2019-0095

حمادة للكاسيتات التمانيناتي

ف 8 خطوات و كيفية بداية و تكوين شغل أونلاين بأقل ميزانية ممكنة .. بإستخدام موبايلك فقط .. للولاد أو البنات (حاحدث البوست ده تباعاً إن شاء الله )

0 - اللى حتحتاجه عشان تمشي علي الخطة دى هو : أ- موبايل أندرويد فيه كاميرا … حتلاقي بداية من 1000 جنيه ب- إنترنت . … 1- حدد منتج .. بس ماتشتريش لسة .. حدد بس ( إختار أى طريقة من التاليين .. و يا ريت لو تعرف طرق تانية تكتب فى الكومنتات ) :

أ - إنزل سوق الجمعة فإسكندرية ( أو أى مكان مشابه ليه فمحافظتك ) .. و إختار أى مجموعة منتجات تكون بتفهم فيها ( أنتيكات تسعيناتي و تمانيناتي زي كاسيتات قديمة مثلاً .. لعب أطفال مكسرة .. إلكترونيات بايظة .. أى منتج تكون بتفهم فيه .. ) .

ب- لو ليك فى الطبخ .. يبقى أكلات و أصناف .

ج - لو بتعمل/ي حاجات خرز و إكسسوارات مثلاً .

د - لو بترسم .. يبقى بورتريهات ( زي اللى بتتباع في المولات و بتشوف ناس بترسم هناك و كده ) .

… 2- إعمل صفحة فيسبوك بإسم الشغل بتاعك … علي سبيل المثال ” حمادة بتاع كذا ” .. و شيل “كذا” دي و حط إسم منتجك أو شغلك . ( سيرش يوتيوب علي إزاي تعمل صفحة لو مش عارف .. حتلاقى الموضوع مياخدش منك 5 دقايق بالعدد .. و مجاناً .. بالكامل ) .

… 3- صور المنتج اللى حددته فى الخطوة رقم (1) .. و لو ماعندكش صور ليه لسة .. دور على صور ليه من على جوجل .. و لو تقدر تصور فيديو يبقى أحسن .

… 3.5- حط سعر للمنتج بتاعك .. يعني لو حتجيبه من سوق الجمعة ب20 جنيه … حط سعر عليه يديك هامش مكسب ( 50 جنيه مثلاً ) . لو أكلة حتعملها و تكلفها (50 جنيه ) … يبقى سعرها 90 جنيه مثلاً .. و هكذا .. بالتجربة و الخبرة فسوق منتجك .. حتعرف تسعر صح . … 4- نزل الصور و الفيديوهات اللى صورتهم دول على الصفحة … و إكتب كلمتين بتوعك عن المنتج .. .. على سبيل المثال تنزل صورة كاسيت تمانيناتي و تقول عليها : ” السبب إن فصفحتنا ( حمادة بتاع الكاسيتات التمانيناتي) إننا مهتمين بالكاسيتات التمانيناتي .. إننا مش ناسيين فرحتنا معاه فكل عيد ميلاد أو فرح أو حتي ليلة صيف مع طبق البطيخ .. و كان شريط الكاسيت الستيريو اللى بتشتريه شلة مع بعضها .. و نسلفه لبعض .. كل واحد فينا يخليه معااه يومين .. مش ناسيين فرحة أول مرة سجلنا عليه و إحنا أطفال صوتنا و إحنا بنغني .. مش ناسيين لما جيراننا كان بيبقى عندهم مناسبة و نسلفه لهم .. مش ناسيين درفة دولاب الشرايط الكاسيت .. و عشان مش ناسيين كل ده .. بنفكرك بالفرحة دي إنت كمان .. تقدر دلوقتي ترجع لفرحة و بساطة التسعينات .. و تشتري الكاسيت ده بالمبلغ ده بس ” .

اللى إنت بتعمله فى الخطوة رقم 4 دي .. إسمه ( صنع محتوي) .. و لو إحترفت ده لوحده .. حيفتحلك باب رزق ضخم إن شاء الله .. بس خلينا نكمل . … 4.5 - سيرش إزاي تعمل أول بوست ممول للمحتوي اللى إنت عملته فى الخطوة (4) ده علي الفيس .. غالباً لو أول مرة تعمل ممول .. حتلاقي إنك ليك قسايم مجانية تمكنك من عمل ده مجاناً .. و لو ماعرفتش تعمله مجاناً .. ماتمولش .. شير المحتوي بين أصحابك و أطلب منهم يشيروا .. و لو ما لقتش أى طلب أو أوردر جالك ( زي ما متوضح فى الخطوة رقم 5) .. إبعتلي .. أيون إبعتلي الشغل بتاعك .. و ماعنديش مشكلة أمولك شغلك بنفسي … بس تعمل الخطوات بالكامل .

… 5- تفاعل مع الناس اللى حتكومنت و تتفاعل مع البوست بتاعك .. لحد ما تجمع أول 10 أوردرات فمنطقة سكنية تقدر توصلهم المنتج بنفسك . يعني لو إنت من إسكندرية .. متاخدش أوردر من أسوان … لسة بدري على ده ..

… 6- بمجرد ما توصل ل 10 أوردرات … روح إشتري المنتج (اللى تكون متأكد الأول إن العدد ده من الأوردرات موجود منه ) .. و تشتريه بتخفيض كمان عشان إنت بتشتري كمية . و بعدين روح سلمه للي طلب من الأوردر فى الأساس و حاسبه .

… 7- كل عميل يشتري منك .. حتصور عملية البيع و الشراء و كل ده ( حينفع عشان تعمل بيه محتوي بعدين ) .

… 8- عيد الخطوات بالكامل .. بس زود محتوي ..

طبعاً فى تفاصيل تانية كتير .. و طبعاً في مشاكل حتحصل .. و طبعاً فى تعب .. و الموضوع مش سهل إطلاقاً ..

و لكن بمجرد ما تعدي شهر بتعمل الخطوات دي كلها … أوعدك .. إن أسئلتك حتتغير .. و حتبقي محددة وواضحة أكتر .. و حاقدر أساعدك فيها بشكل أوضح إن شاء الله .