السرسجي الحشاش اللي راكب وراه تلاتة سرسجية تانيين علي موتوسيكل

السرسجي الحشاش اللي راكب وراه تلاتة سرسجية تانيين علي موتوسيكل و متجاهل الحظر .. و مشغل أغاني مهرجانات .. و ماشي بالمكنة بتاعته منتظر إنه يشوف أى بنت ماشية عشان يتحرش بيها أو يغتصبها هو و الإتنين السرسجية التانيين .. .. غالباً شاف واحد معين عادي ( أوستاذ ) قاعد علي قهوة شكله محامي مثلاً أو مهندس أو دكتور … و أعجب بيه و بأسلوبه و بإختياراته .
واحد عادي ( أوستاذ ) ( صايع مع الصايع , و محترم مع المحترم ) .. واحد عادي ( أوستاذ ) ( فهلوي و يعرف ياخد حقه بإيده و بلسانه ) .. واحد عادي ( أوستاذ ) ( فخور إنه لو حب يقبح و يشتم و يقل أدبه حيهين اللي قدامه ! ) .. واحد عادي ( أوستاذ ) ( صوته عالي .. و بيعرف يطلع أصوات معينة من مناخيره بسهولة عشان يخوف اللي قدامه ) .. واحد عادي ( أوستاذ ) ( بيقعد علي القهوة , و بيسمع مهرجانات عادي , و بيتكلم في السكس بصوت عالي عادي , و ممكن يحشش لما يجيله مزاج عادي ) . واحد عادي ( أوستاذ ) ( غالباً بينتظر لحد ما يروح بيته و يقفل عليه بابه عشان يعيش حياته بإنه يبعت رسايل لبنات علي الفيس و الإنستاجرام .. بتوصل لهم علي ال others … و غالباً متاخد عليه سكرين شوتس كتير ) . واحد عادي ( أوستاذ ) ( حافظ حديثين علي كام آية قرآن .. كلهم عن يسر ولا تعسر .. و الدين يسر لا عسر .. و غالباً مفكر إن طلع الفجر علينا آيه في القرآن ) . … … أخينا ال ( أوستاذ ) ده .. غالباً فعيلتك .. أو من شلة إصحابك .. إنت مش عارف ده .. بس هو بيتأثر جداً بصاحبه ال( مستر ) .. المستر ( محترم مع المحترم , بس يعرف يجيب حقي من الصايع بمعارفه ) . المستر ( فهلوي و ليه علاقاته مع ناس يجيبوله حقه ) . المستر ( بيبتدي يومه الصبح غالباً بإنه يبص في المراية بإحتقار .. و يقول لنفسه إعدل نفسك إنت مش عارف إنت بتكلم مين ؟! ) . المستر ( فخور إنه بتعرف تتكلم شوية إنجليزي أو لغة تانية كمان ) . المستر ( ممكن يدخل أى نادي من الكبار الغاليين .. و مايحسش إنه غريب جواه ) . المستر ( عنده شوية علم باللي بيحصل في العالم و الإقتصاد و السياسة ) . المستر ( ماعندوش مشكلة يكون عنده علاقات نسائية متعددة طالما بمزاجهم و هما عايزين كده ) . المستر ( يضايق لو البواب كلمه نص كلمة لما يشوف ست داخلة أو طالعة من شقته ) . المستر ( بيحشش و بيشرب .. كل فين و فين .. و في الأعياد و المناسبات الخاصة ) . المستر ( غالباً بينه و بين نفسه بيلعن اليوم اللي إتولد فيه فمصر .. و كان نفسه يعيش حياة علمانية كاملة فدولة متحضرة زي لاس فيجاس .. أو أى strip club ) … … المستر ده .. غالباً برضه فعيلتك .. أو من معارفك .. إنت مش عارف ده .. بس هو بيتأثر جداً بصديقه علي الفيس .. الأستاذ الدكتور .. الأستاذ الدكتور ( راجل كبارة فنفسه .. و كبير عيلة حتي لو لسة في الأربعينات ) . الأستاذ الدكتور (راجل ممكن يكون كل ماضيه الأسود عبارة عن إنه شرب نفس سيجارة واحد .. بس هو بيحب يفخم فده و ينفخ فنفسه و يقول إنه كان شبح قديم ) . الأستاذ الدكتور ( راجل بيبتدي يومه الصبح أول ما يصحي من النوم بإنه يربط الكرافتة علي البيجامة .. و يترحم علي بعض أسامي الفلاسفة و الكتاب اللي ممكن جداً يكون قرا ليهم مرة فمجلة ميكي ) . الأستاذ الدكتور ( متابع الفنانة المتألقة الشابة اللي عندها 70 سنة , و أختها الصغيرة النجمة الصاعدة اللي عندها 50 سنة , و لازم يعلق علي