هو أنا مش متابع أوى للى بيحصل و شيرين رضا

هو أنا مش متابع أوى للى بيحصل و شيرين رضا و الكلام ده كله .. بس لو الموضوع حيحصل فيه تصويت .. أو كمجرد تعبير بسيط لرأيى هنا : أتفق و بشدة مع فكرة توحيد الآذان بصوت واحد .. أو إن يتعمل إختبارات لأى من يقوم بآداء المهمة دى عشان ماينفرش الناس بالطريقة المعتادة للأسف .

حوالين بيتى .. بأعد مع كل صلاة عدد 7 آذان مختلفين .. و بين أول واحد و آخر واحد دائماً فحدود 6 دقايق تقريباً .. مما يعنى إن كل واحد منهم بيستنى التانى يخلص عشان يبتدى .. أو إنى ساكن فخمس مناطق بخمس توقيتات مختلفة على الأقل فنفس الوقت .

طبعاً شىء رائع إننا نسمع صوت الآذان و يطمنا و يفكرنا و كل الكلام الجميل ده .. بس لما يبقى غالبية المؤذنين حوالينا هما إما أصحاب البيوت اللى فيها الزوايا دى .. أو اللى بيصحى أول واحد .. أو اللى بيدخل الجامع أول واحد .. أو اللى بيبقى حافظ أماكن فيش الميكروفونات … فدى مش مقومات إطلاقاً ..

و على صعيد آخر .. مش مستغرب إطلاقاً من الناس اللى بتحب تزيط فأى زيطة .. اللى ما زالت عقلياتهم للأسف عقليات أطفال فمرحلة إعدادى بيستنوا أى خناقة تحصل عشان يزيطوا و يضيعوا وقت المدرسة .. اللى مستغرب له فعلاً هو إن فى ناس لسة بتستغرب من وجود الناس دى !!

فى بوست تانى كنت باكتبه بالمناسبة .. غالباً حينزل لاحقاً .. بس صوت الآذان للأسف أيقظ فى عقلى الأفكار دى .. على عكس الهدف منه ..

والله أعلم