إلي صديقي الزعلان عشان الدكاترة و اللي بيحصل فيهم

إلي صديقي الزعلان عشان الدكاترة و اللي بيحصل فيهم :

1- رجاء إفتكر الزعل ده لما تيجي تشغل التيليفزيون و تقعد قدامه .. لأن كل ثانية بتقضيها قدام ممثلة حيزبونة فمسلسل .. أو ممثل ظريف أو بيستظرف فمسلسل تاني .. بتخلي شركات الدعاية و الإعلان تتنافس فإنها تدفع له أو لها أكتر و أكتر (من الفلوس بتاعت عمو اللي معاه فلوس) … عشان يعرضوا المنتج بتاع عمو اللي معاه فلوس .. عشان إنت تشوف المنتج بتاع عمو اللي معاه فلوس … فتشتريه .. و تديله فلوس .. اكتر . . 2- رجاء إفتكر الزعل ده .. لما تشوف بوست لممثلة حيزبونة برضه .. أو ميم .. او أياً كان من اللي سيادتك بتتابعه و بتشيره عالنت ( و لا أزكي نفسي .. انا لسة مشير بوست فيه صورة مات لابلانك من مسلسل فريندز ) .. لما حضرتك بتشير البوست ده .. شركات الدعاية و الإعلان بتاخد بالها .. و تروح تتنافس عشان تدفع للإنفلونسر صاحب البوست ( أو الشخص أو الممثل المشهور ده ) فلوس أكتر و أكتر (من الفلوس بتاعت عمو اللي معاه فلوس) … عشان يعرضوا المنتج بتاع عمو اللي معاه فلوس .. عشان إنت تشوف المنتج بتاع عمو اللي معاه فلوس … فتشتريه .. و تديله فلوس .. اكتر . . 3- رجاء إفتكر الزعل ده .. لما بتقعد علي القهوة ساعتين و تدفع 5 جنيه فكباية شاي .. عشان تتفرج علي شوية شباب في العشرينيات من عمرهم .. بيجروا ورا كورة مليانة هوا .. والله العظيم بيجروا ورا هوا .. و إنت و أنا و ملايين تانيين غيرنا .. بيتفرجوا عليهم بكل شغف .. يقوم إيه اللي يحصل ؟!! شركات الدعاية و الإعلان بتاخد بالها .. و تروح تتنافس عشان تدفع للشباب اللي فعشرينيات عمرهم فلوس أكتر و أكتر (من الفلوس بتاعت عمو اللي معاه فلوس) … عشان يعرضوا المنتج بتاع عمو اللي معاه فلوس .. عشان إنت تشوف المنتج بتاع عمو اللي معاه فلوس … فتشتريه .. و تديله فلوس .. اكتر . . 4- رجاء إفتكر الزعل ده .. لما كل ما تحب تطلع تغير جو .. تروح تقعد علي كافيه ديكوراته متكلفة ملايين .. و تدفع 40 جنيه .. فكباية شاي .. عشان تعمل منظر قدام البنت اللي إنت ( حانفترض ) إنك عايزها تشاركك حياتك .. فشايف إن ال ( منظر ) حييجي من الدفع أكتر .. يقوم إيه اللي يحصل ؟! صاحبك اللي عايز يرتبط ببنت خالت البنت اللي إنت كنت عازمها في الكافيه الغالي ده .. يسمع شوية كلام ظراف من بنت خالت البنت اللي إنت كنت عازمها في الكافيه الغالي ده .. و عشان يثبت إنه مش أقل منك ليها .. يروح هو و يدفع 60 جنيه فنفس كوباية الشاي اللي إنت دفعت فيها 40 جنيه من شوية .. بس عند كافية تاني ديكوراته برضه مدفوع فيها ملايين . يقوم إيه اللي يحصل ؟!! يقوم عمو اللي معاه فلوس كتير .. يعرف إن الناس بتتنافس إنها تدفع عشان تتمنظر .. يقوم رايح لشركات الدعاية و الإعلان .. و يعمل منتجات مش مختلفة إطلاقاً عن منتجات موجودة حالياً في السوق بالفعل .. و لكنها أغلي 3 أضعاف . عشان كل واحد عايز يعمل منظر قدام البنت اللي عايز ( حنفترض ) إنها تشاركه حياته … بدل ما يصرف وقت و مجهود و يروح يعزمها في الكافيه الغالي أبو ديكورات غالية .. لا .. ليه ؟! .. إشتري بضاعة غالية و خلاص .. إنت عملت اللي عليك و دفعت . يقوم إيه اللي يحصل ؟!! يقوم كل حد ماعهوش فلوس إنه يصرف ( عشان يعمل منظر ) .. ينسي إن ( عمل المنظر ) أساساً مش المفروض يكون بالفلوس .. و إن الفلوس والله عمرها ما بتعمل و لا عملت و لا حتعمل ( منظر حقيقي ) .. و لكنه شاف البنت اللي معاك إنبهرت بال ( منظر أبو الفلوس ) .. و البنت اللي معاه .. شافت البنت اللي معاك (مبهورة بالمنظر أبو الفلوس ) .. و حست إنها المفروض هي كمان تنبهر بالمنظر ( أبو الفلوس ) .. و تكون النتيجة .. إن الدنيا كلها تبقي مهتمة بال ( فلوس ) . . 