كل بوستاتهم ) . الأستاذ الدكتور ( بيقسم لك كل ما يشوفك إنه علي أتم إستعداد إنه يروح سينا و يطهرها بنفسه .. لولا إرتباطاته المهمة اللي مايقدرش يسيبها لحد تاني للأسف ) . الأستاذ الدكتور ( ممكن يسمع ليك مقاطع كاملة من خطب زعماء و رؤساء ماتوا أو لسة عايشين , و يستشهد بيهم فكل حوار .. حتي لو كنت بتسأله عن رأيه في الكنافة بالمانجا ) . الأستاذ الدكتور ( مش ممكن يضيع أبداً حلقة من البرنامج الحواري السياسي المتألق المتأنق اللي بيكون منه آرائه في الحياة و العالم ) . الأستاذ الدكتور ( غالباً حتلاقيه ضليع فعلم معين من العلوم .. و يقدر يفتيك فيه .. و بيستخدم مكانته في العلم ده .. عشان يفتي فباقي علوم الحياة .. بجهل ) . … … الأستاذ الدكتور ده .. غالباً برضه من عيلتك .. و بيعتبر قدوة لكل أمهات و أبهات العيلة . إنت مش عارف ده .. بس هو غالباً متابعك علي الفيس … و بيتأثر جداً بيك . … إنت عادي .. إنت ( لسة مش عارف إنت مين ) . إنت ( كل أسبوع بتبص لحد من ال ” السرسجي , و الأوستاذ , و المستر , و الأستاذ الدكتور” .. و مش عارف إنت مين فيهم .. أو نفسك تكون مين فيهم . ) إنت ( عندك وجهة نظر .. بس حاسس إنك ضعيف جداً .. و إن الأربعة اللي فوق عمر ما حد فيهم بيقتنع بكلامك .. فبتكره نفسك أكتر ) . إنت ( متابع ناس كتير جداً علي الفيس بوك .. و حافظ في الsave في الفيسبوك بوستات كتير عن حاجات كتير نفسك تعملها و تقراها .. بس حاسس إن ماعندكش وقت ) . إنت ( بتشوف أى بوست طوييل .. أو فيديو طويل .. و تخاف تقضي فيه نص ساعة تقراه مثلاً .. أو تشوفه … عشان حاسس إن وقتك و عمرك بيتسرق بسرعة أوي .. فتعمل له save أو تتجاهله و تحاول تفهم محتوي البوست من الكومنتات عليه .. و تحاول تكون وجهة نظرك عن أى شيء .. من وجهة نظر الناس فيه .. و بعدين تكره إنك بتعمل كده .. فتاخد أكشن عدائي .. و تكتب تعليق ” الخلاصة إيه ” .. و بعدين تزعل من نفسك .. و تروح رايح فاتح أى مسلسل هري عاليوتيوب .. او قاعد تسكرول لمدة ساعة عالإنستاجرام أو التيك توك . .. و بعدين تحس إن وقتك بيضيع و بيتسرق . و تشوف السرسجي بيتجاهل الحظر .. و بيغتصب بنت معينة .. فتضايق . و تشوف الأوستاذ بيتجاهل الحظر .. و بيتفضح سكرين شوتس ليه مع بنت معينة .. فتضايق . و تشوف المستر بيتجاهل الحظر .. و بيشير وجهة نظره إن البنت المعينة اللي تم إغتصابها كانت فلات و مش حلوة .. فيتحرق دمك و تضايق . و تشوف الأستاذ الدكتور بيتجاهل الحظر .. و مشير وجهة نظره عن الإغتصاب إن البنت هي السبب .. و البنت المعينة دي من مجتمع مش حيتفهم قيمة لبس اللانجيري في الشارع .. فتكره حياتك .. و تضايق أكتر . … … فتروح رايح مدور علي أى حاجة تعملها فحياتك تخليك تحس إنك مش متضايق .. تسكن ألمك .. و تفضل تسكن فيه .. و علي حسب نوع المسكن اللي بتختاره .. بتتحول بعد كام سنة من إدمان المسكن ده .. ل سرسجي مدمن مخدرات جسدية .. أو لأوستاذ مدمن مخدرات عقلية .. أو لمستر مدمن مخدرات ثقافية .. أو لأستاذ دكتور .. مدمن مخدرات روحية .. … … و تنسي إن كلهم كانوا بيتأثروا بيك .. و بيتابعوك .. و كان ممكن جداً لو لقوك إنت خدت أكشن ضد ( الأنتخة ) .. و بدأت تقرا و تتعلم و تبذل مجهود عشان تفهم إزاي تكون إنسان فعلاً .. كان ممكن يتأثروا بيك .. و يبدأوا يتغيروا .. … … لكن .. لكن للأسف كتير لما بيكون عندنا الإختيار .. بنختار الأسهل .. و نلوم غيرنا علي النتيجة .. … و الله أعلم .