بوست في كره الكائن الحزلقوم

بوست في كره الكائن الحزلقوم .

أحد الحاجات اللي عملتها قبل بداية رمضان بأسبوعين تقريباً .. إني بدأت أتفرج علي مسلسل ( الكبير أوي ) من بدايته .. و وصلت لإني ماشي و متابع مع الحلقات بتاعت السيزون ده حالياً بقالي 3 أيام . علي مدار ال ( 17 سنة ) اللي فاتوا كنت منقطع بشكل شبه كامل عن كل الإنتاج الإعلامي و الثقافي المصري .. فبالتالي عمري ما كنت إتفرجت علي المسلسل ده .. و بقالي فترة ( 6 شهور تقريباً ) باحاول أختار بعض الأعمال المميزة خلال ال17 سنة دول عشان أشوفها بالكامل . … شخصية ( حزلقوم ) أكتر شخصية جذبت إنتباهي و باستني أتفرج عليها فكل حلقة .. و ماعرفش هل كل أبعادها النفسية والعقلية كانت مقصودة بالكامل إنها تظهر بالشكل ده من الكتاب و مصممين الشخصية .. و لكن أحييهم بشدة فعلاً .. الشخصية دي .. بتمثل بالنسبة ليا تقريباً أكتر من 90% من الحاجات اللي باكرهها في الإنسان عموماً . … الشخصية اللي المنطق في عقله بيتمثل فقط في 3 حاجات لا غير ( رغباته و مشاعره و ثقافته الملعوب فأساساتها ) .

شخصية من رابع المستحيلات إنك تخوض معاها نقاش طبيعي مبني علي إستنتاجات و مبادئ فكر .

