وكالة أينشتاين للدعاية و الإعلان و التسويق الإليكتروني .. و

وكالة أينشتاين للدعاية و الإعلان و التسويق الإليكتروني .. و أكاديمية ماكس بلانك لتدريب الديجيتال ماركتنج .

سنة 2014 .. لما قررنا إننا نبدأ ( Toshkar ) .. لأننا كنا مقيمين فدمنهور .. و ماحدش فينا كان ناوي يغير محل إقامته للقاهرة مثلاً لسة … فقررنا إننا نركز خدماتنا علي دمنهور .. و سوق دمنهور .. الإقليمي .. المحدود .. جداً .. .. في الوقت ده .. كان عقلي مليان بمجموعة محترمة من العلوم النظرية اللي كنت درستها بكثافة علي مدار السنتين ( 2012 - 2013 ) .. و كلام معقد و عناوين ضخمة من نوعية ( ديناميكيات السوق , خوارزميات نمو الأسواق , و نظريات إقتصادية مختلفة , … و ما شابه ) .. .. فكانت النتيجة إني طول الوقت كنت عامل زي اللي بيحاول يحل مسائل حساب أولي و تانية إبتدائي .. بإستخدام رياضة بحتة بتاعت سنة تانية كلية هندسة قسم إتصالات و إلكترونيات .. و لو مالكش في الرياضة أوي .. فأحب أشرح لك إن إستخدام رياضة متقدمة جداً .. عشان تحل مسألة تافهة و سهلة جداً .. شيء من أغبي و أكثر الأشياء الخطأ اللي ممكن تعملها .. .. بل إن أحد أجمل الحاجات في علم الرياضة هو ال ( elegance - الرقي ) في الحل .. بإنه يبدو سهل و بسيط و سلس .. بالنسبة للي بيقراه . … … و بتكون النتيجة بتاعت ال( تنطيط ) ده .. هو إنك حتطلع حلول كتير .. واحد بس منهم هو الصح و اللي إنت محتاجه … و لكن غالباً حتطلع معاه نتائج و حلول تانية كتير .. برضو صح .. بس إنت مش محتاجهم إطلاقاً .. بل وجودهم حيخليك دايماً متلخبط .. و مش قادر تميز بين المهم و اللي مش مهم .. لأنك .. مش محتاجهم . ** مثال مشهور للموضوع ده هو ” الجذر التكعيبي للواحد ” .. أى إنسان مش محتاج إنه يعرف أو يدرس حاجة عن الأرقام التخيلية .. مش حيفرق معاه إنك تقوله نواتج غير ( 1 ) .. و لكني كنت مبدع فإني أقعد أشرح عوالم الأرقام التخيلية للناس اللي حواليا اللي مش فارق معاهم ” و أحياناً ما زلت باعمل ده كتير 😅 😅” … … اللي فهمته بعد فترة شغل قصيرة ماعملناش فيها أى نمو حقيقي في سوق دمنهور الصغنن .. و بعدين توقف .. و بعدين لما فتحت ( تشكر ) تاني من سنة تقريباً .. بس كان إستهدافنا المرة دي مختلف .. و أبعد ما يكون عن الأسواق المحلية .. … هو إن ” فوجهة نظري ” السوق و الإقتصاد … متشابهين بشكل كبير مع ال ” فيزياء ” .. … … … في الفيزياء .. في أربع قوي أساسيين ..

