جاندالف الجويلي .. أو إلباس دمبلدور الجويلي .. أيهما تفضل

جاندالف الجويلي .. أو إلباس دمبلدور الجويلي .. أيهما تفضل ..

فاكر كويس .. سنة 2009 كنت ماشي مع أحد أصدقائي في الشارع .. و باقول له : ” أنا مستني اللحظة اللى في الفيلم بتاعي .. اللى حيظهر ليا فيها راجل عجوز بدقن ( شبه جاندالف أو دمبلدور) … و يشرح ليا إني صح .. و أني مش مجنون .. و يبدأ يكون المنتور بتاعي .

الراجل ده ماظهرش :) .. و يمكن ده هو أحد أسباب إني دلوقتي قدر إمكاني باحاول أساعد بأى شكل من الأشكال بنقل أى معلومة أقدر أنقلها .. لأني كنت جداً محتاج حد يقول ليا الكلام ده زمان ..

فباحاول أتخيل لو قابلت نفسي سنة 2009 .. السنة اللى وصلت فيها ل( rock bottom - أقصي فشل أكاديمي ليا ) .. و اللى كنت بامر بفترة من أصعب فترات حياتي النفسية فيها .. حاعمل إيه ؟! .

1- مش حاقول له أبداً (أصبر) .. أو أكلمه عن الصبر بأى شكل من الأشكال .. .. للأسف ناس كتير فاهمة نصيحة الصبر غلط .. و بتستخدمها بشكل خاطئ جداً .. و مستفز .. الصبر نصيحة تنصحها للإنسان في حالته الطبيعية .. المستقرة .. الناجحة .. و تعلمها له .. و تشرح له فضائلها .. و تشرح له كل ما له علاقة بالصبر علي المصائب .. و تشرح له إزاي إنه لما يوصل لمرحلة صعبة فحياته .. حينسي كل ده .. و حيبقي مجرد تفكيره فموضوع الصبر ده بيتطلب إرادة من فولاذ . إرادة تدربه عليها أثناء إستقراره و نجاحه … مش و هو تحت الضغط . و لكن أثناء ما هو في المرحلة الصعبة دي .. ده آخر وقت تكلمه عن ( الصبر ) .. لأن معني إنك بتقول له (أصبر) .. يعني إنه يصرف مشاعر و مجهود و أفكار مش موجودة عنده أساساً خلاص .. هو في المرحلة دي بيبقي عايز حلول مباشرة … حلول سريعة .. حلول فعالة .. لأنه لو تخطي المرحلة دي ( مرحلة إنه عايز حلول ) .. بيوصل لمرحلة إنه مش عايز حاجة خالص .. ولا حتي حياته نفسها .

2- مايك تايسون - الملاكم المشهور جداً .. ليه مقولة عبقرية : “Everybody has a plan until they get punched in the mouth.” يعني ” كل الناس بيبقي عندها خطة لكيفية الفوز و لعب مباراة ملاكمة .. لحد ما ياكل أول بوكس فبقه .. كل ده بيتبخر ” . ده حقيقي جداً جداً .. البوكس بييجي لكل واحد مننا فمرحلة من مراحل حياتنا .. و اللى بيفرق حد عن حد .. هو إنت إتدربت قد إيه علي إنك تفكر و تتأقلم و إنت بتاكل ضرب . .. و لكن لو لا قدر الله .. لقيت نفسك بتاكل ضرب و إنت مش متدرب علي كيفية التعامل مع العلقة اللى إنت بتاكلها .. يبقي لازم تتعلم حاجات أساسية جداً و مهمة جداً و بسيطة جداً … و بالترتيب : أولاً : إحمي المناطق الحيوية و الحساسة ( دقنك , ضلوعك , فم معدتك , عينيك ) . ثانياً : دور علي أى طريقة تهرب بيها من الضرب .. ولو لفترة بسيطة تدرس فيها خسائرك . ثالثاً : ماتفضلش محبوس فركن الحلبة ( و إلا حيتحوط عليك و تاكل خطافيات و يتشكل عليك لحد ما يبان لك صاحب ) … التلات نصائح دول .. زي ما هما بينطبقوا في الملاكمة … بينطبقوا بالظبط علي المعاناة النفسية في الحياة . أولاً : حماية مناطقك الحيوية و الحساسة … فنفسيتك . يعني ماتسمحش لأى لكمة إنها تقرب من ( إحساسك بقيمتك و أهميتك في حياتك ) ..( إنت ماينفعش تتقارن بأى حد ).. ( فهمك للحاجات الحقيقية المهمة في الحياة .. و ترتيبك الصح للأولويات ) … و هكذا . ثانياً : إهرب . يعني دور علي أى طريقة عقلك يلاقي بيها مكان يحس فيه بالإستقرار النفسي و الهدوء مؤقتاً ( قراءة , عبادة , رياضة , موسيقي , غناء , … ) . ثالثاً : ماتفضلش محبوس فركن الحلبة . يعني ماتخليش الطريق الوحيد إنك تتحرك .. هو بإنك تواجه المشكلة بتاعتك مباشرة .. لأنها أحياناً بتكون أقوي من قدراتك الحالية بمراحل .. دايماً خلي في طرق تانية تقدر تتحرك فيها .. تجرب فيها .. تنجح فيها .. ” ماعرفش طالب فكلية … و صاحب شغل أو بيزنس فنفس الوقت .. قلقان من إن الكلية تحدد مصيره بأى شكل .. دايماً هو عارف إن هو اللى بيحدد مصيره بإيده ” .

3- بناءاً النقطة اللى فاتت دي .. اللى حاعمله مع إسلام ( سنة 2009 ) .. كنت حاعرض عليه شغل .. بتحديات مختلفة عن الكلية .. بعائد واضح و صريح ( مادي مش درجات ) .. و عائد تاني أوضح و أكثر تأثير ( معنوي يحس فيه بإفادته و قيمته للناس ) .. و كنت حاوضح له طرق النجاح الكتير المختلفة الغير معتمدة علي شهادة من كلية .. أو شهادة من أى نظام خارجي .. و اللى تعتمد بالكامل علي مجهوده و أفكاره . .. و كنت حاتأكد من إنه بيتعلم إنجليزي كويس جداً .. عشان يشوف العالم الحقيقي الوااااااسع جداً من الفرص و الإمكانيات المتاحة علي الإنترنت . .. و كنت حاخليه يقطع علاقته بكل اللى حواليه غير أهله الأساسيين و اللي هو عايش حياته بيقارن نفسه بيهم .

ممكن يكون في حاجات أكتر .. بس أفتكرها فبوستات أخري إن شاء الله .. … و الله أعلم .