شخصية بمجرد ما بيتواجد في أى مكان .. بيعدي كل المكان و اللي متواجدين فيه بالأمراض النفسية اللي مستوطنة جواه . … زمااااااااان .. أيام الكلية .. لما كنت باضطر أرجع من إسكندرية لدمنهور يومياً بإستخدام القطر أو أتوبيس غرب الدلتا .. كنت بتشوف شخصية الحزلقوم ده منتشر زي العفن بالظبط فأرجاء المحطة .. فكرة إن في دور أو طابور المفروض إن يتم إحترامه .. مش متواجدة أساساً فعقله .. هو بيدعس زي البهايم و يزنق فأى حد فقط لأنه مش شايف أى حد ليه أهمية أو وجود غيره هو . .. لو طلبت معاه يدخن سيجارة فأى مكان .. حيدخن بدون مراعاة لأى بشر حواليه . .. لو طلبت معاه يقضي حاجته أساساً فوسط اللي حواليه .. حيعمل ده و يبرر لنفسه الفعل بكل تخلف . … إنك تحاول تتكلم معاه و تشرح له أى فكرة أو توضح له إن في حواليه ناس المفروض يشوفهم و يراعي وجودهم .. في الأول حيتجاهلك .. و بعدين لو ركز معاك شوية .. مش حيفهمك .. و بعدين لو طول معاك شوية في الكلام .. حيحاول يلغوش و يهري بأى هري شغال طول الوقت فدماغه .. و بعدين لو طولت معاه أكتر في الكلام و حس إنه حيتزنق في وضع يوضح إنه غلطان .. حينفعل عليك و يزعق بالجملة الشهيرة : (( ما بوررراحة يا عم .. إنت أساساً مالكش عازة )) .. … أنا شفت نفس التسلسل العقيم ده في الحوار كتير جداً علي مدار حياتي .. … و شفت إزاي فعلاً إن الكائن ال (حزلقوم ) ده بيعيش حياته و يوصل لنتائج تبدو بالنسبة للناس اللي حواليه إنه ( تيجي مع الهبل دوبل ) .. و لكن في الحقيقة إنه فعلاً بيكون ( أهبل ) .. مهما كان المنصب اللي وصل ليه هذا ال (حزلقوم ) .. إلا إنه بيكون فعلاً زي القرد الشمبانزي اللي لابس بدلة في جيوبها آلاف الدولارات .. اللي حواليه مفكرين إنه سعيد .. لكنه هو مش فارق معاه .. هو كل اللي مسيطر علي تفكيره طول الوقت هي ( نرجسيته اللامتناهية , ثقافته اللي عمره ما حيتخلص منها ) .. فبالتالي بتشوف أمثلته بيزعقوا فوسط دار الأوبيرا لأنه متضايق إن موظف قال له ( من فضلك بلاش تدخين ) .. و بعدين يروح مزعق بالجملة الشهيرة ( إنت مش عارف إنت بتكلم مين ؟! ) . .. بتشوف أمثاله بيستمتعوا بإنهم يزعقوا في الموظفين البسطاء في كارفور و فتح الله .. ببساطة لأن هو من جواه دائم الإحساس بحقارته .. و بيدور علي أى طريقة يحس بيها إنه ليه أى قيمة .. … الكائن ال ( حزلقوم ) بتشوفه فأى مصلحة حكومية .. يطلع عن الطابور و يحاول يكون ( فهلوي ) . دايماً شايف نفسه مظلوم . دايماً بيلاقي ألف طريقة عشان يعطل مصالح غيره .. و دايماً بيفرح لو حس و لو لمجرد ثواني إنه فاز بشيء أكتر من حقه . … الكائن ال ( حزلقوم ) بيبعت رسائل لكل البنات اللي بيشوفهم علي السوشيال ميديا في ال ( others ) . هو مش شايف إنه بيعمل شيء غلط .. إطلاقاً .. هو شايف إنه فعلاً لقطة و مايتعوضش .. و المصيبة .. إنه بيلاقي اللي تديله فرصة .. و اللي ترتبط بيه .. و بيتكاثر .. و بيخلف كائنات ( حزلقوم ) زيه بالظبط .. بيربيهم علي ( تف علي عمو يا حبيبي ) .. بيربيهم علي إن النظام غلط , و الفهلوة شطارة , و انهم مظلومين بالفطرة و لازم يحاولوا ياخدوا حقهم من كل البشر اللي حواليهم بالغصب .. … الكائن ال (حزلقوم ) جبان جداً جداً .. مستحيل تشوفه بينصر حق .. لزج و دايماً بيكون طفيلي علي البشر اللي حواليه .. و مش شايف إنه كده بيعمل شيء غلط .. … الكائن ال (حزلقوم ) فتاااااااااااااااااااي .. و بيفتي فأى هري .. و لا يتواني إنه يديلك نصايحه في الدين و السياسة و الطب .. و مش بيكتفي بده .. لأ .. هو بيزعل و يتضايق لو إنت مانفذتش نصيحته .. … الكائن ال ( حزلقوم ) قاموس متحرك للأمثال الشعبية , و تقاليد و عادات المجتمعات الجاهلية .. و فعلاً أغلبهم بيكون تربية نسوان ( أنثي الحزلقوم -مع إحترامي لكل الستات اللي بتطلع رجالة ) .. … الكائن الحزلقوم أوسخ كائن ممكن يسوق عربية حواليك علي الطريق .. مافيش فعقله أى خلية ملتزمة بأى قواعد مرور .. حيكسر عليك بدون داعي .. حيفرمل فنص الشارع و يوقف الشارع بالكامل لو طلبت معاه ينزل يشتري علبة عصير .. حيركن قدام جراج .. و لو إنفعلت علي غباءه .. حيرد (( ما بووررررررررررراحة .. إنت أساساً مالكش عازة ) . … الكائن الحزلقوم بيعيش و يتكاثر و يترعرع بسبب اللي حواليه .. اللي بيسيبوه يعمل المصايب اللي بيعملها لأنه :

• راجل بركة
• بيضحكنا
• مننا و علينا
• كبر دماغك إنت
• ده راجل كبير في سن والدك
• ده عيل صغير مش حتعمل عقلك بعقله
• ده شاب مش حنضيع مستقبله
• ده لما يتجوز حينصلح حاله
• … و كل القرف اللي فات ده . … أنا فعلاً باكره الكائن الحزلقوم ده .