• قوي نووية ضعيفة
• قوي نووية قوية
• القوة الكهرومغناطيسية
• قوة الجاذبية . … كل قوة من دول .. بتحكمها و تفسرها مجموعة من المعادلات و القوانين .. مختلفة و ( أحياناً مختلفة جداً ) .. عن القوي التلاتة التانيين . … يعني لو حتستخدم معادلات رياضية معينة عشان تحسب كيفية حركة جسيم بيتحرك حوالين النواة .. ماينفعش تستخدم نفس المعادلات الرياضية دي عشان تحسب كيفية حركة قمر مثلاً حوالين كوكب معين . … … و نفس الشيء بشكل كبير بينطبق علي السوق و الإقتصاد في مستوياته المختلفة .. … يعني .. يا صديقي اللي بتحاول تفتح ستارت أب في مجال الأغذية مثلاً .. كل الكلام اللي قاعد بتقراه عن سياسات و عوالم سلاسل أغذية ضخمة زي ( كنتاكي أو ماكدونالدز ) .. مالوش أى علاقة إطلاقاً بمحل الفول و الفلافل اللي إنت ناوي تفتحه علي أول شارعكم .. .. و يا صديقي اللي قاعد تقرا كل ما تقدر من كتب عن الشركات الناشئة و اللي وصلت إنها أصبحت قيمتها تقدر بالملايين .. صدقني .. أكتر شيء إنت محتاج تعمله دلوقتي .. هو إنك تبطل قراءة و دراسة ليهم .. و تبتدي مباشرة في شغلك علي شركتك .. و إنتاج منتج خاص بيك .. و توصل إنك يتم تقدير شركتك حتي ب ( ألف جنيه ) علي الأقل .. لأن صدقني .. كل اللي إنت بتقراه عن الشركات اللي بتقدر دلوقتي بملايين … مالوش أى علاقة إطلاقاً بشركات كتير تانية ناجحة جداً .. بس بتقدر مثلاً بكام ألف دولار … … … لكن لما توصل إن شركتك تبقي بتتقدر ب( عشرتلاف ) دولار مثلاً علي الأقل .. ساعتها تعالي نذاكر عالم الشركات اللي بتتقدر ب ( ميت ألف دولار ) .. و هكذا .. … … حالياً إحنا سنة 2020 .. و اللي إتعلمته هو .. إن كتب كتير من اللي بتشرح إزاي تكون أفضل نجار مثلاً .. أو أفضل سباك في العالم .. و بتتكلم عن تفاصيل عوالم ال ( أفضل ) دول .. مليانة معلومات لا تنطبق إطلاقاً .. و لا حتنفع .. لأى حد قرر إنه يبتدي يشتغل ك ( سباك أو نجار ) مثلاً .. .. و إن أفضل الكتب اللي حتنفعك في المرحلة الأولي دي .. هي : ( إزاي تصلح أول حنفية مكسورة ) .. و ( إزاي تدق أول مسمار ) .. بس .. و ماتفتحش كتاب تاني في المواضيع دي .. غير لما تصلح أول حنفية مكسورة .. و تدق أول مسمار .. .. بعد كده شوف الخطوة اللي بعدها .. … لأن الكتاب اللي بيشرح لك إن عشان تكون أفضل نجار مثلاً .. لازم يكون ليك طابع مميز في صنعتك يكون بصمة الناس تعرفك بيها و تميزك عن منافسيك .. بيتجاهل إنه يوضح لك إن الكلام ده موجه لأفضل خمس نجارين علي الإطلاق … و إنك لو فضلت تدور علي بصمة في شغلك .. قبل ما تتعلم تشتغل أساساً … عمرك ما حتبتدي .. … … أينشتاين مات و هو بيدور علي نظرية تجمع الأربع قوي بتوع الفيزياء ( a unified theory ) .. و لحد النهاردة ماحدش وصل .. و كلها مجرد فرضيات . … … … … إبتدي .. إشتغل .. طلع منتج .. و نافس علي إن قيمة شغلك تساوي جنيه واحد علي الأقل .. و بعدين فكر إزاي تخليه يساوي 10 جنيه .. … و لما حد يبعت لك دعوة عشان تحضر محاضرة عن إزاي تبتدي الستارت أب اللي بمليون دولار .. إتأكد الأول إن الستارت أب بتاعتك قيمتها عدت ال ( 10 دولار ) الأول علي الأقل .. و بعدين أرفض الدعوة … و دور علي محاضرة عن إزاي تكون شركتك قيمتها ( 20 دولار ) .. و هكذا .. … … و الله أعلم .