عمرك سمعتي عن ( ريوكان = Ryōkan ) .. أستاذ ال( zen = حاجة زي اليوجا و التأمل كده ) . فليلة من الليالي .. لص راح للكوخ بتاع ( ريوكان ) ده فقاعدة الجبل .. و قاله ( طلع اللي معاك ) .. ريوكان بص له .. و بص حواليه .. و اللص إكتشف إن الكوخ فاضي بالكامل .. مافيش حتي لقمة عيش .. كان لسة حياخد بعضه و يمشي .. نادي عليه ريوكان ” إستني ! ” .. و بعدين راح قالع الهدوم اللي كان لابسها و قاله ” خد ” .. اللص كان باصص ليه و هو مذهول .. رد عليه ريوكان : ” إنت أكيد مشيت مسافة طويلة لحد ما وصلت عندي هنا .. مش المفروض ترجع فاضي .. اللص خد هدوم ريوكان و مشي .. قعد ريوكان و هو قالع ملط علي الأرض .. و بص للقمر فوق في السما .. و قال : ” مسكين اللص ده .. يا ريت كان في طريقة أقدر أديه بيها القمر الجميل ده ” .

القصة دي سمعتها لأول مرة من كام يوم في الحلقة التانية من السيزون الرابع من أحد أكتر المسلسلات اللي باحب أتفرج عليها ( the good fight ) . و لما سمعتها ضحكت بصوت عالي .. مش لأنها كوميدية .. و لكن لأنها فكرتني بحاجات كتير كنت إتعلمتها و قريتها .. آخرها كان فكتاب لل ( mindfulness ) .. و إزاي إن الحياة دايماً بتلاقي طريقة إنها تنسينا الفكرة دي . … الفكرة هي إن جزء كبير من مشاكل الإنسان و الخلل في تفكيره .. ناتجة من فهمه الخاطئ عن هو يملك إيه .. و المفروض يقلق بإيه .. و بتكون النتيجة هي إنه بيكون دايماً عامل زي اللي بيجري ورا سراب .. معلق عينه بيه .. كل ما يقرب منه .. يلاقيه بيبعد أكتر .. في حين إنه مابيشوفش أى حاجة من اللي حواليه .. من الكنوز اللي حواليه . … آخر بوست كتبته قبل ده .. فيه رسايل جات ليا علي صراحة بردود ما مفادها ( الكلام ساهل و التطبيق صعب) , ( أنا عايز أتعلم بس ماقدرش أقعد شهور أتعلم أو أقرا كتاب ) , ( أنا مش قادر أواكب أو أواظب علي العبادات ) , … و هكذا . … … ردودي علي الرسايل دي .. هي أحد أكتر الأفكار اللي إتعلمتها زمان .. و إكتشفت مدي قوتها .. و كل ما باحس إني بدأت أتوه أو بوصلة حياتي تختل .. بتكون الفكرة دي هي أحد أكتر الأفكار اللي بترجعني لمرحلة إستقرار نسبي تاني .. … و هي فكرة : فإيدي إيه فعلاً ؟! أملك إيه فعلاً ؟! … … إجابة السؤال ده قمة في البساطة و قمة في القوة : أنا فإيدي : اللحظة دي بس . أملك : اللحظة دي بس . مش أى حاجة تانية خالص .. لا أملك رصيدي في البنك . لا أملك مشاعر اللي حواليا . لا أملك المستقبل و إستثماراتي فيه . لا أملك الماضي و نجاحاتي أو فشلي فيه . لا أملك أى شيء .. إلا اللحظة دي بس .. … و بناءاً علي كده .. طالما لا أملك أى شيء غير اللحظة دي .. أولوياتي فيها إيه ؟! .. لو كان عمري كله عبارة عن لحظة .. واحدة بس .. حاعمل فيها إيه ؟! .. الحقيقة هي إن بالترتيب .. حتلاقي أولوياتك دايماً : 1- إنك تستمتع بكل ما تملكه في اللحظة دي من نعم .. و تحس قد إيه هي نعم ضخمة .. تستمتع بالبصر .. و كل حاجة شايفها حواليك .. مش لأنها حلوة .. و لكن لأنك قادر تشوفها بتفاصيلها .. تستمتع بالنفس .. بالحياة .. بكل ما تقدر تشعر بيه … مهما كان هو إيه .. 2- أكيد مش حتقلق بأى شيء حيحصل في اللحظة اللي جاية .. لأنها مش بتاعتك .. لا تملكها .. ممكن جداً يحصل مليارات الحاجات حواليك تخليك ماتشوفش اللحظة اللي جاية .. 