1- وجهة نظري عن ( pi network ) الأولية ..

1- وجهة نظري عن ( pi network ) الأولية .. و المبنية فقط علي ما عرفته عنها من معلومات من البوستات اللي ظهرت قدامي علي الفيسبوك : ” نصب بحت ” … ” و اللي يدخل فيها حالياً بإنه ينزل الأبليكيشن علي موبايله ( الأساسي اللي عليه بياناته الأصلية ) بهدف إنه بعد كام شهر يكسب المكسب الكبير … أنا آسف في اللفظ .. يبقي ولامؤاخذة مغفل ” . … 2- لاحظ هنا إني حددت مصدر المعلومات اللي عندي .. هو بوستات علي الفيسبوك .. و البوستات دي تنقسم لقسمين . القسم الأول :

• ناس مجال تخصصها و أكل عيشها و هوايتها و بتنام تقوم تشرب ( cryptocurrency = عملات رقمية ) و ( تكنولوجي ) .
• ناس تقيلة في المجالات دي .. و ممكن بسهولة تاخد تمويل لأى ستارت أب في المجال بإنك تقول بس إنهم من بورد الستارت أب دي . *** و كل من في الناس دي قال كلام كتير أوي .. معقد أوي .. تقني أوي .. خلاصته إنها ( نصب ) . … القسم التاني ( مع كل إحترامي ليهم ) :
• ناس لو طلبت منها تقول لك إمكانيات اللابتوب بتاعهم .. حيردوا عليك إن لونه فوشيا .. و تقيل .. و عليه ستيكرات من ورا .
• ناس سبق و سألوني عن ( qnet , dox , دوبلي , … ) .. بل و في منهم اللي حط فلوس فيهم .
• ناس كل ما يمتلكوه من فلوس هما كسبوها بإيديهم .. مايكفيش يمول حملة دعاية محترمة لمدة تلات أيام علي الفيسبوك .
• أو ناس ورثوا فلوس .. و قلقانين لأنهم شايفينها كل يوم بتقل و بتتصرف .. و مش عارفين المفروض يعملوا بيها إيه . *** و كل من في الناس دي .. قال كلام كتير أوي … بسيط أوي .. لزج أوي .. ملزق أوي .. مايدخلش علي عقل طفل بدأ يقرا فكتاب ويندوز 95 حتي … خلاصته إنه ( ليه لا .. تعالي نجرب .. مش يمكن تكسب المرة دي ؟ ) . … … 3- أنا آسف في إن صيغة الكلام ممكن يعتبر حاد .. أو وقح بعض الشيء .. و لكن .. يا صديقي اللي بتقول ( ليه لا .. تعالي نجرب .. مش يمكن تكسب المرة دي ؟ ) .. إنت بكلامك أو بإنك تعمل شير لحاجة زي كده .. بدون ما تكون واعي بيها … ممكن جداً تتسبب فإن إنسان علي قدر بسيط من العلم .. و علي قدر كبير من الخوف و اليأس المادي بسبب الأيام الحالية .. إنه ياخد أكشن و ينزل الأبليكيشن ده .. أو غيره .. بل و ممكن يستثمر ال34 جنيه و نص اللي يعتبروا آخر ما يمتلكه فحياته .. و يدخل ضمن طوابير الكتيييييير اللي إتنصب عليهم قبل كده . … … 4- أنا أول مرة سمعت عن البيتكوين ( من مسلسل the good wife ) .. كان سنة 2013 … أيام ما كان عامل 20 دولار . قضيت بعدها 3 شهور واخد غطس محترم فكل ما له علاقة بالعالم ده .. الموضوع شدني بغض النظر عن أي وجه إستثماري فيه .. لأنه فعلاً فكرته عبقرية ففعاليتها و مهاجمتها للأنظمة المالية الفاسدة الحالية . .. أيام ما خدت أكشن إستثماري فيه .. و عملت التلات فيديوهات اللي شرحت فيهم كل ما ربنا قدرني عليه في الوقت ده علي اليوتيوب ( إكتب فسيرش جوجل : القصة اللي مش حقيقية عن البيتكوين ) عشان تشوفهم .. كان البيتكوين وصل 180 دولار تقريباً … لاحظ هنا حاجة مهمة جداً : إني خلفيتي الدراسية هي العالم ده .. من البرمجيات و هندسة الإتصالات و ما شابه . .. و مع ذلك .. بفضل الله ربنا كرمني و رزقني شوية عقل .. و رفضت كل اللي عرض عليا من أصدقائي و معارفي أيامها إني ” أستثمر ” ليهم فلوسهم في العالم ده .. .. و كل مليم دخلته للعالم ده .. كنت مستعد كامل الإستعداد إني أخسره كتمن للتعلم و التجربة .. و ماكنتش متوقع أو متأمل فأى عائد منه .
