أنا عارف إن الديباجة اللي حاكتبها دي مملة لناس كتير

أنا عارف إن الديباجة اللي حاكتبها دي مملة لناس كتير .. و فيها كلام كتير ممكن يخليني أبان مغرور أو متوهم أو هبيد … بس معلش .. لعل و عسي . .. عدد الكتب اللي قرأتها في مجالات مختلفة ( علمية و ثقافية و روايات و … ) بالنسبة لناس كتير … عدد ضخم . تقدر تحسبه تقريبياً بمعدل كتابين كل شهر .. علي مدار أكتر من 20 سنة .. باللغتين العربي و الإنجليزي .

• عدد لا يستهان به من المسلسلات و الأفلام ( الأجنبي و العالمي و الأنيمي ) .. يعني مثلاً لما تكتب علي IMDB لستة أفضل 100 فيلم علي مدار ال50 سنة اللي فاتوا .. فغالباً شفتهم بالكامل . و لستة أفضل 100 مسلسل علي مدار ال50 سنة اللي فاتوا .. فغالباً برضو شفتهم بالكامل .. و أكتر بكتير . … كم المحتوي العلمي و الثقافي من مختلف المجالات اللي باستهلكه من أول ما الإنترنت دخل أوضتي سنة 2008 .. لحد النهاردة .. كم ضخم بالنسبة لناس كتير جداً . … ليه باقول الديباجة دي ؟ . … لأني عندي صفة فشخصيتي من زمان لاحظت إكتشفت إنها مش موجودة عند ناس كتير .. و هي صفة الثقة في عقول بعض الناس . يعني .. ليا أصدقاء أثق في عقولهم بدرجات متفاوتة .. يكفي جداً إني أعرف إنه في مسلسل عجبه .. عشان أقرر إني أتفرج عليه .. و في الغالب بيعجبني بنسبة كبيرة . .. و ده ساعدني بشكل كبير إني أكون منفتح نسبياً و متقبل إني أشوف وجهات نظر مختلفة بشكل موضوعي بعض الشيء .. و دائرة علاقاتي تكون واسعة جداً و بتحتوي بشر من مختلف الفئات و التوجهات . … … … و لذا .. و لو في أى جزء من الصفة دي ( الثقة نسبياً في عقلي أقصد ) في الناس اللي حتقرا الكلام ده .. أرشح و بشدة كل محتوي باشمهندس أيمن .. ربنا يبارك له .. الراجل ده أنا باستمتع كل الإستمتاع و أنا باسمع له و باتعلم منه .. … معلش .. حتي لو توجهاتك لأى سبب من الأسباب بتخليك تاخد من الإسلام موقف عدائي .. أو يجيلك حساسية من أى حد مربي دقنه .. ثق فيا … باشمهندس أيمن السماع له يستحق إني أرشحه بكل قوة . …