1- الكلام ( و الكتابة علي الفيس و تويتر و

1- الكلام ( و الكتابة علي الفيس و تويتر و كدة ) شهوة .. زي أى شهوة .. زي شهوة الفلوس و الأكل و الجنس و غيرهم بالظبط .. ربنا في حكمته جل جلاله .. جعل إشباعنا لإحتياجاتنا الأساسية دي شيء ممتع بالنسبة لنا .. اللي هو إتخيل لو كان مثلاً ( الأكل أو التزاوج أو البناء و التعمير ) حاجات مابتقدمش متعة للإنسان .. هل كان حد حيستحمل إنه يإلم بطنه و أمعاءه و يبذل مجهود بسنانه و فكه عشان ياكل ؟ هل كان حد حيبذل مجهود عشان يتزاوج ؟

… 2- الكلام كمان .. ليه إحتياج .. لما تكون بتنقل معلومة مش حتطلع إلا لو إنت اللي حتقولها .. لما تكون بتقدم إفادة ش حتوصل إلا لو إنت اللي حتقولها .. لما تكون بتطلب حاجة .. مش حتحصل لك .. إلا لما تطلبها بنفسك .. … 3- لكن في متعة في الكلام .. متعة كبيرة جداً .. لما تلاقي اللي حواليك كلهم منتبهين ليك و تحس إنك مركز إهتمامهم .. لما تحس لوهلة إنك فاهم أكتر .. لما عقلك يوهمك إنك بالكلام اللي بتقوله عملت شيء ما .. لكن في الحقيقة إنت ماعملتش أى بلح في البتنجان ..

زي لما تكون بتشوف ماتش كورة و تتكلم و تفتي في اللعبة .. و إنت بتنهج و إنت بتاكل أساساً .. زي لما تكون بتتفرج علي عركة و خناقة في الشارع .. و تفضل تهري و يمكن تشتم كمان .. بس لو حد بص لك بس من بعيد ممكن يجيلك سكتة قلبية . زي لما تكون عالشط .. بس قاعد تفتي في أمور اللي بيسبحوا كإنك عوام .

كل ده بيدي عقلك و غرورك إشباع مؤقت .. كاذب .. ممتع .. يشبع شهوتك .. للكلام .

… 4- طب و إيه المشكلة ؟ .. ماتسيب اللي يتكلم يتكلم ..

المشكلة هي إن زي كل الشهوات .. الإفراط في إشباعها بدون إحتياج .. بيسبب ضرر .. الإفراط في الأكل بدون إحتياج و فايدة .. بيسبب تخمة و مرض . الإفراط في الجنس بدون إحتياج و فايدة .. بيسبب خلل و مرض . الإفراط في جمع المال و البناء بدون إحتياج و فايدة .. بيسبب خلل في أفكاره و قدرته علي الإستغناء .

… الكلام كمان .. الإفراط فيه بدون إحتياج و فائدة … و الزرط و الهري و الزيطة مع الزيطة علي السوشيال ميديا .. بيسبب مصايب كتير جداً .. و بعد فترة الناس اللي فضلت تهري و تزيط دي تبص حواليها بكل غباء و تتساءل .. هي المصايب دي كتير هنا ليه .. .. أنا مش باخص حد معين أو دولة معينة أو فئة معينة من البشر إطلاقاً بالكلام ده .. بالعكس .. الكلام ده منتشر فكل البشر بلا إستثناء .. بس كل ما بتزيد قدرة الإنسان علي فهم نفسه و فهم القدر الكافي في مجاله و إحترامه لعقله و عقل غيره .. كل ما بيزيد صمته و فهمه لأهمية الكلام اللي ( يقوله / يكتبه / يشيره ) . ..

فوسط الدوشة .. المهم مابيتسمعش .. فأسكت لو كلامك مش مهم . فوسط الدوشة .. الغلط بيعيش و ينتشر بسهولة .. فأسكت لو كلامك مش مهم . فوسط الدوشة .. اللي عايز يفهم صح فعلاً .. مش بيعرف يسمع مين .. فأسكت لو كلامك مش مهم . … …

يتناسب عكسياً حجمك الحقيقي و قدرتك علي الفهم و مقدار وعيك .. مع حجم صياحك و زيطتك علي السوشيال ميديا .