علي مدار ال4 شهور اللي فاتوا تقريباً , كنت بادرس

علي مدار ال4 شهور اللي فاتوا تقريباً , كنت بادرس نمو خدمات السوشيال ميديا اللي طلعت لحد دلوقتي و أصبحت أساسية بالنسبة لقطاعات كتير من البشر زي ( فيسبوك , تويتر , إنستاجرام , تيكتوك , سنابشات , .. ) . مقارنة ببعض خدمات السوشيال ميديا الجديدة اللي لسة تعتبر في طور النشأ و عدد مستخدميها ماكملش نص مليون مستخدم بالكتير ( زي معظم خدمات السوشيال ميديا المعتمدة علي WEB3.0 ) . مع وضع ده علي خريطة ظريفة للعالم توضح فروق إستخدام كل خدمة في كل منطقة من العالم ( زي MENA الشرق الأوسط و شمال أفريقيا يعني ) . … في أهداف كتير لدراستي للموضوع ده , أولهم من الناحية العملية طبعاً هو محاولة التنبؤ بال ( next big thing) .. أو الحاجة الجامدة الجديدة اللي حتطلع تكسر الدنيا . و كالمعتاد .. أشتري شوية أراضي في الحاجة الجديدة الجامدة دي قبل ما تدخل كردون الشهرة . … و لكن علي الجانب الفلسفي ( الجانب المفضل أكتر ليا ) .. باحب أشوف تأثير خدمات السوشيال ميديا عموماً علي الأفكار الأساسية للبشر . و من ضمن الأفكار دي : Don’t meet your heroes = ماتقابلش أبطالك . … زمااااااااان .. أيام الطفولة .. كنت مدمن روايات رجل المستحيل و ملف المستقبل .. و ده كان قبل عصر الإنترنت .. فكان رحمة الله عليه ( د . نبيل فاروق ) بالنسبة ليا بطل أسطوري يكفي إني أسمع إسمه فأى شيء عشان أعتمده كحاجة مفضلة بالنسبة ليا . .. لما دخل الإنترنت مصر .. و بدأ د. نبيل فاروق يعرض علي الإنترنت جزء بسيط جداً من جوانب شخصيته اللي عمري ما شفتها قبل كده .. حاجات كتير من الجوانب دي إتعارضت بشكل مباشر مع أسس راسخة تانية فأفكاري و شخصيتي . … شفت كتير جداً من اللي كانوا بيحبوه زيي زمان .. قلبوا عليه بالكامل و بدأوا في تحطيم كل الأصنام اللي بنوها ليه فعقولهم علي مدار سنين طفولتهم . و لكني فضلت مقتنع بفكرة أساسية و هي : إني أفصل الإنتاج عن المُنتِج .

يعني أحب أغنية من أغاني عمرو دياب جداً لأنها ليها ذكريات حلوة فطفولتي و حب خامسة إبتدائي بتاعي 😅 … و لكن أفضل مقتنع إني عمري ما حادفع مليم واحد من فلوسي أو مجهودي عشان أروح حفلة لعمرو دياب مثلاً .

و العكس , .. يعني أقدر أسامح شخص أدين له بالفضل فكثير من الحاجات اللي أنتجها و عملتني و ساعدتني , و مأقفش ليه علي غلطة أو هفوة ماتأثرش بشيء في قيمة إنتاجه اللي ساعدني بيه علي مدار السنين ( و علي سبيل المثال : عمرو خالد ) . … … لكن عند مرحلة معينة فحياتي , أصبح ليا أنا كمان إنتاج بسيط مستقل عني و عن شخصيتي . إما منتجات ثقافية أو معلومات أو حتي لو مجرد بوست عابر شخص شافه بالصدفة نتيجة شير علي الفيسبوك مثلاً من سنين . و شفت كتير الخطأ المستمر اللي بيغلط فيه ناس كتير .. و ألاقيهم باعتين ليا رسايل تمجيد و شكر و مديح فشخصيتي , في حين إن كل اللي شافوه مني مجرد بوست أو إتنين .

و ده كان بيضايقني زي ما قلت و يخليني أضحك .. اللي هو إنت لو تعرف ما وراء الكواليس .. ممكن جداً تشوف إن أغلب المكونات في شخصيتي ماتعجبكش من الأساس . … … و لكن هنا بييجي السؤال : لو أنا شخص منتج ( كاتب , صاحب شركة , مفكر مشهور إجتماعياً , ممثل , مغني , ملحن , بياع بطاطا مشهور , … أياً كان ) … هل لازم أبين علي السوشيال ميديا الجوانب التانية اللي من شخصيتي اللي مايعرفهاش الناس ؟

يحضرني هنا مشهد حزلقوم مع ماجد الكدواني فيما معناه : مش يمكن لما الناس يشوفوا الجوانب دي فشخصيتي .. تعجبهم هي كمان .. و أبقي كسبت طرق تانية أعبر بيها عن نفسي للناس ؟ … و لكن دي مقامرة من وجهة نظري … بتغامر بيها إنك تخسر جزء كبير من الجمهور اللي ماعندوش القدرة علي الفصل .. يعني لو كره ليك أغنية .. حيكرهك بالكامل . و لو شاف ليك صورة مش عجباه .. حيبدأ يشتم فكل شخصيتك من أيام طفولتك أساساً . و يشتم والديك اساساً لأنهم ربوك بالشكل اللي مش عاجبه 😅 . … … و السؤال التاني : مين اللي يقيم ؟!

يعني في العصر المقندل اللي إحنا عايشين فيه ده , و اللي لو طلعت حطيت صورة بطاطاية مش مشوية كمان في بروفايلك .. حتلاقي اللي يطلع يقول لك : إيه العظمة دي .

يبقي إزاي نثق في آراء البشر ؟! .. في وقت البشر نفسهم مش عارفين هما بيحبوا الحاجة اللي بيحبوها ليه … ( و مش فاهمين الفرق بين الإعتياد , و الإنبهار , و الإعجاب , و الإستحسان ) . … … أنا لسة ماعنديش إجابات . و لكني عارف إن جزء كبير من صورة السوشيال ميديا حيتغير مع بدء هيمنة ال( web3.0 ) . يمكن كل اللي باحاول أعمله مش بس إني أتنبأ بأنهي خدمة حتبقي هي الأشهر .. و لكن أتنبأ بشكل إستهلاك البشر لأفكارهم دي عموماً . … …

---

الصورة دي لسة واخدها حالاً قبل ما أكتب البوست , من مكتبي في أوضتي في هوتيل جيفورا في دبي .. جزء من شخصيتي أهه بابينه و أظهره .. حلو ؟ عاجب ؟ أوسع الكادر و أبين باقي السويت 🤣 عشان في ناس بتهتم بالحاجات دي ؟ و أكتب آراء فكل شيء باعمله و باشوفه يومياً حتي لو مش بافهم في اللي حاتكلم فيه .. عشان ألجوريزمات السوشيال ترضي عني و أفضل ( relevant ) ؟ … … أنا مفتقد بشدة عصر ما قبل الإنترنت