  … … 5- لحد النهاردة .. و ربنا يقدرني و أستمر علي كدة .. مش باشرح أو أ ( زغلل ) عين أى حد بعوالم زي ( المضاربة في العملات الرقمية ) .. أو ( البورصة ) . … و كل شخص يتواصل معايا .. و يدردش في الموضوع ده .. بأكد نفس الموضوع . .. و مؤمن إيمان تام لا يشوبه شك .. إن أى إنسان كسب من العالمين دول أى مليم بدون ما يكون بذل مقابل مكسبه ده تعب مساوي في المقدار فإنه يتعلم أسس العوالم دي و أبعادها الحقيقية .. مكسبه ده بيكون نقمة عليه مش نعمة إطلاقاً . … و كم المرات اللي شفت فيهم بعيني ناس أعرفهم خسرت شقق ( فدبي .. و فسان سيتفانو !!! .. و التجمع !! ) .. و إنتهي بيهم المطاف سواقين أوبر … بسبب إنهم كسبوا مرة و إتنين و عشرة من عوالم ال ( مكسب السريع ) .. و بعدين المرة ال11 خدوا الخازوق المتين .. يخليني أزداد إيمان بمبدأي . … … 6- علي الجانب الآخر .. أى حد عايز يكسب و يلاقي دخل محترم يعيشه معيشة محترمة .. فأنا باكرر للمرة المليون .. إتعلم التجارة … ( يا تبيع مهارة .. يا تبيع سلعة ) .
  يعني : إما إنك تتعلم مهارة معينة .. و تعرف تسعرها صح .. و تبيعها فسوق صح .. فتبقي عندك القدرة إنك تقبض مقابل الوقت اللي تشتغله .. المبلغ اللي إنت عايزه . .. أو إنك تتعلم إزاي تبيع سلع حد غيرك .. ( affiliates, drop-shipping , … ) . … … 7- الفلوس بتيجي من إن الزبون يستفيد .. فيدفع .. مرة كمان .. الفلوس الحقيقية .. اللي مضمونة .. اللي تقدر تعتمد عليها .. بتيجي من إنك تقدر تقول ليا كل مليم دخل ليك .. مين إستفاد إيه فمقابله .. … لكن لو قلت ليا إنك قبضت 10 جنيه .. عمولة علي راس شخص إسمه (حمادة ) .. إنت دخلته فحاجة .. علي أمل إنه يستفيد .. لما يجيله فلوس .. لما يدخل شخص جديد إسمه ( ميدو ) في الحاجة دي … وهكذا .. يبقي إنت ولا مؤاخذة .. دخلت الهرم . … … 7- فأى حاجة بقي ( باي نتورك , كيو نت , .. أى هري ) .. تلاقي فيها إنك مش عارف مين مستفيد إيه .. و إن في فلوس حتيجي .. لما تعمل حاجة إنت مش فاهم هي إيه .. أو مين مستفيد منها .. ( يعني إنت مش عارف فين الزبون من الآخر ) .. ( أو مش فاهم ) .. يبقي أهررررررب .. .. لأنك والله العظيم .. حتي لو قبضت جنيه واحد من الموضوع الهلامي ده … حيتصرف فحاجة ترجع عليك بخسارة . … … 8- بالله عليك .. كمان مرة بالله عليك .. يا صديقي يا اللي بتشير الكلام ده .. أقسم عليك يا أخي .. إفتح فيديو يوتيوب واحد علي الأقل و إعمل سيرش علي أى كلمة من اللي حاكتبهم ليك تحت دول .. و إبدأ أتعلم حاجة من أى كلمة من الكلام ده .. والله أفيد ليك . ( affiliates, drop shipping , arbitrage , freelance ( و إكتب جنبها أى مهارة نفسك تشتغلها ) . … … 9 - و رجاااااااااااااااااااء … لو ناوي تبعت ليا ( أو لغيري) رسالة فيها سؤال من نوعية :
• ياسطا عايز أتعلم إنجليزي .. إزاي ؟
• ياباشا .. اتعلم ( كذا ) إزاي ؟
• ياسطا .. هو يعني إيه ( كذا ) ؟ ..
• أو أى سؤال مشابه .. إعمل لي بلوك .. و بعدين روح إكتب نفس السؤال ده فجوجل .. و قضي كام ساعة بتلف حوالين نفسك هناك ( زي ما أي حد بينجح بيلف حوالين نفسه هناك) .. و لما توصل إنك تلاقي سؤال مش لاقي إجابته علي جوجل .. إرجع شيل البلوك .. و إبعتهولي .. … غير كده .. ماقدرش أوعدك إني أرد علي الرسالة .. ( أنا أو غيري ) .. … … 10- آسف في حدة الصيغة مرة أخري .. المواضيع اللي بتستغل جهل الناس دي بتستفذني .