3- مجرد إستمتاعك و رضاءك عن اللحظة اللي إنت عايشها دي .. حيحول تفكيرك بالكامل ناحية كل الأفعال اللي لو عملتها حيخليك سوبر مان .. مش إنسان عادي .. .. السبب فده هو إن معظم مشاكل البشر (الإنسان العادي ) بتنتج من الجسم المادي ( جوع , عطش , إحتياج جنسي , … ) .. و كل المشاكل المادية دي .. دايماً بتتعلق بالوقت و المستقبل .. إنت جعان .. بس حتي لما بتاكل .. بتبدأ تقلق بالوجبة اللي بعدها و تسأل يا تري حنتعشي إيه ؟ إنت عطشان .. بس بتشرب و إنت عايز تطمن إن في نهر يقدر يرويك منين ما تعطش تاني . إنت عايز تتجوز .. بس عايز تطمن إنك حتي لو إتجوزت .. تقدر تستمتع بأقصي شكل و توصل لل ( أورجازم ) بتاعك مرة تانية و تالتة و عاشرة . كلها مشاكل متعلقة بقلق بالمستقبل .. و ناتجة من خوف سببه الماضي .. و نتيجة لخوفك و قلقك بسبب المشاكل دي .. بتبدأ تجري ورا حلولها .. و تنسي .. تنسي إنك ( بتاكل و تشرب و تتجوز ) .. مش عشان ترجع تقللق و تفكر في ال ( الأكل و الشرب و الجواز ) . و لكنك بتاكل و تشرب و تتجوز .. عشان تبطل قلق و تفكير في الحاجات دي .. و تبدأ تبص حواليك .. و تكتشف العالم .. بالظبط بنفس الطريقة اللي كنت بتكتشف بيها العالم بفضول منقطع النظير أيام ما كنت طفل صغير .. طفل مش قلقان بالأكل و الشرب .. طفل كل حاجة جديدة بتخليه ينذهل و يضحك بقهقهة عالية جداً .. … بس إنت دلوقتي مش طفل .. عقلك إمكانياته أصبحت أكبر بكتير جداً .. ذاكرتك أصبحت قوية جداً .. و أصبحت مليانة معلومات تقدر تربط فيها أى معلومات جديدة تكتشفها .. تقدر تكتشف أكتر بكتير من الطفل .. و تكتشف إكتشافات أعقد بكتير .. … … و اللي بيحصل .. هو إن لو عشت بالطريقة دي فعلاً .. و أصبحت حياتك مجرد لحظة .. مش قلقان فيها بال ( أكل و الشرب و الجنس ) .. و مقضي اللحظة دي .. فرحان و راضي و شاكر لكل النعم اللي إنت إكتشفتها قبل كده .. و عندك فضول تكتشف بيه جديد و أكتر دايماً .. حتلاقي نفسك فعلاً بتكتشف حاجات جديدة .. لأن الكون ضخم لا متناهي .. مهما دققت النظر في الذرة .. حتلاقي جديد .. مهما بعدت النظر للسما .. حتلاقي جديد .. مهما وسعت النظر للكون .. حتلاقي علاقات جديدة بين مكوناته .. … … … و بعدين تيجي اللحظة اللي بعدها … و لكنك معاك من اللحظة اللي فاتت تراث .. ميراث ضخم .. ثروة من الإكتشافات .. … و ربنا خلقنا شعوب و قبائل لنتعارف .. فتبدأ تكلم اللي حواليك .. و تنقل لهم إكتشافاتك دي .. بحب .. بفرحة ..برضا و سعادة .. ( لأنك عايش اللحظة التانية دي بس برضه .. و مش قلقان باللي بعدها ) . .. فتلاقي الناس بتدفع ليك مقابل إكتشافاتك .. إما بتدفع ليك إكتشافاتهم هما .. أو يدفعوا ليك وقتهم .. أو ما يساوي وقتهم ده من أى وسيلة تبادل ( فلوس ) .. و يثقوا فيك إنك حتستخدمها صح .. … فتستخدم إنت الثروة اللي معاك من اللحظة اللي فاتت .. و اللي الناس اللي حواليك إدوه ليك مقابل ما إديته ليهم .. و تحاول تكتشف بيه أكتر في الكون .. مهارة أكتر ليك .. أفكار أكتر .. أكتر .. … … و تلاقي إنك السراب اللي كنت بتجري وراه زمان ( الفلوس ) .. بقت بتيجي لوحدها .. بدون ما تقلق بيها أو تفكر فيها .. بتيجي كنتيجة ثانوية ( side product ) لمجرد إنك عايش زي ما ربنا كرمك .. عايش إنسان ربنا كرمه بالعقل .. مش حيوان .. كل اللي بيفكر فيه هو ( أكل و شرب و جنس ) .. … … ده أحد تلخيصاتي لل ( mindfulness ) .. و ردودي علي الرسايل اللي جات من إمبارح . … عيش اللحظة . … و الله أعلم .