طبعاً مع فرق التجربة .. و لكن

طبعاً مع فرق التجربة .. و لكن : سنة رابعة هندسة .. كان فى مادة إسمها “قياسات” .. بغض النظر عن إسم الدكتورة .. فاكر إن إمتحان الميدترم درجاتى كانت حاجة زى 10 من 25 مثلاً مع إنى كنت متوقع مثلاً 23 أو 22 بالكتير . بالنسبة لى أنا كنت إتعودت خلاص إنى ماسألش ليه .. بس للفضول رحت للدكتورة المكتب .. يا دكتور .. ليه ؟!! و بعد مفاوضات طلعتلى ورقة إجابتى عشان تثبتلى إنى مابفهمش حاجة .. أول سؤال كان عليه 6 درجات .. و كانت طالبة مقارنة بين 6 أنواع أجهزة بتفاصيلهم و شوية تحابيش تانية .. كل الداتا و المعلومات المطلوبة أنا كاتبها فى الإجابة على شكل شجرة بيانات و تفريعات بشكل نضيف جداً .. و مكتوب إنى واخد 1 من 6 فى السؤال ده .. يا دكتور … لييييييييه ؟!!!!! ردت عليا بكل ثبات .. عشان تحرموا تاخدوا كورسات .. أنا إزبهليت .. يا دكتور بقالى 7 سنين فى الكلية عمرى ما خدت كورس والله .. ردت .. أنا ماكتبتهاش فى المحاضرة كده .. فى المحاضرة أنا عملتها فجدول .. مش فشجرة بيانات .. رديت .. يا دكتور هى مش كل المعلومات موجودة ردت .. أيوة . رديت .. طب والله أنا أبدعت الشجرة دى من تلافيف مخى مش من كورس عشان ألاقى أى وسيلة أحفظ بيها البيانات اللى ملهاش أى لازمة إنى أحفظها دى .. و أجاوب .. آخد 1 من 6 ليه ؟!!! ردت .. عشان أنا عملتها فى المحاضرة فجدول … . دكتور المشروع بتاعى طلعنى من قدامها فى اللحظة دى قبل ما أعمل حاجة أندم عليها .. الحمد لله