بالله عليك إعرف الموضوع ده بدري لو القعدة فبيتك و

بالله عليك إعرف الموضوع ده بدري لو القعدة فبيتك و الشغل من البيت و الدراسة بنفسك لسة جديدة عليك .

الجهل مرحلتين مش مرحلة واحدة

لسة قافل المكالمة التالتة النهاردة دلوقتي حالاً .. اللي كررت فيها نفس الكلام اللي باكرره بقالي 5 سنين من أول مرة شرحت فيها أى حاجة . … خلاصتها … ” طول ما اللي إنت ناوي تعمله متوقف علي إني أجاوبك علي سؤال أو أشرحلك شيء ما .. إجابته أو شرحه موجود علي جوجل .. بس إنت كنت مستنيني أنا أو غيري يجاوبك عليه أو يشرحه لك .. طول ما إنت حيفضل عندك مشكلة ضخمة جداً ” . .. أنا متاح 24 ساعة 7 أيام في الأسبوع 365 يوم في السنة إني أساعدك بأى شكل أقدر أساعد بيه .. و لكن فعلاً باتضايق لما تكون المساعدة دي هي إنك مستنيني أنا اللي أعمل جوجل علي سؤالك .. او أجاوبك بشيء ما عملت عليه جوجل من قبل كده .

---

دوري كمقدم مساعدة أو إنستراكتور أو أياً كان المسمي .. يتلخص في الجملة التالية : you don’t know what you don’t know يعني : إنت مش عارف إنت مش عارف إيه . دوري إني أسرع لك العملية بتاعت التعليم بإني أكسر لك المرحلة الأولي في الجهل . جهلك بإنك ماتعرفش عن ال ( أفيلييتس مثلاً ) .. بمجرد ما تعرف (تعريف الأفيلييتس المختصر جداً ) .. إنت كده عرفت عنها ( كسرت المرحلة الأولي في الجهل بيها ) .. لكن لسة ماتعرفش تشتغلها أو تعرف تفاصيلها . … يعني إنت إكتشفت إنك ماتعرفش أى شيء عن الشيء ما ده ( عن الأفيلييتس ) … بس إنت عرفت إنك مش عارف . … دورك يبقي إنك تكسر المرحلة التانية .. و تروح و تعرف . و ت ( جووووووووووجل ) .

معظم كورساتي و شغلي في الشرح باركزهم علي المرحلة الأولي .. إني أوضح لك إنت مش عارف إنت مش عارف إيه .. ( أنا ماغلطش في الكتابة هنا ) .. مرة تانية . (إنت مش عارف إنت مش عارف إيه ) .

قسم يومك و مجهودك صح .. جزء بتحاول تعرف إنت مش عارف إيه . و جزء تاني بتحاول تعرف عن اللي عرفت إنك مش عارفه .

و الله أعلم .