رسالة إلي "عمو " اللي بيشرب سجاير في بلكونته اللي

رسالة إلي “عمو ” اللي بيشرب سجاير في بلكونته اللي جنب بلكونتي من اللمين بعد الأرض الفاضية .

أنا مدرك إن الحظر مضطرك تقعد في البيت .. و إنك قد تكون غير مدرك إن دخان سجارتك طاير في الهوا .. و دخل ليا أوضة مكتبي .. أنا ريحة السجاير بتعكنن مزاجي .. بالظبط زي ما هي بتروق مزاجك .. إن لم يكن أضعاف . و مدرك مدي عدم منطقية إني أطلب منك (بأي شكل ) إنك تدخل تإذي نفسك بالسم ده جوة شقتك .. لأن كده حتإذي أهل بيتك أضعاف ما إنت بتإذيني دلوقتي … و إحتمال ضخم يكون فيهم أطفال … فحاضحي أنا يا سيدي . … و مدرك إن الحوار في الموضوع ده من البلكونات مش حيكون نتيجته غير إزعاج الجيران .. و إن إحتمال إن حضرتك تقتنع بالإقلاع عن السجاير نتيجة حوار مع جارك اللي بلكونته جنب بلكونتك من الشمال بعد الأرض الفاضية … ضئييييل جداً . .. فبالتالي أنا مافيش قدامي غير إني أنتظر و أتمني إن مزاج حضرتك يتعدل من سيجارة واحدة .. و ماتطلبش معاك إنك تولع اللي بعدها .. و إن أى “عمو ” تاني ممكن يكون بيقرا الرسالة دي .. علي الأقل يبقي عارف .. إن ريحة السجاير بالنسبة ليا .. و لناس كتييييير غيري … مؤذية و بتعكنن جداً . … أنا ماقلتش بطل .. و ماقلتش ماتشربش .. بس عالأقل كون مدرك لده .. و أنا سايبك لضميرك . 😢😢😢