و سبت الشنطة كمان مفتوحة .. و قعدت قدام العربية عالرصيف منتظر إن الشمس تعمل مفعول .. و باتسائل .. هل في فتحة في العربية من تحت مثلاً ممكن القطة تكون دخلت منها ؟! . … و بعدين مناخيري خلاص تشبعت كم ضخم من الروائح الكيميائية العطرة المختلطة بالروائح الطبيعية الغير عطرة .. زهقت و جيت جرجت العربية و طلعت و قعدت شوية … أتعافي قبل ما أنزل المكتب .. و كتبت البوست ده .. … … 🐱🐱