5- يا صديقي يا زعلان .. كل شيء في عالمنا ( الضيق جداً ) .. مترابط و مرتبط جداً جداً ببعضه .. و كل شيء إنت بتعمله فحياتك .. من أول إختيارك لنوع هدومك الداخلية .. لحد إختيارك لنوع عربيتك .. بيأثر بشكل (مباشر ) .. علي اللي بيحصل قدامك في الحياة . . 6- يا صديقي يا زعلان .. مش من حقك تيجي تزعل دلوقتي .. . 7- يا صديقي يا زعلان .. لو إنت كنت عايش حياتك عادي جداً .. و فجأة إكتشفت إن الدنيا اللي إنت جزء أساسي منها دي .. موازينها مختلة جداً .. إذن فإنت كنت متجاهل لكل اللي حاول إنه يعلمك و يشرح لك و يوضح لك و يزعق فيك .. علي مدار عمرك .. و بالتالي إنت الغلطان … و مش من حقك تزعل دلوقتي . . 8- يا صديقي يا زعلان .. لو إنت كنت فاهم من زمان إن الدنيا موازينها مختلة .. و زعلان من زماااااان .. و جاي دلوقتي تزعق مع اللي بيزعقوا … برضو تبقي إنت غلطان .. لأن يا صديقي يا زعلان .. دلوقتي مش وقت الأكشن ده خاااااااااالص … المفروض إنك فاهم من زمان بقي .. فاهم إن بمجرد ما السفينة ترسي علي شط .. كل اللي كانوا بيدعوا ربنا دول و مرعوبين من الغرق حينسوا .. و يرجعوا يغنوا إن السفينة كانت ماشية بشطارتهم .. و ينسوا إنهم نشروا خشب السفينة و عملوا منه عصيان يتخانقوا بيها مع بعض .. و مراجيح يتمرجحوا عليها .. و ( خليني مؤدب و ماقولش الباقي ) .. . 9- يا صديقي يا زعلان .. الدنيا كانت و ما زالت و ستظل فيها الإختلال ده .. وعيك بيه مش حيفرق في شيء في الإختلال ده .. و لكن يفرق معاك إنت شخصياً .. الوعي اللي إنت حسيت بيه فجأة ده .. مش علامة إنك المفروض تروح تقنع الجاهلين إنهم يتغيروا .. الجاهلين لسة ماوعوش .. و مش حيوعوا أو يدركوا لما إنت تزعق لهم أو تشتمهم .. الجاهلين حيوعوا و يفهموا .. لما يلاقوك إنت إتغيرت .. و لما يفهموا .. لو راحوا يزعقوا لغيرهم .. يبقوا لسة مافهموش … الفهم بييجي بعده علطول التغيير جواك … مش براك .. .. 10- يا صديقي يا زعلان .. التغيير اللي المفروض يحصل فحياتك بعد ما شفت و فهمت و وعيت اللي بيحصل ده .. إنك تبطل تدي قيمة للي مالوش قيمة .. و ماتساعدش فده بأى شكل قدر إمكانك .. لما تحتاج تعمل منظر .. إعمل منظر بإنسانيتك .. بعقلك .. بقلبك .. مش بجيبك .. لما تحتاج تتفرج علي مسلسل .. إختار مسلسل ماتزعلش لما تلاقي أبطاله مليونيرات بعد كده .. لما تحتاج تتفرج علي فيلم .. إختار فيلم ماتزعلش لما تلاقي أبطاله راكبين أحدث عربيات بعد كده .. لما تحتاج تشوف قيمة حد .. دور علي إنسانيته .. عقله .. قلبه .. مش جيبه .. .. 11- يا صديقي يا زعلان .. لو كل اللي بيحصل حواليك ده .. حسسك إنك زعلان .. ده حلو ..فرصة ماتضيعهاش .. دي علامة إنك بدأت تفهم .. خد أكشن جواك .. جوة عقلك .. جوة حياتك .. لأنك اللحظة اللي بتبدأ تلوم أى حد برة عقلك و حياتك … يبقي إنت ضيعت الفرصة علي نفسك .. .. 12- أما الناس اللي لسة مافهمتش .. و اللي إنت عايش بتشتم فيهم ليل نهار دلوقتي .. دايماً إفتكر بالله عليك .. إفتكر إن كان في ناس فيهم نبي الله موسي .. و أخوه هارون .. و مع ذلك عبدوا ( عبدوا عبادة ) .. تمثال فيه خرم و بيصفر لما الهوا بيدخل الخرم ده .. و أضلهم ال ( سامري ) . … و الله أعلم .