في خناقة قديمة هنا من سنتين .. لسة واخد بالي

في خناقة قديمة هنا من سنتين .. لسة واخد بالي منها من ساعة تقريباً … بالرغم من إني متابع ( ميهدي سداغدار ) من فترة طويلة .. جداً .. .. الفيديو الأول ده : https://www.youtube.com/watch?v=0TTEFF0D8SA و بعدين التاني : https://www.youtube.com/watch?v=Q9LuVBfwvzA&feature=youtu.be

شفتهم دلوقتي ضمن مجموعة فيديوهات تانية فنفس الموضوع .. خصوصاً إن دكتور ” والتر ليوين ” واحد من الناس اللي شفت معظم محاضراتهم خلال السنين اللي فاتت ..

و فوسط كل الرياضة و الفيزياء و الكهربا اللي حتغرق فيها في الفيديوهين دول .. لقيت إن في فكرة معينة مسيطرة علي عقلي جداً .. ألا و هي : ” الفلوس فين ؟! ” .

أنا عارف إن السؤال عجيب شوية .. و مالوش علاقة مباشرة بالفيديوهين دول .. بس خليني أشرح وجهة نظري :

أنا رجعت بعقلي لأكتر من 10 سنين في الزمن .. من 2006 ل 2010 .. دي كانت دفعتي الاصلية في كلية هندسة قسم إتصالات و إلكترونيات .. كم المجهود العقلي و الجسدي و النفسي اللي تحتاجه كلية هندسة عموماً .. و القسم ده خصوصاً .. عشان تقدر تتفرج علي الفيديوهين دول علي غيار الريق الساعة 8 الصبح .. و بعدين تكمل باقي اليوم الدراسي بتاعك .. لحد الساعة 3 أو 4 مثلاً .. مع محاضرات فيزيا و رياضة و هندسة مختلفة تانية .. .. كم ضخم … جداً .. جداً … لكن حالياً .. و بعد 10 سنين تقريباً من التخرج .. أنا شايف عدد كبير ( جداً ) .. من خريجين القسم ده ( هندسة إتصالات و إلكترونيات) .. مجال شغلهم و حياتهم اليومي .. بعيد كل البعد عن ال ( فيزيا و الرياضة و الهندسة ) .. … إطلاقاً كلامي ده ماقصدش بيه إن الصح هو إننا نركز بقي علي شوية الشغل اللي بيجيبوا فلوس اليومين دول ( زي الماركتنج و الدعاية و المبيعات و التجارة عموماً ) .. و نفكنا من دراسة الكلام المعقد ده ..
… بالعكس .. أنا فعلاً باسأل … هل كان حيبقي في إمكانية إننا ندرس و نركز في الكلام المعقد ده .. بدون القلق بموضوع الفلوس ؟! … … … سنة 2006 لما كنت باختار أنهي قسم أدخله فكلية هندسة .. إخترت ( إتصالات و إلكترونيات ) .. لأن ده كان أكتر حاجة مافهمش فيها .. و كان كل تركيزي في الوقت ده إني أفهم أكبر كم من الحاجات اللي مافهمهاش في الحياة .. و فاكر إني كنت بافتح ريموت التيليفزيون و أتفرج علي الشريحة الخضرا اللي جواه و عليها حاجات سودة ( شيباية عليها أيسيهات يعني ) .. و أبقي متضايق إني مش فاهم أى حاجة في هو بيشتغل إزاي .. … دلوقتي أصبح عندي العلم ده ( نسبياً ) .. مجرد فكرة عامة عن معظم الأجهزة الإلكترونية و الكهربية حواليا شغالة إزاي .. … و السبب إني باقول ( فكرة عامة ) .. هو إني علي يقين إني غير قادر علي إنشاء مصنع مثلاً لإنتاج أى حاجة إلكترونية حقيقية .. … أقصي ما يمكن إني أحققه بناءاً علي “علمي ” الحالي هنا فمصر .. هو إني أعمل مصنع تجميع لمنتج ما .. و أستورد معظم إن لم يكن كل المكونات الرئيسية من مصانع صينية . … … و بشكل كبير جداً .. حاكون غير قادر حتي علي التعديل في المكونات الإلكترونية دي .. و ماقصدش هنا التعديل فيها بشكل فردي ( يعني ماقصدش إني ماعرفش أفتح شيباية مفتوحة علي زايلنكس مثلاً و أقعد ألعب بشوية fpga ) .. .. أقصد إني ماعنديش القدرة إني أعمل ده بشكل تجاري .. .. الموضوع حيحتاج قدرة مادية ضخمة إني ” أضخ ” و ” أرمي ” فلوس كتير جداً .. قبل ما أبدأ أدور علي ربح … و هنا بييجي سؤالي .. ” فين الفلوس ؟! ” .. … يعني .. عند أنهي مرحلة .. ممكن يكون معايا ما يكفي إني أعمل حاجة زي كده ؟ .. … و لما يبقي معايا ما يكفي ده .. إيه اللي يخليني كمستثمر … أرمي فلوسي في شيء ما مش مضمون زي ” تصنيع و إنتاج ” .. في حين إن التجارة و الإستيراد مضمونين جداً جداً في العائد بتاعهم . ؟… و بالتالي .. حتستمر الدايرة المفرغة دي .. مكان في العالم فيه عملية إنتاجية بشكل مستمر .. فبيحتاج بشر دارسين و متغلغلين في العلوم دي .. فبيصرف علي تعليمهم ( و بيخسر و يخاطر و يستثمر في أفكارهم ) .. .. و الناتج .. بيتم شراؤه بشكل إستهلاكي في مكان آخر في العالم … … أنا ماقدرش ألوم أى حد من جيلي .. او الأجيال اللي سبقتني .. او اللي لحقتني .. فإنهم مش فاكرين أى كلمة من الكلام اللي بيتقال في الفيديوهات دي .. .. أو إن معظمهم حالياً كل علاقتهم بالهندسة .. هو مجرد كارنيه نقابي و لقب .. .. لأني شايف اللي ما زال بيحاول إن يكون مصدر دخله الوحيد هو ” شغله بناءاً علي معلوماته الهندسية ” .. بيعانوا كل يوم .. و الواقع المحيط بيهم بيجبرهم بكل الأشكال كل يوم إنهم يبعدوا أكتر عن ال ” هندسة ” … و يلتحقوا بالقطر الرأسمالي المعتمد علي الإستهلاكية … إيلون ماسك في حوار ظريف من كام يوم كان بيشتكي من ده .. و بيتكلم إن الشركات محتاجة تبطل تدور علي ناس معاها ” MBA - ماجستير إدارة أعمال ” .. و تدور علي ناس أكتر مهندسين .. ناس تنتج حاجات أجدد .. أفضل .. مش تفكر إزاي ” تبيع ” أكتر . … … … أنا فعلاً ماعنديش إجابة .. و شايف بشكل مستمر حالياً .. معظم اللي بيعرف أى سكة للفلوس .. كل اللي بيفكر فيه هو : إزاي أجيب فلوس أكتر … … اللي كان بيتمني 100 جنيه عشان يقدر ياكل .. و قلقان بجوعه بعد ما بيوصل لهم .. مش بياكل و يعيش حياته .. بيدور إنه يوصل ل 1000 جنيه عشان يقدر ياكل و يلبس .. و بيقلق بمظهره .. و بعد ما بيوصل لل 1000 جنيه .. مش بيكتفي بالأكل و اللبس .. و لكن بيستهلك جزء أكبر من طاقته و وقته عشان يوصل لل عشر تلاف .. عشان يتجوز .. و بيقلق بغريزته .. و بعدين يشتري رفاهيات لنفسه .. و للي حواليه .. و بيفضل يقلق .. يقلق .. بقلقه .. و خايف ييجي اليوم اللي ” يخاف ” فيه تاني من الإحتياج .. فبيفضل يجمع فلوس أكتر .. و بعد فترة .. بينسي هو كان عايز ياكل ليه أساساً في الأول .. بينسي اللي كان بيفكر فيه .. و بيكتشف إنه أصبح مجرد ماكينة تحويل فلوس لسلع .. … … … … أعتقد و الله أعلم إن شرط أساسي في إن عقل ما .. يفهم محتوي الفيديوهات دي .. و غيرها .. و ينتج بناءاً عليها .. و بعد فترة معينة من الزمن .. إنتاجه ده يتحول لفلوس .. .. هو إنه من الأساس مايكونش قلقان .. إنه يكون متطمن .. إنه أكله .. و لبسه .. و زواجه .. و رفاهياته .. و حياته عموماً… مش معتمدة علي إنه يبيع وقته مقابل فلوس بشكل مباشر .. و يتعلم يستثمر في علمه … و الله أعلم .