إنت السبب .. و السرسجي هو الضحية

إنت السبب .. و السرسجي هو الضحية . (صور محور المحمودية اللي كان لسة متجدد نازلة عالنت بالمنظر ده .. للأسف ) .

1- لما كنت راكب فمواصلة .. و فاتح موبايلك و قاعد بتتفرج علي فيديوهات مهراجانات .. و السرسجي الضحية اللي قاعد جنبك أو وراك شاف الإهتمام فعينيك بالنوع ده من المحتوي .. فإتزرع فمكان ما فعقله إن طريقة فعالة عشان يلاقي قيمة لنفسه فحياتك و ياخد إهتمامك .. إنه يتصرف زي سرسجية المهرجانات . … 2- لما تبقي راكب عربيتك الآخر موديل و طالع الساحل … و مشغل مهرجانات علي أعلي صوت .. فالسرسجي الضحية اللي وقف جنبك فإشارة بالتوكتوك بتاعه شافك .. و فهم إن طريقة فعالة عشان يلاقي قيمة لنفسه فحياتك و ياخد إهتمامك .. إنه يتصرف زي سرسجية المهرجانات . … 3- لما بتفتح اليوتيوب عشان تشوف أى فيديو جه فدماغك … فتلاقي صورة فيديو ( thumbnail ) مثيرة .. و مكتوب عليها أى كلام مثير .. فتقرر إنك تمشي ورا ( الإثارة ) دي زي أى كلب مالوش صاحب بيلهث و يهز ديله لما أى حد ينده عليه .. و تضغط عالفيديو . فتكون النتيجة زيادة مشاهدات المحتوي التافه المثير ده .. و فلوسه .. و تأثيره . … 4- لما بتشخر .. لما بتشتم .. لما بتسب الدين .. لما بتعمل كل الحاجات اللي مفكر إنك بيها بتبان شبح و إبن حتة و فهلوي … فتكون النتيجة إن عيل صغير يشوفك .. و يتأثر بيك .. و يطلع سرسجي … و يعلي عليك في الشبحنة .. و يفتح عليك مطوة . … 5- لما بتشوف البوستات الدينية و تتجاهلها أو تدخل للي مشيرها و تنكت و تقوله ( إفتينا يا عم الشيخ ) . لما بتشوف البوستات الأخلاقية و تتجاهلها أو تدخل للي مشيرها و تنكت و تقوله ( إفتينا يا عم الخلوق ) . لما بتشوف البوستات العلمية و تتجاهلها أو تدخل للي مشيرها و تنكت و تقوله ( إفتينا يا عم العالم ) . … و لما بتشوف البوستات ( الفضائح , التفاهات , الكورة , … ) و تهتم بيها .. و تقراها .. و تشيرها .. و لما حد يكلمك ترد بكل غباء و جهل و تخلف و تقول : ” أنا مش سالف فلوس باقة النت من أمك عشان تقول لي أشير إيه و مأشيرش إيه ” . … 6- كل مرة بتفكر إن دورك في الحياة بيتوقف عند كونك بتجيب شوية فلوس ( يأكلوك إنت و أهلك .. و لما يفضل فيهم شوية .. تروح تصيف و تطلع رحلات ) .. و إن طالما بتجيب فلوس يبقي دورك إنتهي .. و ماحدش يطلب منك ( تقرا , تتعلم , تتثقف , تفكر , تتعب أوي .. ) عشان تغير من نفسك و تطور من نفسك .. فتكون النتيجة إن السرسجي الضحية يشوفك و يفهم .. إن الحياة عبارة عن فلوس و بس .. و طالما جاب فلوس أكتر منك … يبقي هو أدي دوره أحسن منك . … 7- إنت اللي قاعد بتقرا البوست ده دلوقتي … مش السرسجي .. إنت اللي تقدر تتغير .. مش السرسجي .. إنت اللي عندك الأدوات عشان تتعلم .. مش السرسجي . … 8- كل حاجة إنت بتشتكي منها في المجتمع اللي حواليك ده .. ما هو إلا مرايتك النقية جداً .. و اللي بتوريك نتيجة اللي فضلت سنين و سنين رافض تفكر فيه .. … 9- السرسجي عشان يتحول و يبقي إنسان متحضر .. إنت لازم تتحول بنفس المقدار .. من إنسان متجاهل واجباته و اللي عليه من مسئوليات ( أكتر من مجرد إنك تاكل و تشرب و تتجوز و تطلع الساحل ) .. لإنسان واعي فاهم إن ربنا خلقنا مختلفين في القدرات و الواجبات .. و بقدر ما ربنا رزقك من وعي إنك تحس بوجود مشكلة .. و تضايق منها .. بقدر ما ربنا رزقك من قدرات و واجبات .. إنت لازم تقوم بيها .. و تاخد أكشن .. .. و تغير نفسك إنت الأول .. و تفضل مثابر علي ده .. و تفكر غيرك .. و تفكر نفسك .. قبل غيرك .. … و الله أعلم .